THUVARHAI 5 - Pathien Lekhabu Inthieng (BSI)

Inthieng nawna kai lo dinga inchûktirna

¹ Ka naupa, ka varna hi pawisa la, Ka hrietthiemna tieng hin i na sit rawh,

² Ngairuotthiemna chu i vawng tlat theia, I hmûrhai chun hrietna a kawl tlat theina dingin.

³ Hmêlmak nuhmei hmûrhai chu khuoizuin a far a, A bau chu hriek nêkin ân nâl lem si a.

⁴ A tâwptieng ruok chu sairam khâkin a kha a, Kâwlhnâm ngeituo angin a ngei a.

⁵ A kehai chu thinaah a fe thla a, A kalchawihai chun Seol a sir hlak.

⁶ Chuongchun, hringna lampui inphei chu a hmu ngai naw a, A lampuihai chu mumal neilo a na, ama chun a hriet nawh.

⁷ Chuleiin, tuhin ka naupasalhai, mi lo ngai unla, Ka baua thuhaia inthawk hin fe hmang naw ro.

⁸ Amanua inthawk chun in lampui chu hlataka sawn unla, A in kawtkhâr hnaia khawm fe naw ro.

⁹ Mi danghai kuomah in inzaumna chu pe hlau in ta, Mi bengtlalo kuoma chun in kumhai chu pe hlau rawi in tih.

¹⁰ Hmêlmakhai chu in hrâtnaa suksipin um an ta, In sininrimnahai chu hmêlmakhai inah ni hlau rawi a tih.

¹¹ In hun tâwp tieng chun inrûm in ta, In taksa le in tisa chu hmangzo a ni pha chun.

¹² Chun, “Iengtiziea inchûktirna kha ka lo theida a, Ka lungrilin kâwkna kha a lo ngainêp am a ni aw!

¹³ Ka inchûktirtuhai râwl khawm ka awi ngai naw a, Kei a mîn chûktirtuhai tienga khawm ka na khawm ka sit ngai naw a:

¹⁴ Siet let dêrna ka lo tlung ṭêp an nâwm ie, Inkhâwmpui pâwlpui laia chun,” ti rawi i tih.

¹⁵ I tuibêl ngeia tui le, I tuisunsuo ngeia tui luong chu dâwn rawh.

¹⁶ I tuihnârhai chu inluongdartira umin, Khawlaidungahai chun vadungpui tui chu ân dar el ding maw?

¹⁷ Nangma ta bîk chau ni sienla, I kuoma hmêlmak mihai ta ding ni lovin,

¹⁸ I tuikhur chu malsâwmin um sienla, I tleirâwl lai nuhmeia chun hlim rawh.

¹⁹ Sazukpui ditumtak le sakhipui inhawititak angin, Ienglai khawmin a nenêhai chun suktlai rawp sienla che; A hmangainaa chun nang chu thafân rawp hlak rawh.

²⁰ Chuongchun, nang ka naupa, iengdingin am hmêlmak nuhmeia chun thafân i ta, Iengdingin am hmêlmak âng chu pawm i ta?

²¹ Mihriem lampuihai chu Lalpa mithai hmaah a um si a, Ama chun a lampuihai po po chu a siemruol hlak.

²² Mi khawhlo chu ama khawhlona ngei chun lâng a ta, A suolna hruihai chun ama khit tlat nîng a tih.

²³ Inchûktirna tlasamin thîng a ta; Ân vêtna nasat lei chun ama chu invâkhmang a tih.