ZEKARIA 4 - Pathien Lekhabu Inthieng (BSI)

Khâwnvar siena le Oliv thinghai chu

¹ Chun, vântirko a mi betu chu a hung nâwk a, mi a in lai sukhar angin a mi hung sukhar ta a.

² Ka kuoma chun, “Ieng am i hmu a?” a ta. Kei chun, “Rângkachak sathâu khâwnvar siena, a sîpa a thlêng le, chu chunga khâwnvar pasari um, khâwnvar tin chunga a dâwt pasari seng um ka hmuh,

³ a sîrah oliv thing pahni: thlêng changtieng panga chun pakhat, a vawitieng panga chun pakhat dang leh,” ka ta.

⁴ Chun, vântirko a mi betu chu kân dawn a, “Pu, hieng hi ieng am an na?” tiin.

⁵ Chun, vântirko a mi betu chun ka kuomah, “Hieng hi ieng am an ni i hriet naw maw?” tiin a mi dawn a. Kei chun, “Aw pu, ka hriet nawh,” ka ta.

⁶ Ama chun ka kuomah, “Hi hi Zerubbabel kuoma Lalpa thu, ‘Sipaiin ni lovin, thilthawtheina khawma ni lovin, amiruokchu, ka thlarauin,’ tia sipaihai Lalpain a hril chu a nih,” a ta.

⁷ Aw tlâng lien, tu am i na? Zerubbabel hmaa chun phaizâwl hung ni el i tih, chun, ama chun a chungah, “Zângaina, zângaina,” ti khêkrihai leh lung chunghnungtak chu hung la suok a tih.

⁸ Chu naw khawm chu Lalpa thu ka kuomah a hung tlung a,

⁹ “Hi in lungphûm hi Zerubbabel kuthai chun a lo phûm ta a; a kuthai chun zo khawm zo ngei a tih; chun, nang chun sipaihai Lalpa chun a mi hung tir a nih ti hre tâng i tih.

¹⁰ Thil chînhai ni chu tuin am a hmusit hlak hrim a? Hlim an ta, Zerubbabel kuta chun enremna, hieng pasarihai ngei, chuong Lalpa mithai ngei chu an hmu ding a ni si a; anni chu khawvêl po po kil tin kil tanga chun an tlân vêl ta a,” tiin.

¹¹ Chun, keiin a kuomah, “Hieng oliv thing pahni sathâu khâwnvar siena sîr changtienga mi le vawitienga mi hi ieng am an ni a?” ka ta.

¹² A vawi hninaa khawm kân dawn nâwk a, a kuomah, “Rângkachak hriek hung suokna rângkachak dâwt pahni kâwla oliv kau pahnihai hi ieng am an ni a?” ka ta.

¹³ “Hieng hi ieng am an ni i hriet naw maw?” a ta, a mi dawn a. Kei chun, “Ka hriet nawh, ka lalpa” ka ta.

¹⁴ Chun, ama chun, “Hieng hi hrieknâl naupasal pahnihai chu an nih, leihnuoi po po Lalpa sîra ngîr hlakhai chu an nih,” a ta.