1 Korin 16 - Hano Niu Testamen

Hogoi huri ira Atat Binihimwasigi Dodolua

¹ Kadogaha nav ravae huri hogoi la halan homu be vi bului atat non God Judia. Giv lol ginau n̄ano be nam bevea lalainira lol uloilua Kelesia be rav lolia:

² Vataha Sande, kimiu gaitutuvwai giv tau dagai homu be nu dadariha kunia be gin lai tavwe vataha vula. Giv tau ḡoḡoe huribe nasav mom hara te homu lol taro be nav mai.

³ Lol taro be nai visirai, nav rav ravrava vwate i nav taua la liman atatu vwate be giv dame aluna be vi lai nomiu hogoi vai Jerusalem.

⁴ Be vi tavuha maiau be nai van mulei, rai vano mulei maiau.

Binbinihi mai Taritari non Pol

⁵ Nam binihia be nai vano sivi Masedonia, i nav mai abemiu atagu, huribe nav van sivi Masedonia muana.

⁶ Nav togo mai kimiu vain̄ava sage lol taron ute hohoga duluai. I giv buluiau la halaku, lol ute be nai vano radu.

⁷ Nam doron be nav gita kimiu huri taro n̄ava take barabe taro vwelvwele n̄ano be nam ḡao. Nam doronhohov be nav togo vain̄ava mai kimiu kebe God vi gitae hurin non doroniva.

⁸ Take nav togo Ivisas vaivotu gubwen̄ Pentikos.

⁹ Huribe ginau tavuha huri rovoga nu laiana lalaiau kadogaha len̄len̄a be sinombu be ram avo wasi vai aluku.

¹⁰ Be Timoti vi mai vai abemiu, giv lai ḡoḡoe mai kimiu, huribe mwa lol rovoga huri God kuniau n̄ano.

¹¹ Vwate alolomiu si hav gita te bahivoi Timoti, take giv buluia la halana lol tamwata huribe vi mai mulei vai abeku. Nam binihia be vi mai mai ira tuana.

¹² Huri tuada Apolos: nam av wasi lalainia be mai vai abemiu mai ira tuana rituai. Mwa hav doron te didi mai kadogaha; vi mai kebe non rovoga vwate abena.

Pol mwa Nogoi non Avoan Dura

¹³ Giv mamata, giv tu wasigi lol nomiu binihimwasigi garagusi vi haḡo doronhohov, i giv tu wasi.

¹⁴ Giv lol ginau n̄oto lol lolotabetabe.

¹⁵ Gom iloe be ira varan Stivanas, kera ran vora muan binihimwasigi vai Akaia, i ran lai muleinira huri rovoga non God lalai sinombu. Nam hudali kimiu ira tuaku,

¹⁶ be giv huri tomuai non atatu kungeki mai irahei tehe be ram lol rovoga i ram lalaḡo maira.

¹⁷ Nam samwara be Stivanas, Votunatas, i Akaikas ran mai. Kimiu sigai teti take ran hogon tanomiu.

¹⁸ Ran lol garai noḡu vui i nomiu. Gos gita batoi tavuha non kera geki.

¹⁹ Uloilua lol vanua lavoa Esia ram hora avoan helheloi lalai kimiu. Akwila i Prisila ram laiḡoḡo kimiu lol ihan Ratahigi, i uloilua mulei be ram mai bulbulu lol imwara.

²⁰ Ira tuada duluai teti ram hora nora avoan helheloi. Giv avkarira mai gangan bwan̄o be nu sabuga lol taro be giv vihabwehabwe.

²¹ Inau Pol nam rav avoan helheloi geki gin mwasin limaḡu.

²² Be vwate si hav tabe te God, lin̄ia na togo dagai nin God. Nomai Ratahigi, gam doron be gov mai vilvilehi!

²³ Hogoi non Ratahigi Jisas vi togo maigo.

²⁴ Noḡu lolotabetabe vi togo mai kimiu duluai lol Kraes Jisas.