ZEPHANIA 3 - Pathien Lekhabu Inthieng (BSI)

Jerusalem suolna le intlansuokna

¹ Khawpui nêksâwra um, sukpawr- chea um le hela um chu a chung a va rik de!

² Ama chun râwl chu a pawisa naw a, sukdikna chu a pawm naw a, Lalpa khawm chu a ring naw a; a Pathien khawm chu a hung hnai bawk naw a.

³ A sûnga chun a mi ṭhahai chu sakeibaknei inrûm lai ang an na; a rorêltuhai chu zâna sihalhai ang an nih; a zînga chen dingin iengkhawm an hla naw a nih.

⁴ A zâwlneihai khawm chu mi ngaisam le mi khawhlo an na, a thiempuhai hlak chun hmun inthieng chu an sukpawrche ta a, dâna chun inpâwngnêkna chu an hmang ta a nih.

⁵ Ama sûnga chun Lalpa chu mi indik a na; rîtlona chu thaw naw ni; zîng tinin a rorêlna chu varah a hung lâk suok a, a thlâwn ngai hrim hrim naw a; amiruokchu, mi fel naw chun inzakna a hriet naw a nih.

⁶ Hnamhai chu ka sât thlâk a, an in insânghai chen khawm chu râusanin a um ta a; an kawtthlêrhai chu ka suksiet vawng a, tukhawma an hraw ta naw a; an khawpuihai chu suksietin a um a, chuongchun, mi an um ta naw a, a hluotu khawm an um ta nawh.

⁷ Ama chungthua ka lo ruot ta ang po poin, a chêngna chu sâtthlâk a ni nawna dingin. “Matheilovin kei mi ṭîng i ta, sukdikna chu hmu bawk i tih,” ka ta; nisienlakhawm, zîngkâr an tho a, an thilthawhai po poa chun an sukdik naw a.

⁸ Lalpa chun, “Chuleichun, kei mi nghâk unla, râllâk la dinga ka ngirsuok ni chen chu. Ka lungawinawna ṭium tak le ka lunginsenna nasatak chu bun khum dinga, ramhai ka kei khâwmnaah chun hnamhai ṭhuoi khâwm chu ka thiltum a ni si a; leihnuoi hluo po po chu ka îtthîkna mei chun a kânghmang ding a ni si a.

⁹ Chun, chutaka inthawk chun hmûr inthieng put chihai kuoma chun kîr nâwk ka ta, lungril hmunkhata a rawng bâwl dinga Lalpa hming chu an rênga an lam theina dingin.

¹⁰ Ethiopia vadunghai khêla inthawk chun ka riminhnik râwtuhai, ka hnawtdarhai naunuhmeihai ngei chun, ka thil inhlânhai chu hung chawi an ta.

¹¹ Chu nia chun i thil thawhai po po, ka chunga i bawsietnahai lei chun inzak ta naw ti ni a; nanga sûnga inthawkin nasataka nang chapopuituhai che chu ka lâk suok ding a ni ta si a; chuongchun, ka tlâng inthienga chun chapo ta ngai hrim hrim naw ti nih.

¹² Amiruokchu, i sûnga chun mi pasiehai le mî sukrimsika umhai chu mâksan ka ta, Lalpa hming chu ring tâng an tih.

¹³ Israel mi hlabîkhai chun rîtlona thaw ta naw ni hai a, khêl khawm hril ta ngai naw nihai; an bauhaia chun lei mi hlêm hmangna hrim hrim khawm hmu ni ngai ta naw nih; khawp dingin fâng an ta, zâl an tih, tukhawma an sukṭi ta naw ding a ni si a,” a ta.

Lâwmna Hla

¹⁴ Aw Zion naunuhai, hla sak ro; aw Israel, khêk suok rawh; Aw Jerusalem naunu, lungril po poin hlimin lâwm rawh.

¹⁵ Lalpa chun i chungthu rêlna chu a lâk hmang ta a, I hmêlma khawm chu a hnawt dawk tah a nih; Israel Lal, Lalpa ngei chu nangmaa chun a um a, Thil ṭha naw hril ṭi ta dêr naw ti nih.

¹⁶ Chu ni chun Jerusalem kuoma chun, “Ṭi ta naw rawh: Aw Zion, i kut chu inzawitir naw rawh.

¹⁷ Lalpa i Pathien thilthawtheitak, sandamtu ding chu i sûnga chun a um a; Nang chu hlimnain lâwm a ti che a, a hmangainaa chun châwl a ta, Hla sakin nangmaa chun hlim a tih.

¹⁸ Nangma ta, sie hmanga um tahai, hrilsietna riktaka phurtuhai chu inkhâwmna ursûntaka dingin kei khâwm ka tih.

¹⁹ Ngai ta, chu pha chun nangma sukrimsituhai che chu keiin sawisâng ka ta: A ngîr chu sandam ka ta, hnawt hmanga um chu kei khâwm ka tih; Hnuoi chung po poa an hmaimâwkna lo um ta chu, Hming le inpâkna siempêk ka tih.

²⁰ Chu pha chun hung la lût kati che a, chu pha chun la khâwm ka ti cheu; In mithmu ngeia in sal intângna ka hung lâk kîr pha chun, Leihnuoia hnam po polaia chun, inpâkna le hming ka siempêk ding cheu a ni si a,” Lalpa chun a tih.