1 Korin 11 - Hano Niu Testamen

¹ Giv huri maleleku kunia be nam huri malelen Kraes.

Mwasin Alen̄an ira Vavine alolon Imwa Tataro

² Nam lol roroainigo huribe gom binihi dumwiau lol ginau duluai, i gon huri ira silo vagahi be nam laia lalai kimiu.

³ Ta nam doronia be giv ilo ginau geki: Tomuai huri atamwani duluai kea Kraes, i tomuai huri vavine duluai kea ahoana, i tomuai huri Kraes kea God.

⁴ Ihei be mwa dataro i mwa doretore huri Roroi Tavuha lol tataro bulbulu be mwa ḡagav bwatuna kea mwa lai busbusiana vai alun Kraes.

⁵ Take ira vavine duluai be ram dataro i ram doretore huri Roroi Tavuha lol tataro bulbulu take mwa hav gagav te ḡoro bwatuna kea bwatun busbusiana lalai ahoana. Kea nu ḡun vavine be ram hiri kaburai iluna.

⁶ Be vavine si hav gagav te ḡoro bwatuna nu tavuha be si bal dagai iluna. Take be vavine vi hiri bwatuna sage vi bal dagai iluna kea bwatun busbusiana, bwatun ginau geki kea vi bwabwan̄ ḡoro bwatuna.

⁷ Take atamwani sihav gagav te ḡoro bwatuna, huribe kea mwasin nunun God sibona. Take vavine kea nunun atamwani sibona.

⁸ Atamwani nu hav mai tehe nin vavine, take vavine nu mai nin atamwani.

⁹ God barabe nu lol atamwani be vi vora non vavine, take nu lol vavine be vi vora non atamwani.

¹⁰ Bwatun ginau geki, nu vavtutu n̄ano be vavine vi bwabwan̄ ḡoro bwatuna be men seserainia lalai ira enjel, be mwa dogo la liman ahoana.

¹¹ Take lalai rahun atat binihimwasigi vavine mwa hav tu te sibona huri atamwani, i atamwani mwa hav tu te sibona huri vavine.

¹² Geki mwasigi huribe vavine nu mai nin atamwani, take mulei atamwani nu vora nin vavine. Take ginau duluai mwa mai nin God.

¹³ Gov vinvinihi huri geki sibomwa. Nu tavuha huri vavine be vi tataro be mwa hav bwabwan̄ te ḡoro bwatuna?

¹⁴ Rahuana ata lol ureure mulei mwa bagahi huria be ginau busbusi kebe atamwani mwa lin̄ iluna mwa du. Take ilu kea ginau tavuha huri vavine.

¹⁵ Ilun vavine kea nu laiana lalainia kun gabe tutuḡoro huri bwatuna.

¹⁶ Atatu rituai rav vigaigai radu huri ginau geki, take nai vevea be gida mai ira uloilua dodolua non God, nonda silo vagahi lealea.

Ginaganian Sabuga non God

¹⁷ Lol ginau duluai geki nam bevea be nam hav avkari te kimiu, bwatuna be lol taro be gim mai utegaituvwa gim lol bwarebware liu nin lolian tavuha.

¹⁸ Muana, nan ron̄oe be lol taro be gim bihabwehabwe kun gabe uloilua gim harabora, i nam binihimwasigi ginau rituai geki.

¹⁹ (Si tavuha be gis haḡo alen̄ lealea alolomiu huribe vi melmelo be ihei haḡea mwa lol doroniva non God.)

²⁰ Lol taro be gim mai utegaituvwa, gim hav gan te ginaganian sabuga la mwasin halana.

²¹ Geki bwatuna be lol taro be gom ḡan ginau, vwate mwa ḡan gana i mwa hav hohov te tuana. Rituai ginaganiana be ram ḡania mwa hav dadariha tehe, take rituai ram mwinmwin daltale mwa liu.

²² Gov gan dum ginau ba mwinmwinu lol tanomwa mahaḡea! Huri hano gim hav binihi te marahi ira tuamiu lol uloilua non God? Mwa du be nav avkarigo? Nam hav avkarigo tehe huri ginau kerageki.

²³ Silo vagahi be nam laia lalainigo kea nu dadariha mai silo vagahi be nam laia nin God: Lol bon̄i be mwa laiana na Jisas be men wehiana, mwa lai bereti,

²⁴ i mwa lai avoan avkari huria. I mwa biha borae mwa bevea be, “Geki rebehiku; kea huri kimiu. Giv lolia kunia be giv binihi raduiau.”

²⁵ La hala n̄an gea, atagun ginaganiana, Jisas mwa lai laha. Mwa bevea be, “Laha geki kea damean gara be nu masiri gin dagan mateanaḡu. Giv laia i giv mwinua i giv binihi raduiau.”

²⁶ Vataha mahavana be gim ḡan bereti i gim mwin wai nin laha geki kea gim bev seserai mateanan varahuda vaivotu be vi mai mulei.

²⁷ Ihei be mwa ḡan ginau sage mwa mwin wai lol lahan rahuana non Ratahigi be mwa lolia la hal hantai vi vevegiana huribe mwa buroga vai alun rebehin i dagan nonda Ratahigi.

²⁸ Gov gitagita mulei irubwimwa amua gom siv gan bereti i amua gom siv mwinmwinu nin laha,

²⁹ huribe ihei be mwa ḡan ginau sage mwa mwinmwin wai lol laha gea be mwa hav gita te batoia kea mwa lai silo vevegi aluna sibona.

³⁰ Kea haḡea huri hano kera ivusi lol nom tatan̄ana ram haro, ram mandamanda i ram mate.

³¹ Take be tav vevegi gida la hal vavtutu, God sihav vevegi te gida.

³² Take lol taro be God mwa bevegi gida, mwa lol ḡagaras gida huribe si hav lol te kaburai gida mai ureure.

³³ Ira tuaku, lol taro be gim mai utegaituvwa be gimen gan ginau, giv hohov ira tuamiu.

³⁴ Ihei be maro mwa gasia vi gan ginau lol imwana huribe lol taron togoan bulbulu gosav lai te silo vevegi non God alumwa sibomwa. Nai vevea huri hano be giv lolia lol taro be nav mai mulei.