ZEKARIA 6 - Pathien Lekhabu Inthieng (BSI)

Tawlailîr pali chu

¹ Chun, ka mithai ka hang inlên nâwk a, tlâng pahni inkâra sakawr tawlailîr pali hung suok hi ka hmu a, ka en zing a; chu tlânghai chu dârsen tlâng an nih.

² Tawlailîr pakhatnaa chun sakawr senhai an um a; tawlailîr pahninaa chun sakawr dumhai an um a;

³ tawlailîr pathumnaa chun sakawr vârhai an um a; tawlailîr palinaa chun sakawr rânghai an um a.

⁴ Chun, vântirko a mi betu chu ka dawn a, a kuomah, “Pu, hienghai hi ieng am an na?” ka ta.

⁵ Vântirko chun a mi dawn a, ka kuomah, “Hieng hi vân thlarau pali, leihnuoi po po Lalpa hmaa ngîr hlaka, fe suok hlakhai chu an nih.”

⁶ Tawlailîr sakawr dum ihnûk chu hmâr ram tieng a fe suok hlak a; a vâr ihnûk chun a zui a; chun, a râng ihnûk chu simtieng rama chun a fe suok a.

⁷ A senhai chu an fe suok a, hnuoi chung kil tin kil tanga an fe thei dân ding an zawng a; “Hitaka inthawkin suok unla hnuoi chung kil tin kil tangah fe ro,” a ta. Chuongchun, hnuoi chung kil tin kil tanga chun an fe ta a.

⁸ Chun, ka kuomah a hung khêk a, “Ngai ta, hmâr tieng rama fehai khan hmâr tieng rama chun ka lungril chu an suksâwldam tah,” a ta.

Thil inentirnaa Josua Lallukhum inkhumtira a um thu

⁹ Chun, Lalpa thu chu ka kuomah a hung tlung a,

¹⁰ “Heldai hai, Tobija hai, Jedaia hai, sala intânghaia inthawkin la la; chun, chu ni ma chun hung la, Babulona inthawka an hungna, Zephania naupa Josia ina chun fe rawh:

¹¹ anih, tangkaruo le rângkachak lapêk la, lukhum siem la, Jehozadak naupa thiempu lal Josua lua chun bel rawh;

¹² chun, a kuoma chun hril la, ‘Sipaihai Lalpa chun hieng ang hin a tih: Ngai ta, mi pakhat a hming chu Kau a nih; ama chu a hmuna inthawkin hung inṭhang a ta, Lalpa biekin chu hung bâwl a ta:

¹³ Lalpa biekin ngei chu hung bâwl a tih; ama chun ropuina chu khum a ta, a lalṭhungphaa ṭhungin ro rêl a tih; a lalṭhungpha chunga chun thiempu nîng a ta, an pahnia inkâra chun inremna thurêl chu um a tih,’ tiin.

¹⁴ Chun, lallukhum chu Heldai hai, Tobija hai, Jedaia hai le Zephania naupa Josia hai ta dinga, Lalpa biekina hriet zingna dingin nîng a tih.

¹⁵ Chun, ram hlataka umhai khawm chu hung an ta, Lalpa biekin chu hung bâwl an ta; chun, sipaihai Lalpa chun in kuomah a mi hung tir a nih ti hre tâng in tih. Hieng thilhai hi la hung tlung ngei a tih, Lalpa in Pathien râwl chu nguntaka in zui phawt chun,” tiin.