1 Korin 4 - Hano Niu Testamen

Ira Hala kera ira Turin Rovoga non Kraes

¹ Sinombu duluai rav gita gida kun be gida ira turin rovoga non Kraes, mwasin atatu gabe God mwa binihimwasiginira mai non mwasigi dahuligi duluai, be mwa du radu.

² Kunia la hala haḡea geki kera gabe mwa dau non butuana alura, alun raumatan ginau be mwa du dahuligi radu rav seserainia be kera ran dadariha alun taritari gea be mwa daria alura.

³ Kunia huriau siboku, nam hav vinihia tehe be kimiu giv vevegiau sage gin hav vevegi tehe ata lol ureure. Vaivotu be inau siboku nasav vevegi te dum muleiau.

⁴ Inau nasav gita te dum batoi noḡu vahalana siboku be nan lolia. Take geki mwa hav loliau tehe be namen vavtutu la lolmatan Ratahigi. Ratahigi kea n̄an atatu gaituvwa be mwa bevegiau.

⁵ Haḡe kunia gosav vevegi te amua nin mwasin tarona be vi mai; gov hohovi vaivotu Ratahigi vi mai mulei. Kea vi lai bisirai ginau duluai be mwa du dahuligi lol ute meto vai lol ute ran maita. Ratahigi vi vaseserai ginau duluai be mwa du dahuligi alolon sinombu. I batena gea, God vi lol roroai ihan atatu gaitutuvwai, nu hurin ginau tavtavuha be ran lolia.

⁶ Ira tuaku mai ira hogosiku, Inau nam avo maragai la ihamaru mai Apolos kun gabe malele i kimiu giv huhuinia alumaru, huribe giv gita batoi ira binihivanan avoana kera geki, “Giv huri havanau n̄an lua be mwa ravae lol Ravrava Sabuga.” I aia gosav sagerei te atatu gaituvwa liu nin atatu dodolua.

⁷ Kun hanigi? Ihei mwa bevea be giḡo gon tavuha nin atatu dodolua? Ginau vwate mwa dogo mai kimiu be God mwa hav laia te lalai kimiu? Sigai! Huri hano gim av ravravwega huri ginau be mwa hav vora te nomwa take God mwa laia lalainigo.

⁸ Gom binihia be gom dogo huba mai ginau duluai be gom doronia. Gom binihia be giḡo gon rosoga. Gom binihia be gom mai gi ratahigi lavoa take kamai gam hav vora te ratahigi lavoa kunigo. Be mwasigi kimiu ratahigi lavoa nam samsamwara maragai be kamaru mulei garu vi mai gi ratahigi lavoa mai kimiu.

⁹ Take lalaiau la gitavanana kun be God nu tau kamai ira hala la nogonan ute. Gida kun atatu gabe vevegi mwa bevegira huri mateana lolmatan i ira enjel duluai mai ira atatu duluai ata lol ureure.

¹⁰ Bwatuna be tam lol rovoga huri Kraes, tam mai gi bwaḡele lolmatan atatu, take kimiu gin mataisaoga huribe kimiu non Kraes. Atatu ram ḡita bahivoi kamai, take ram binihi marahi kimiu.

¹¹ Vaivotu garigi, gina ganiana sigai be gav gania sage wai be gav mwinua sage gaisaga be gav sagasagainia. Ram wehi kamai vataha mahavana i tanomai sigai be gav mambuharai aia.

¹² Gam lol rovoga hahavwani huri gamai ginau sibomai. Mahavana be sinombu ram bev bwarebware kamai, gam bev tavuhainira huria. Mahavana ram lol ḡagaras kamai, kamai gam lin̄ maḡemu vai aluna.

¹³ I mahavana be ram dentene vai alumai, gam bev tavuhainira huria. Vaivotu garigi, ram ḡita kamai kun be kamai han̄oran ginaganiana ata lol ureure-han̄ora boni ata lol ureure.

¹⁴ Inau nam lol ron̄oe kun be nasav lol te kimiu be giv ron̄oe ba busbusi. Nam ravae geki be men lai avoan vevsera dau lalai kimiu kun gabe kimiu mwasin ira nituku.

¹⁵ Be atatu vasan̄vul vahan̄vulu ram buluigo lol Kraes, mwa du be tamamwa vi vora gaituvwa n̄ano. Lol rahumwa lol Kraes Jisas, inau nam mai huba gi tamamwa huribe nam lai Roroi Tavuha lalainigo.

¹⁶ I nam hudali mutai kimiu be giv lin̄ mulei kimiu ba huri maleleku.

¹⁷ Bwatuna haḡea nam hora Timoti vai abemiu, nituku lol Ratahigi. Nam dabe maragai Timoti, i kea atat mwasigi garagusi. Kea vi bului kimiu be giv binihi dum mulei rahuku mai noḡu lalaḡova lol Kraes Jisas, kunia be nan vagahia alolon imwa tataro duluai vataha ute.

¹⁸ Rituai alolomiu ram bavora ram sasagerega, ram binihia be nasav mom mai te mulei vai abemiu.

¹⁹ Take nav mai vai abemiu n̄an darihou be Ratahigi mwa doron. I aia haḡea nav ilo havanau be ira sagere bwaro ram lolia, nu hav vora te havanau be ram lolia, nu hav vora te havanau be ram bevea,

²⁰ bwatuna be ute ratahigi non God nu visirae nu hav vora te gin avoana take gin muramura.

²¹ Havanau haḡea be gim doronia? Nav mai gai gaivua ba dalvusi kimiu sage nav mai mai lolotabetabe sage maḡemu?