1 Korin 1 - Hano Niu Testamen

Avoan Helheloi mai Tataro non Pol

¹ Nin Pol, be God mwa uloinia huri non doroniva be vi vora hala non Kraes Jisas, i mulei nin tuada Sostenes.

² Lalai uloilua non God Korin, i lalai kimiu duluai be gin togo sabuga lol Kraes Jisas, nu uloi kimiu be giv vora atat sabuga non God, mai sinombu duluai be ram dataro lol ihan Ratahigi Jisas Kraes, nora God i nonda.

³ Nam dataro be hogoi i tamwata lalai kimiu, non God tamanda i Ratahigi Jisas Kraes.

Pol mwa Avkari God

⁴ Nam avkari God huri kimiu bwatun hogoi be God nu laia lalai kimiu sivi Kraes Jisas.

⁵ Lol Kraes nu lol kimiu gim rosoga la hala duluai, lol nomiu avoana i nomiu mataisao.

⁶ Roroi Tavuha huri Ratahigi Jisas Kraes kea mwa mai gi ginau wasi huba alolomiu.

⁷ Lol taro be gim dogo hohov Jisas Kraes be vi mai mulei, gin lai vatavuha n̄oton̄oto.

⁸ Jisas Kraes vi haḡo wasi kimiu lol binihimwasigi vai votu nogonana, huribe giv melmelo lol taron non Gubwen̄i.

⁹ God kea atatu be tav binihimwasiginia, i mwa ḡita lua kimiu be giv togo bulgaituvwa mai nituna Jisas Kraes nonda Ratahigi.

Harabora lol Uloilua

¹⁰ Ira tuaku, inau hala non Jisas Kraes, nam navohi kimiu be giv bulgaituvwa huribe harabora vi sigai lol davolamiu. Giv bulgaituvwa mai binihiv gaituvwa lol binihimiu mai alen̄amiu.

¹¹ Atatu rituai nin varan Kloe ram seserainia lalaiau be gim bigaigai ḡaoḡao gingin kimiu.

¹² Namen lol melmeloi nia be rituai alolomiu ram bevea be, “Inau nam huri Pol”; vwate mwa bevea be, “Inau nam huri Apolos”; i vwate mwa bevea be, “Inau nam huri Kraes.”

¹³ Harabora abena lol Kraes? Ram boha bolvoloau la volovolo huri kimiu? Gim ḡaruhisabuga lol ihaku?

¹⁴ Nam avkari God huribe nan hav garuhi te sabugai atatu vwate alolomiu take Krispas n̄ano mai Kaias.

¹⁵ Huri be kadogaha atatu vwate alolomiu sihav vev te dumwia be giḡo gon garuhisabuga lol ihaku.

¹⁶ Inau mulei nan garuhisabugainira ata la varan Stivanas, take nam hav vinihi te dumwia be nan garuhisabugai ihei te mulei.

¹⁷ Kraes nu hav horau tehe be namen garuhisabugai sinombu take huri be nav toretore huri Roroi Tavuha, be avoana lol mataisao non atatu sihav en te alolona huria be muramura alolon volovolo non Kraes sihav sala tehe.

Kraes kea Mataisao i Muramura non God

¹⁸ Silo vagahi huri volovolo kea mwa bora bwaḡele lalainira gabe ran sala, take lalai gida be tam rahu lol binihimwasigi, kea muramura non God.

¹⁹ God mwa bevea lol ravrava sabuga be, “Nav lol kaburai mataisao non ira atat mataisaoga i nav lol binihin atatu be ram sasagerega rav vilen̄alen̄a lol binbinihi.”

²⁰ Atat mataisaoga geki behe? Atat iloute kehibehe? Gaivamaten avoana ata lol ureure kehibehe? God nu lol mataisao ata lol ureure be rav bwaḡelega.

²¹ Alolon mataisao non God ureure mwa hav ilo te God sivi non mataisao sibona. Haḡe kunia God mwa ḡita luae be vi varahu atatu n̄ano be ram binihihimwasigi toretore bwaḡelega be tam doretore aluna.

²² Kera ira Jius ram hudaligi huri ginau dan̄an̄a, i kera ira Krik ram hudaligi huri mataisao.

²³ Take gam doretore alun Kraes be nu voha bolvoloe. I geki mwa bora ginau vahala be gaivua lalai ira Jius, i ira Lolobon̄i ivusi ram binihia be ginau bwaḡelega.

²⁴ Take lalainira sinombu be God nu uloi luara, ira Jius mai ira ata Krik, Kraes kea muramura non God i mataisao non God.

²⁵ Bwaḡele non God nu mataisaoga nin mataisao non atatu, i rahuan mandamanda non God kea nu muramuraga nin muramura non atatu.

²⁶ Ira tuaku mai ira hogosiku, giv vinihi dumwia be gin togo kun hanigi lol taro be God mwa uloi lua kimiu. Alun gitava non atatu, kimiu rituai n̄ano be gin muramuraga, i nu hav vora te kimiu ivusi be gin mwalue nin varan ira lavoa.

²⁷ Take God nu gita lua ginau bwaḡelega ata lol ureure be men lol busbusi ira mataisao. I mwa ḡita lua ginau mandamanda ata lol ureure be men lol busbusi ira muramura.

²⁸ Hano be ureure mwa ḡita bahivoinia i mwa binihia be kea ginau vuroi n̄ano kea havanau be God nu haḡoe be vi lol kaburaiana i havanau be ureure mwa binihia be kea raumatana.

²⁹ God mwa lolia kungeki huria be atatu vwate sihav sagea te sibona la lolmatana.

³⁰ Take God nu haḡo bul kimiu alolon Kraes Jisas, i God nu lol Kraes be vi vora nonda mataisao. Sivi Kraes haḡea mwa dau bavtutui mulei gida lol God i mwa lol gida tam bora atat mataisaoga, i mwa ḡita batoi gida i mwa lol sabugai gida.

³¹ Kunia be ravrava sabuga mwa bevea be, “Be atatu vwate mwa doron be vi sasagerega, mwa du be vi sasagerega n̄an huri ihan Ratahigi.”