THUVARHAI 30 - Pathien Lekhabu Inthieng (BSI)

Agur thlîrnahai chu

¹ Jake naupa Agur thuhai chu: thuvar chu. Mi chun Ithiel kuomah a hril a, Ithiel le Ukal kuoma chun: “Aw Pathien, kei le kei kân nghawk a,

² Mi dang hrim hrim nêkin ka ngawng bîk a ni ngei âwm, Mihriem hrietthiemna khawm hi ka nei nawh.

³ Chun, varna khawm chu kân chûk naw a, Mi Inthieng hrietna khawm chu ka nei bawk nawh.

⁴ Tu am vâna chun a hang lâwnin a hung ṭum leh? Tuin am a kuttum sûngah thli chu a siekhâwl hlak a? Tuin am a silfênin tuihai chu a ting hlak a? Tuin am hnuoi kil tâwphai po po chu a tungding a? A hming ieng am a na, a naupa hming khawm ieng am a na, i hriet am?”

⁵ Pathien thu tin chu sukthiengin a um a, Ama ringtuhai ta ding chun ama chu phaw a nih.

⁶ A thuhai chu nang chun belsa naw la, Kâwk rawi a ti che a, khêlinhlip i nih ti hmu suok ni rawi a tih.

⁷ Thil pahni ka hni che a, Ka thi hma hin mi hung inphatpêk tâwl naw rawh.

⁸ Keimaa inthawka hlatakah teplo nina le khêlhlipna hi sawnhmang la, Hausakna amanih, pasietna amani khawm mi pe naw rawh; Keia ta dinga pawimaw bu chun mi châwm lem rawh.

⁹ Ka hung tlai hin inphat ka ti che a “Lalpa chu tu am a na?” ti hlau rawi ka tih, Annawleh, ka hung pasiet hin inru rawi ka ta, Ka Pathien hming hi hrilsietnain hmang rawi ka tih.

¹⁰ Siehlaw chu a hotu kuoma chun hrilse naw la, Ṭawngsie inphur a ti che a, thiemnaw chang hlau rawi i tih.

¹¹ Thla pakhat an thlatuhai hrilse hlak chu an um a, An nuhai khawm chu mal an sâwm bawk nawh.

¹² Thla pakhat anni mithmua inthieng chu an um a, Anni chu an tirdakumnaa inthawka lân sâwpfai lo an nih.

¹³ Thla pakhat an um a, aw an mithai chu a vân sâng ngei de! An mit vunhai chu a tungin ân hlîm a.

¹⁴ Thla pakhat an hahai kâwlhnâm ang le, an ha hnuoihai chemtêhai ang el chu an um a, Mihriem laia mi tlasamhai le hnuoia inthawka mi pasiehai chu fa zo ding elin.

¹⁵ Lît chun naunuhmei pahni “Mi pe, mi pe” tia khêk khêkhai chu a nei a, Thil pathum khawptâwk ngai hrim hrim lo chu an um a, Anih, pali “A huntâwk” ti ngailohai chu an um a.

¹⁶ Thlân le, sul ching chu: Hnuoi, tuia tlai zo ngai lo, Chun, mei “A huntâwk,” ti ngai der lo chu.

¹⁷ Mit a pa hmusittu le, A nu thu awi dinga ngainêptu mit chu, Phairuom vaâkhai chun kheldawk an ta; Mulukawlhai chun fâng an tih.

¹⁸ Keia ta dinga thil mak taluo pathum an um a, Anih, pali ka hriet lohai chu;

¹⁹ Boruoka muvânlai lampui chu; Lungpui chunga rûlpui lampui chu; Tuisuoriet laia lawng lampui chu; Chun, pasal le nunghâk lampui le chun.

²⁰ Nuhmei uire lampui khawm chuong ang bawk chu a na, A fâk a, a hmûr chu a hrûk a, “Thil suol ka thaw nawh,” a ti nâwk a.

²¹ Leihnuoi hi thil pathum leiin ân thin hlak a, Chun, pali, a tuor zo naw chu a um a.

²² Siehlaw chu lal a hung ni pha chun; Mi invêt chu fâk dinga suksipa a um pha chun;

²³ Nuhmei hrângsie pasal a nei pha le chun; Chun, siehlawnu chu a pi rohluotu a hung ni le chun.

²⁴ Hnuoi chunga hin thil pali chite tehai chu an um a, Amiruokchu, nasatakin an var a;

²⁵ Phaivânghai hi a pâwlpui an ni ve a, hrât lotak, Nipui sûngin an bu an siekhawl.

²⁶ Zupui hi a ruol hrât lotak an na, Anachu, an inhai chu lungpuihaia chun an siem.

²⁷ Khâuṭhikṭhihai hin lal an nei naw a, Anachu, an rêngin a pâwlin an fe suok.

²⁸ Chawlru hi a kuthaia incheltâng el a na chu, Ama chu lal in ropuiahai chun a um hlak.

²⁹ Thil pathum an fenaa pângngai zing an um a, Anih, pali, fenaa danglam lo an um a.

³⁰ Sakeibaknei, ramsa po po laia thilthawtheitak chu, Thil ieng ding khawmin a pêt ngai naw a,

³¹ Uithiem; Sakêl khawm; Chun, lal a sipaihai le um chu.

³² Nangma chu în chawisânga invêttaka i thaw chun, Annawleh, thil suol dâm chu i ngaituo chun; I kut chun i bau hip rawh.

³³ Bâwng nenetui sâwr chun bâwng nene thau a hung lâk suok a, Chun, hnâr hmet chun thisen a hung lâk suok a; Chuongchun, lunginsenna suktho chun inkhingna a hung lâk suok.