1 Korin 10 - Hano Niu Testamen

Avoan Wasi huri Nun Vatu

¹ Ira tuaku, nam doronbe giv iloe huri havanau be nu loli lalai ira varada lol taron Moses. Ran lago aten dodo i ran van sivi Tahi Memea.

² Ran garuhisabuga n̄oto kun gabe atat non Moses lol dodo i lol tahi.

³ Ram ḡan ginaganianan sabuga duluai,

⁴ i ram mwin wain sabuga. Ram mwin wai sabuga nin vatu be mwa hurira, i vatu gea Kraes sibona.

⁵ Take God mwa hav ron̄ te mwandavuha ginira ivusi, i ram mate lol vanua vuroi.

⁶ I ginau kerageki ram loli kun gabe malele lalai gida, be men tuḡoro gida be tasav doron te ginau daltale kunia be kera gea ram doronia.

⁷ Gisav gogonai te nun vatu, kunia be kera rituai ram lolia. Kunia be mwa ravana lol avoan sabuga be; “Ram dogo mahuri be ramen gan ginau ba mwinmwinu, i ram domare ram buroga la halan ginaganiana.”

⁸ Tasav hurira tehe lol vuro taltale geki, kunia be kera vasan̄vul varua vena gaitolu ram mate gin vurora.

⁹ Tasav haḡo te ron̄ Ratahigi kun gabe kera rituai ram lolia; ira teltele ram wehira.

¹⁰ Gisav rurun̄utu tehe kunira rituai be rurun̄utu, bwatuna ira enjel be ram lol kaburai ginau ram wehira.

¹¹ Ginau kera geki be mwa loli lalainira geki take ram bora malele. Ram ravae huribe rai vagahi gida, huribe tam dogo lol taro be ginau ata lol ureure duluai ram bavora ram binogonogo.

¹² Be gom binibe gon wasi, gov gitaḡoro be gosav hovi tehe.

¹³ Kalkalianan vuro n̄ano be mwa mai lalai kimiu kea haḡea be mwa mai lalai gida duluai. Take gov butu dum alun God, be si hav mahin̄ainigo tehe be gov hovi liua be si loli. Take lol taro be gov hovi lol kalkalianan vuro, kea mulei vi lai hala lalainigo i muramura be gov tu wasigi i dagai ninia.

¹⁴ Ira tuaku, giv tu dagai nin gogonaianan ira nun vatu.

¹⁵ Nam avo lalai kimiu kun gabe ira atat iloute, gov harae sibomwa huri havanau be nam bevea.

¹⁶ Tam lai avoan avkari huri lahan rahuana lol ganisabuga, be tam bulu alun dagan Kraes. I ginaganiana be tam biha borae kea tam bulu alun rebehin Kraes.

¹⁷ Huribe bereti gaituvwa n̄ano, gida tam bora rebehi gaituvwa, huribe tam bul gaituvwa lol bereti gaituvwa.

¹⁸ Gov vinihia huri ira varan Israel. Kera be ram gan ginaganian sabuga ram bulu aluna la batan tataroi non God.

¹⁹ Nam hav vevea te gin binihiva be ginaganiana be mwa laiana lalai nun vatu ginau vwate n̄ano.

²⁰ Sigai! Take nam bevea be hano be mwa laiana lalai nun vatu kea mwa bano lalai ira atmate, vorate lalai God. I nam hav doron tehe be giv hara ginau vwate mai ira atmate.

²¹ Gosav mwin te dum wai nin laha non God i laha non atmate mulei. Gosav harahara te dum la batan ginaganiana non God i non atmate mulei.

²² Gom lol ron̄oe be gomen lol God men lolhoro? Tam binibe tan wasi liu God?

Gov haḡo non Mwasigi kun gabe Atat Binihimwasigi.

²³ Atatu rituai ram bevea be, “Gida tav lol dum ginau n̄oto,” take ginau n̄oto nu hav tavuha tehe huri gida be tav lolia. Ram bevea be, “Tav lol dum ginau n̄oto,” take ginau n̄oto ram hav bului te kera dodolua be rav tu wasi.

²⁴ Gosav lol te ginau hurigo sibomwa take huri atat dodolua mulei.

²⁵ Gov gan bigi n̄oto be mwa saleiana lol tanon volvoli. Gosav hudali te avoan hudaligi gin binihimwa.

²⁶ Avoan Sabuga mwa bevea be, “ureure geki kea non God i ginau duluai alolona.”

²⁷ Kera gabe ram hav vorate atat binihimwasigi rav doronigo be gov gan ginau maira. Be gov togo maira gov gan ginau duluai be ram laia. Gosav lai te avoan hudaligi kebe gom binibe nu hantai be gov gania.

²⁸ Take kea n̄ano be atat vwate vi vevea lalainigo be “ginaganiana gea ran laia lalai nun vatu,” gosav gania tehe. Gosav gania tehe huribe wani gea mwa bevea lalainigo huribe gov gania kadogaha binihivanana vi vahala.

²⁹ Nam hav vevea be gosav gania tehe hurin binihimwa sibomwa, take huribe binihin atat dolua be nu mandamanda. Take be atatu dolua vwate mwa hudalinigo be,

³⁰ “Kun hanigi? Inau nav gan dum ginau, matuke huri hano na sav gan te ginau la binihin atat dolua? Be nam lai avoan avkari huri ginaganiana gea, huri hano ram bev ariariau huribe nan lai avoan avkari huria lalai God?”

³¹ Mwasigi n̄ano be, gom ḡan ginau, sage gom lol hano tehe, gom lolia duluai huri sarisari non God.

³² Gosav lol te ginau be vi lol atat dolua vi ron̄ mwahantai, vara ira Jius, sage ira Lolobon̄i, sage uloilua non God.

³³ Gov lolia kunia n̄ano be nam lolia. Kunia be inau nam doron be nav lol doroniva non atatu duluai la hala n̄oto. Nam hav lol te ginau be nu vavtutu huriau take ginau be nu vavtutu huri atatu duluai be rav rahu.