ZEKARIA 5 - Pathien Lekhabu Inthieng (BSI)

Lekha zuol vuong lai hmu thu

¹ Chun, ka mithai chu ka hang inlên nâwk a, lekha zuol vuong lai ka hmu a, ka en zing a. Chun, ama chun ka kuomah, “Ieng am i hmu a?” a ta.

² Keiin, “Lekhabu zuol vuong lai ka hmu a; a dungtieng chu tawng sâwmhni a na, a khangtieng chu tawng sâwm a nih,” tiin ka dawn a.

³ Chun, ka kuoma chun, “Hi hi ṭawngsie ram pumpui chunga fe suok hlak chu a nih, tukhawm inru taphawt chu phêk khingkhata ziek anga pei thlâk nîng a ta, tukhawm inkhâm taphawt chu phêk khingtienga ziek anga pei thlâk a ni ding a ni si a,” a ta.

⁴ Chun, sipaihai Lalpa chun, “Infe suoktir ka ta, inru ina chun lût a ta, ka hminga khêla inkhâmtu ina le chun: chuongchun, a in sûnga chun chêng a ta, chun, chutaka a lunghai le a thinghai le chun kâng hmang a tih,” a ta.

Bâwm sûnga nuhmei chu

⁵ Chun, vântirko a mi betu chu a fe suok a, ka kuomah, “Tuhin i mit hang inlên la, hi a fe suok hi ieng am a na en ta,” a ta.

⁶ Kei chun, “Ieng am a na?” ka ta. Ama chun, “Hi hi bâwm a fe suok chu a nih,” a ta. “Hi hi ram po poa an khawhlona chu a nih,” a ti bawk a.

⁷ Ngai ta, a sînna talent khata rik suon chu hawng a ni a, chun, nuhmei bâwm sûnga ṭhung hi a um a.

⁸ Chun, “Hi hi Khawhlona a nih,” a ta; bâwm sûnga chun a nam lût nâwk a; a bau chu suon riktak chun a sîn nâwk a.

⁹ Chun, ka mithai ka hang inlên a, nuhmei pahni hung suok hi ka hmu a, ka en zing a, an thlahaia chun thli hi a um a; anni chun vakâwl thlahai ang hi thla an nei a; chun, vân le hnuoi inkâra chun bâwm chu an khai a.

¹⁰ Chun, vântirko a mi betu kuoma chun, “Hienghai hin bâwm hi khâwtieng am an fepui ding a na?” ka ta.

¹¹ Ama chun, “Sinar rama a in bâwlpêk dingin, bâwl zo a ni pha chun chutaka chun bâwm chu ama inṭhutna ngeia chun sie nîng a tih,” a ti a.