1 Jon 5 - Hano Niu Testamen

Gam Muramura nin Ureure

¹ Be tas vinihi mwasigi be Jisas kea Kraes mwasigi, gida ira nitun God. Bwatuna be ira hei be ram dabe Tata, ram dabe Nitui mulei.

² Tam ilo haninia be tam dabe ira nitun God? Tam iloe mahavana be tam dabe non leohorai.

³ Tam seserai nonda lolotabetabe huri God la hala gabe tam dabe non leohorai. I ran hav ririhai tehe be tamen huria.

⁴ Ira nitun God duluai ram muramura nin kalkaliana, i nonda binihimwasigi garagusi haḡea be mwa lai muramura geki lalai gida.

⁵ Ihei haḡea nu muramuraga liu ureure? Irahei n̄ano gabe ram binihimwasigi be Jisas Kraes kea Nitun God.

Mwasin Vevurin Jisas Kraes

⁶ Jisas Kraes haḡea atatu gabe nu mai mai wain garuhisabuga i dagan mateanana. Take nu hav mai te n̄an mai wai, take wai i daga. Vui sibona mwa bev seserai ginau geki be mwasigi bwatuna be Vui kea mwasigi.

⁷ Ginau gaitolu be ram lol seserainia,

⁸ Ginau gaitolu kera geki Vui, wai, i daga, i ginau gaitolu kera geki ram bulu n̄an ute gaituvwa.

⁹ Tam binihimwasigi havanau gabe sinombu ram bevea lalai gida, kunia tav vinihi mwasigi havanau be God mwa bevea lalai gida liu nin hano be sinombu ram bevea. God mwa bevea lalai gida be kea mwa avo lalai gida sivi Nituna.

¹⁰ Be gida tav tau nonda binihimwasigi alun Nitun God. Geki gin binihiva be tam binihimwasigi alun havanau gabe God nu vevea alun Nituna, kea gin binihiva be gida tam bevea be God kea tenteneana.

¹¹ God mwa bev serae lalai gida gabe mwa lai rahuana vai tuai. Rahuana geki mwa mai lalai gida sivi Nituna.

¹² Be Nitun God mai Gida tav lai rahuana take, be tasav lai te Nitun God mai gida, tasav lai te rahuana vai tuai.

Rahuana be Mosmosianana Sigai

¹³ Kimiu duluai gim dau nomiu binihimwasigi alun nitun God, i nam ravrava lalai kimiu be gimen iloe be giv haḡo rahuana vai tuai.

¹⁴ Mahavana be tam dataro, tav tataro lalai God gin binihiv wasi. Tam iloe be God vi vwaliu nonda tataro mahavana be tam hudaligi huri ginau be God mwa samsamwara ginia.

¹⁵ Tam iloe be God mwa ron̄ gida vataha mahavana be tam dataro, bwatuna haḡe gea tam iloe be God mwa samsamwara huri nonda tataro.

¹⁶ Be gis gita tuada vwate be mwa buroga la hala gabe nu hantai. Giv tataro dumwi, i wani gea vi lai dum rahuana vai tuai.

¹⁷ Ginau duluai be nu vahala kea bwatigoro, take mwa hav vora te vuro duluai huri mateana vai tuai.

¹⁸ Gida tam iloe be mwa hav vora te ira nitun God gabe ram buroga tagaro. Mwasin nitun God mwa du ḡorora, i setan sihav lol te dumwira.

¹⁹ Tam iloe be tam mai nin God i ureure duluai, i ureure duluai mwa dogo halaten muramura non ivwalu.

²⁰ Tam iloe be Jisas Kraes nitun God nu mai, i nu vagahi gida gin mwasin God, i Jisas Kraes haḡea bwatuna be kadogaha tam bora bilan mwasin God gabe mwa lai rahuana vai tuai.

²¹ Ira nituku, giv tu dagai nin ira tagaro tentene.