ZEKARIA 9 - Pathien Lekhabu Inthieng (BSI)

A kâwlvêla hnamhai chunga rorêlna

¹ Hadrak ram chunga Lalpa thu phurrik chu, Damaska chu ân nghatna hmun nîng a tih; mihriem le Israel hnam po po mit chu Lalpa tieng a ngha ta si a;

² Hamath inripuitu chu ni bawk a ta; Tura le Sidon khawm, var hle hai sienkhawm.

³ Tura chun kul dettakhai a ta dingin a bâwl a, tangka chu pilvut ang el le rângkachak inthieng chu khawlai chirhak ang elin a siekhâwl a.

⁴ Ngai ta, ama chu Lalpa chun hnawt suok a ta, tuipuia chun a thilthawtheina chu suksieng a tih, chun, meia kâng hmangin um a tih.

⁵ Askelon chun hmûng a ta, ṭîng a tih; Gaza khawmin hmûng a ta, nasataka suknatin um a tih; chun, Ekron khawm, a beiseina chu a thlâwn ding a ni si a; Gazaa inthawk chun lal chu bohmang a ta; Askelon khawm chu hluo ni ta naw ni.

⁶ Asdoda chun hnam inthlapawl chu chêng an ta; Philistin mihai chapona chu sât thlâng ka tih.

⁷ A thisen chu a baua inthawkin le a tirdakumna chu a hahai kâra inthawkin la hmang ka ta; ama khawm chu ei Pathien ta dinga a la um sun hung nîng a tih; Judaa chun lal hung nîng a ta, Ekron mihai chu Jebus mi ang hung nîng an tih.

⁸ Chun, sipai râl vêng pâwl angin ka in vêla chun umnghâng ka ta, tukhawm fe thlengin kîr naw ni hai a; nêksâwrtuhai khawm fe thleng nâwk ta ngai hrim hrim naw ni hai, tuhin keia mit ngeiin ka hmu ta si a.

Ziona lal hung tlung ding

⁹ Aw Zion naunu, nasatakin hlim rawh; aw Jerusalem naunu, inringtakin khêk suok rawh; en ta, i Lal chu i kuomah a hung ta hi; ama chu mi indik a nih, sandamna neiin inngaitlâwmtakin, sabengtung chungah, sabengtungtê chung ngeia hung chuongin.

¹⁰ Ephraima inthawkin tawlailîr chu sât thlâng ka ta, sakawr chu Jerusalema inthawkin; chun, indona thalngul chu sât thliek ni tâng a tih; chun, ama chun hnamhai kuoma chun inremna thu hril a ta; a ramawp chu tuipuia inthawka tuipui chen, Vadungpuia inthawka leihnuoi tâwp chen nîng a tih.

Zion tungding nâwk ding thu

¹¹ Chun, nanga chungthua chun, i thuthlung thisen leiin i sal intânghai chu khur sûng tui um nawnaa inthawk chun ka tir suok ta a.

¹² Nangni beiseina lungin intânghai, kul ngheta chun hung kîr nâwk ro; a lêt hniin ka pêk ding cheu a nih ti vawisûn ngei hin ka phuong hi.

¹³ Ka thalngul dingin Juda chu ka kuoi a, Ephraim chu a thalah ka siem a; Aw Zion, i naupasalhai chu i naupasalhai chunga ngei chun ka chawktho ding a nih; aw Grik, mi hrâttak kâwlhnâm angin siem ka ti che.

¹⁴ Lalpa chu anni chunga chun hmu nîng a ta, a thal chu kâwlinlep angin fe suok a tih; chun, Lalpa Pathien chun tawtawrâwt chu mût a ta, simtieng thlivir le chun fêng a tih.

¹⁵ Sipaihai Lalpa chun anni chu hliekhûng a ta; chun, fa zo an ta, vailungdêngin hnêng an ta; chun, dâwn an ta, uoin inrui angin risie siem an ta, mâichâm kilhai ang le thlêngkûmhai anga suksip nîng an tih.

¹⁶ Chu ni chun Lalpa an Pathien chun a mihai chu berâm ruol angin sandam a ta; a ram chunga nasataka varin, lallukhuma lunghlu zep ang chu an ni ding a ni si a.

¹⁷ A ṭhatna chu a va nasa lâwm lâwmin, a mawina chu a va nasa lâwm lâwm de aw! bu chun tlangvâlhai chu sukhlim a ta, uoin thar chun nunghâkhai chu sukhlim a tih.