THUVARHAI 26 - Pathien Lekhabu Inthieng (BSI)

¹ Nipui laia vûr le, busîk huna ruo ân hmê naw angin, Inzâkaina hi invêt ta ding chun a âwm nawh.

² Chawngzawng ân vâk ân vâk ang le, peleu a vuong lai angin, A san boa ṭawngse inphurna chu a fu ngai nawh.

³ Vuokna hruihruol chu sakawr ta ding a na, thîrse chu sabengtung ta ding, Chun, hmawl chu mi invêthai ruongzâng ta ding a nih.

⁴ Mi invêt chu ân vêtzie ang peiin dawn naw rawh, Chuong naw chun, ama ang hung ni rawi i tih.

⁵ Mi invêt chu ân vêtzie ang peiin dawn rawh, Chuong naw chun, ama le ama mi varah insie hlau rawi a tih.

⁶ Mi invêt kuta thucha thawntu chun, Ama kehai ngei chu a sât bawngin, sietna chu a dâwn a nih.

⁷ Mi silbai kehai chu sawr thei lovin ân khai zawi a, Chuong ang bawkin, invêthai baua chun tekhithu chu a nih.

⁸ Mi invêt kuoma inzâkaina petu chu, Lung inthuo kâra lunghlu ip ang a nih.

⁹ Mi invêthai baua tekhithu chu, Zu inrui kuta hling lût ang el hi a nih.

¹⁰ Mi inlawn mei meihai ruoitu le, mi invêt ruoitu chu, Thal kâptu mi po po sukhliemtu ang chu a nih.

¹¹ Mi invêt ân vêtna thu hril hriltu chu, Ui ama luok bawka kîr nâwk ang chu a nih.

¹² Mi ama ngaidân chaua var chu i hmu hlak am? Ama nêk chun mi invêta chun beiseina lien lem a um.

¹³ Mi thabo chun, “Sakeibaknei chu lampuiah a um a, Sakeibaknei chu kawtthlêrahai a um,” a ti hlak.

¹⁴ Kawtkhâr chu ân khainaa ân her ân her hlak angin, Mi thabo chun chuong ang bawk chun a khum chungah a thaw.

¹⁵ Mi thabo chun thlênga chun a kut chu a phûm a, A baua hang thun nâwk ding takngiel khawm chu a lungngai hlak.

¹⁶ Mi pasari a san pe theituhai nêk chun, Mi thabo chu ama ngairuotna kawnga chun a var lem.

¹⁷ Mi hung inlawn a, ama ṭhangna ni hlek si lo inhalnaa vân suklungsen chu, Ui lâwnlai a nakâwrhaia mantu ang chu a nih.

¹⁸ Mi invêt thingthuhringhai, Thalhai le thina petu ang chu,

¹⁹ Mi a tuolbâwm hlêma, “Ka fiemthu mei mei an nawm ie!” titu chu a nih.

²⁰ Thingthu tlâksam leiin mei chu a rêm a, Chun, milâwt hmang um nawnaa chun inkhingna a re.

²¹ Meihawlhai chu meiling ding le, thinghai chu mei ding an ni angin, Mi hrângsie chu inkhingna sukṭaltu a nih.

²² Milâwtthiem thuhai chu bubâr tuihnâitak ang an na, Phîngsûng hmun inriltakhaia chun an fe thla.

²³ Hmûr zumlezuor intuo le lungril suol chu, Pil bêl rângkachak êka inluon ang a nih.

²⁴ Theidatu chun a hmûrhai chun ân tlip a, Amiruokchu, ama sûnga chun hmusitna a siekhâwl.

²⁵ Thu a hril ṭha hle khawm a, ama chu ring naw la, A lungrila chun tirdakumna pasari a um si a.

²⁶ A theidana chu ama le ama vervêknain inkhum sien khawm, A suolna chu mipui hmaa phuongphotaka inentir nîng a tih.

²⁷ Tukhawm hnuoikhur cho taphawt chu chutaka chun tlâng an ta, Tukhawm lung inhlum taphawt chu, ama chungah hung kîr a tih.

²⁸ Lei khêlinhlip chun a înhliem tahai chu a theida a, Inpâk derna bau chun sietna sin a thaw.