ZEKARIA 3 - Pathien Lekhabu Inthieng (BSI)

Zâwlneiin inlârnaa Thiempu lal Josua a hmu thu

¹ Chun, thiempu lal Josua Lalpa vântirko hmaa ngîr le, Setan chu a khingpui ni dinga a changtienga ngîr chu a mîn entir a.

² Lalpa chun Setan kuoma chun, “Aw Setan, Lalpa chun a kâwk che hi! Anih, Lalpa Jerusalem thlangtu chun a kâwk che a nih! hi hi meia inthawka a kâng lai lâk suok a ni naw am a nih?” a ta.

³ Chun, Josua chu silfên ṭawptakin ân thuom a, vântirko hmaa chun a ngîr ta a.

⁴ Vântirko chun, a hmaa ngîrhai kuoma chun, “Amaa inthawkin silfên ṭawptak kha la hmang ro,” a ta. Chun, ama kuoma khawm chun, “Ngai ta, i suolna chu nangmaa inthawkin kân fe hmangtir ta a, silfên man tamtakin kân thuom ding che a nih,” a ta.

⁵ Chun, keiin, “A lu chungah lukâwm mawitak inkâwmtir raw hai se,” ka ta. Chuongchun, a lua chun lukâwm mawitak chu an inkâwmtir a, ama chu silfênhai chun ân thuom a; chun, Lalpa vântirko chu a kâwla chun a ngîr zing a.

⁶ Chun, Lalpa vântirko chun Josua kuomah a hril a,

⁷ “Sipaihai Lalpa chun hieng ang hin a ti a nih, ka lampuihaiah i fe a, ka iphût chu i thaw bawk chun, ka insûng ro rêl i ta, ka in inhuonna tuollaihai chu vawng ṭha bawk i tih. Chun, hitaka ngirhai lai hin um ve theina pêng ka ti che.

⁸ Tuhin thiempu lal aw Josua, nang le i hmaa i rawihai ṭhung hlakhai le chun ngai ta u; inchikna dinga mihai an ni si a; ngai ta u, a Kau, ka siehlaw chu ka hung lâk suok ding a ni si a.

⁹ En ta u, Josua hmaa chun lung pakhat sîr sari nei ka sie a; ngai ta u, chutaka chun thil ziek ker ka ta, sipaihai Lalpa chun a tih, chun, ni khat sûngin chu ram suolna chu sawn hmang ka tih.

¹⁰ Chu nia chun, theichang kûng le grêphrui hnuoia chun nangni mi tin chun mâni tuolbâwmhai chu ko tâng in tih,” sipaihai Lalpa chun a tih.