THUVARHAI 3 - Pathien Lekhabu Inthieng (BSI)

Thuâwi dinga infuina

¹ Ka naupa, ka inchûktirna hi theinghil naw la, Ka thupêkhai hi i lungrilin vawng tlat lem raw se:

² Nihai seina le dam sûng kumhai, Thlamuongna leh an belsa ding che a ni si a.

³ Lunginsietna le thudik chun nghatsan naw sienla che: I rîngah vêt tlat la, I lungril phêk chunga chun ziek rawh.

⁴ Chuongchun, mihriem le Pathien mithmuah, Hrietthiemna ṭha le ditsakna hmûng i tih.

⁵ I lungril po poin Lalpa chu ring la, Nanga hrietthiemna ringawta chun innghat naw rawh.

⁶ I lampuihai po poa chun ama hre zing la, Amân i lampuihai chu suktluong a tih.

⁷ Nanga mithaia ringawt chun var naw la, Lalpa chu ṭi la, rîtlona chu mâksan rawh.

⁸ I laibua dingin hrisêlna nîng a ta, I ruhai ta dingin thlin.

⁹ I thilneia chun Lalpa chu inza la, I hlâwkna po po rahmasahaia le chun,

¹⁰ Chuongchun,i bu inhai chu tamtaka suksip nîng a ta, I sâwrna khurhai chu uoin tharin luong liem a tih.

¹¹ Ka naupa, Lalpa thununna chu ngainêp naw la, A kâwkna chu ngaitha bawk naw rawh.

¹² Lalpa chun a hmangai chu a kâwk hlak a; Naupa a ilâwm chunga pain a kâwk ang elin.

¹³ Varna hmu suok mi chu a hlim a, Hrietthiemna nei mi chu a hlim a nih.

¹⁴ Chu thuomhnaw chu tangka thuomhnaw nêkin a ṭha lem a, Chutaka hlâwk khawm chu rângkachak inthieng nêkin a ṭha lem si a.

¹⁵ Lunghluhai nêkin a hlu lem a; Thil i dit theihai a ieng ieng le khawm chun hrilkhi ruol a ni nawh.

¹⁶ A kut changtieng chun nihai seina chu a um a; A kut vawitieng chun hausaknahai le inzaumna an um bawk a.

¹⁷ A lampuihai chu inhawitirna lampui an na, A lampuihai po po chu thlamuongna a nih.

¹⁸ Ama cheltuhai ta ding chun hringna thing kûng a na, Ama kawl tlat theitu chu a hlim a nih.

¹⁹ Lalpa chun varnain hnuoi chu a hmu suok a; Hrietthiemnain vânhai chu ân ngîr bawk a.

²⁰ A hrietnain lithûkhai chu a sukdar a, Vânhai chun daidâw an insûrtir a.

²¹ Ka naupa, i mithmuhaia inthawk chun anni chu infehmangtir naw la, Ngairuotthiemna le varna hrisêl chu kawl tlat rawh.

²² Chuongchun, i thlarau ta dingin hringna nîng an ta, I rîng ta dingin zângaina nîng an tih.

²³ Chun, i lampuiah himtakin fe tâng i ta, I ke khawm insui ta naw nih.

²⁴ I zâl pha khawm chun, ṭi ta naw ti ni a, Anih, zâl i ta, îmu inhniktakin in i tih.

²⁵ Ṭina thut chu ṭi naw la, Mi khawhlo sukṭitna a hung pha khawm ṭi bawk naw rawh.

²⁶ Lalpa chu i ringsan nîng a ta, I ke chu lâk hmangnaa inthawkin a vêng ding a ni si a.

²⁷ I kut thilthawtheinaa thaw thei a ni sûng chun, Thilṭha chu a chang âwm hrimhai kuoma chu inro naw rawh.

²⁸ I tuolbâwm kuoma chun, “Fe la, hung nâwk rawh, Zîngah pêng ka tih,” ti naw rawh, Nangin i nei lai a ni phawt chun.

²⁹ I lakah lungmuongtaka a um hmu zing si chun, I tuolbâwm chunga chun thil ṭha naw suongtuo naw.

³⁰ Nang a sukpawi naw che chun, A san boin mi insukbuoipui naw rawh.

³¹ Mi nunrâwng chu inhnar naw la, A lampuihai hrim hrim chu thlang ngai naw rawh;

³² Khêlinhlipna hi Lalpa ngaia chun tirdakum a ni si a. A thurâwn ruok chu mi tluong kuomah a um.

³³ Lalpa ṭawngsie chu mi khawhlo inah a um a, Mi fel chêngna ruok chu mal a sâwm hlak.

³⁴ Hmusittuhai chu a hmusit ngei ngei a, Inngaitlâwmhai ruok chu zângaina a pêk hlak.

³⁵ Mi var chun ropuina chu hluong a ta, Amiruokchu, invêthai kaisângna chu inzakna nîng a tih.