1 Korin 14 - Hano Niu Testamen

Avoana mulei huri Hogoi lol Vui

¹ Gov vano huri lolotabetabe. Gos n̄arin̄ari be gos haḡo hogoi lol vui, liuhage hogoi huri toretore huri roroi non God.

² Kera gabe ram haḡo hogoi be ram avo gin avoan dodolua, vorate ram avo mai atatu; ram avo lalai God. Atatu vwate mwa hav ron̄ te batoira; ram avo huri ginau dahuligi sivi vui.

³ Take kera be ram doretore huri roroi non God ram avo lalai sinombu be huira men wasi, avoan dura i avoan gitaḡoro.

⁴ Kera be ram avo la avoan dodolua ram buluira n̄an sibora, take kera be ram bev roroi non God kea ram bului uloilua.

⁵ Nam binibe kimiu n̄oto gis haḡo hogoi huribe gis avo la avoan dodolua, take liu nam binibe gis vev roroi tavuha non God. Kera be ram bev roroi non God ran muramuraga liura be ram avo la avoan dodolua, vaivotu be atatu vwate vi tu aia be vi vev hano be ran bevea huribe vi buluiana dum na uloilua duluai.

⁶ Ira tuaku, ke vi bului dum kimiu be nav mai nav avo la avoan dolua? Sigai! Vi bului n̄an dumwi kebe nav lai mwasigi gara nin God lalai kimiu, sa iloute gara rituai, sa nav vev roroi tavuha non God, sage silo vagahi?

⁷ Kunia n̄ano kun vatahanan pelei rahuana sigai alolora kun bua bava, kita be silora abena. Take kera rav lol lalan̄an silo. Take be bua bava mai kita ramuru lol silo gaituvwa n̄ano, ta sav ilo te dumwia be behe alolora haḡea ram peleinia.

⁸ I lol taron bwaloana, take be taiva mwa hav lai te silo tavuha, ihei vi lol dau huri bwaloana?

⁹ Kunia n̄an maigo. Len̄len̄a be gov avo vi melmelo gin meamwa, atatu vwate si hav ilo te hano be gom bevea. Gov avo vai la mahava!

¹⁰ Mwasigi be lalan̄an avoana ata lol ureure, i vwate sigai be binihivanana sigai.

¹¹ Take be nasav ilo binihiva huri ginau vwate be atat vwate mwa bevea lalainigo, nai vora tausala lalainia, i vi vora tausala lalaiau.

¹² Kunia n̄an maigo. Taro be gon doron hogoi lol vui maragai, gov hiḡera ivusi be rav haḡo hogoi be vi bului uloilua vi mauri wasi.

¹³ Kea be mwa haḡo hogoi be vi avo la avoan dolua kea vi tataro huri hogoi be vi vev lolon hano be mwa bevea.

¹⁴ Be nav tataro la avoan dolua, noḡu vui mwa dataro, take binihiḡu mwa hav lol te ginau vwate.

¹⁵ Havanau haḡea nav lolia? Nav tataro gin noḡu vui n̄ano? Sigai! Take nav tataro lol binihiḡu mulei. Nav lol iboi gin noḡu Vui, take gin binihiḡu mulei.

¹⁶ Be gom avkari God gin nom vui, kera be nora binbinihi sigai, kun hanigi haḡea rav vev dum Amen. Huribe ram len̄ai hano be gom bevea.

¹⁷ Gov avkari God la hala tavuha, take ginau geki mwa hav buluia tehe.

¹⁸ Nam avkari God huribe nam avo la avoan dodolua liu kimiu n̄oto.

¹⁹ Take lol taron ḡoḡoanan uloilua si tavuha maragai be nav avo la avoana gailima be rav ron̄ batoia huribe nav vagahi kera dodolua. Nu tavuha maragai liu be nav avo gin avoan vasan̄vulu la avoan dodolua.

²⁰ Ira tuaku, gisav binbinihi tehe kun gabe ira naturigi, lol ginau lete giv vora kun naturigi memea be mwa siv vora be mwa gav ilo te ginau vahala vwate. Take lol binihimwa goi vora kun atat gaivua.

²¹ Mwa ravana lol avoan sabuga be, “Nav lol atatu be rav avo la avoan tausala be rav avo lalai noḡu atatu, God mwa bevea kunia. Inau nam avo gin bwan̄on ira tausala, take radu rasav ron̄oau tehe.” God mwa bevea kunia.

²² I kunia hogoi huri avoana la avoan dodolua kea mwasigi vwate hurira be ram binihimwasigi take vorate hurira be ram hav binihi te mwasigi, Hogoi huri toretore huri roroi tavuha non God, kea ginau non atat binihimwasigi take barabe kera be ram hav binihi te mwasigi.

²³ Be atatun uloilua duluai rav mai bulbulu i atatu n̄oto rav avo la avoan dodolua. Take be atatu dodolua rituai ram haroro, inau nam bevea lalai kimiu be, kera ram bevea be, “Kimiu gim daltale.”

²⁴ Take be n̄oto ram doretore huri roroi tavuha non God i rituai ram haroro be ram hav vinihi te mwasigi, i ram hav iloe tehe. Be n̄oto ram doretore huri roroi tavuha, vurora vi seseraiana lalainira, i rai vevegi huri ginau n̄oto be ram ron̄oe.

²⁵ Ginau dahuligi lol irubwira vi lolian melmeloi. I rav hivbwaubwau ba avkari God ba bevea be, “Mwasigi God mwa do maigo.”

Alen̄an Rahuana lol Uloilua.

²⁶ Ira tuaku, geki haḡea binihivanan hano be nam bevea. Lol taro be gim du bulbulu, atatu vwate nona iboi, i vwate nona silo vagahi. Vwate mwasigi gara nin God. Vwate mwa avo la avoan dodolua. I atatu vi vev binihivanan avoan dodolua. Ginau mutai huri ginau duluai geki be men bului uloilua be vi tu wasigi.

²⁷ Lol taro be gim mai utegaituvwa, be vwate mwa avo la avoan dolua, vi vora gairua n̄ano, sage sihav lin̄ te gaitolu, be rav avo. Rav avo gaitutuvwai i atatu vwate vi vev lolona.

²⁸ Take be atatu sigai be vi vev lolona, kea kera be ram avo la avoan dodolua rav togo ḡoḡonai lol ḡoḡoana non imwa tataro. Ras avo n̄an lalainira i lalai God.

²⁹ Gairua n̄ano sa gaitolu na ira atatun vevsera ras avo, i rituai rai vev lolon hano be ram bevea.

³⁰ Be roroi tavuha non God mwa mai lalai atat dolua be mwa dogo, muan atatu be mwa avo vi mambu.

³¹ Goi vev dum lolon avoana gaituvwa vuri dolua. La hala geki atatu n̄oto rav lai silo vagahi i avoan dura.

³² Hogoi huri roroi tavuha non God mwa do aten limara sibora be ram avo.

³³ God vorate God huri binihiv len̄len̄a take God huri tamwata. Kunia be mwasigi lol uloilua duluai non God,

³⁴ nu tavuha huri vavine be rav togo ḡoḡonai lol taron ḡoḡoana. Rasav avo tehe, huribe silo non ira Jius mwa bevea kunia. Rasav mai te dum gi muai.

³⁵ Be ram doronbe rav huhui ginau vwate, rav hudali ira ahoara mahaḡea aten imwa. Vi vora busbusiana huri vavine be vi avo lol ḡoḡoanan uloilua.

³⁶ Silo vagahi non God mwa mai nin kimiu? Sage giḡo n̄ano be nu mai lalainigo?

³⁷ Kera be ram bevea be ira atatun vevsera sage atat sabuga ras iloe be hano be nam ravae lalai kimiu kea avoan wasi nin God.

³⁸ Kera be ram binihi bahivoi ginau geki God vi vinihi bahivoinira.

³⁹ Ira tuaku, be gis doron be gis vev roroi tavuha non God, take gisav tu ḡoro te atatu be nin non hogoi be ram avo la avoan dodolua.

⁴⁰ Take giv lin̄ ginau duluai rav loli la mwasin hal vavtutu huria.