ZEKARIA 13 - Pathien Lekhabu Inthieng (BSI)

¹ “Chu ni chun inthieng nawna le suolnaa dingin, David sûngkuo le Jerusalema chêngtuhai ta dingin tuikhur hawngpêk nîng a tih,”

² Sipaihai Lalpa chun a tih, “Chu nia chun hieng hi hung nîng a tih: rama inthawk hin milimhai hming chu pei thlâng ka ta, hriet zing ni ta naw ni hai; chun, zâwlneihai le thlarau inthieng nawhai chu hi rama inthawk hin infe hmangtir ka tih.

³ Chun, anni mi tukhawma an thu an la hrillâwk zing chun, an nu le pa anni neitu ngei chun, ‘Dam naw ti ni; Lalpa hmingin khêlthu i hril si a,’ tîng an tih; chuongchun, a thu hril lai le le chun a nu le pa ama neitu chun ama chu sunthleng an tih.

⁴ Chun, chuong ni chun hieng hi hung nîng a ta, thu a hrillâwk lai chun, zâwlnei po pohai, mi tin el chun mâni thilhmulâwk chu inzâpui an ta; hlêm dingin puon inhmul sil naw bawk an tih;

⁵ amiruokchu, ‘Zâwlnei ka ni naw a, hnuoi inlettu ka ni lem, ka tleirâwla inthawk tah siehlawa siem ka ni ta si a,’ tîng a tih.

⁶ Chun, a kuoma chun mi dangin, ‘Khâng i kut inkâra inpânhai kha ieng am an na?’ tîng a ta. Ama chun, ‘Hieng hi ka ruolhai ina ka hliemna chu an nih,’ tiin dawn a tih.

Lalpa berâmpu vuok thu

⁷ “Aw kâwlhnâm, ka berâmpu chunga le, mi ka ruolpâwl chunga chun har rawh,” sipaihai Lalpa chun a tih. “Berâmpu chu vaw la, berâmhai chu indar an tih; chun, a chînhai chunga chun kei khawma ka kut inlet ka tih,” tiin.

⁸ Lalpa chun, “Chu nia chun hieng hi hung nîng a ta, ram po poa chun, chutaka hmun hni chu sât thlâk nîng an ta, thîng an tih; chun, a hmun thumna chu hla nîng an tih.

⁹ Chun, a hmun thumna chu meiah infethlengtir ka ta, tangkaruo chu sukthieng a ni angin sukthieng ka ta, rângkachak chu fie a ni angin fieng ka tih: chun, ka hming lam an ta, kei khawma anni chu ngai tâng ka tih; ‘Ka mihai an nih,’ tîng ka ta; chun, anni khawma, ‘Lalpa chu ka Pathien a nih,’ mi tîng an tih,” a ta.