THUVARHAI 25 - Pathien Lekhabu Inthieng (BSI)

¹ Hienghai hi Solomon thuvarhai Juda ram lal Hezekia mihaiin an zieksâwng chu a nih.

Khâikhinnahai le um dân ṭha inchûk dinghai

² Thil thup hri hi Pathien ta ding chun ropuina a na, Lalhai ropuina ruok chu thilpawi zawng suok chu a nih.

³ Ân sâng tiengah vân, ân thûk tiengah leihnuoi, Lalhai lungril chu suisuok ruol a ni nawh.

⁴ Tangkaruoa inthawk chun a êk chu la suok la, A sungtu ta dingin hmangruo hung ning a tih.

⁵ Lal hmaa inthawk chun mi khawhlo chu la hmang la, A lalṭhungpha chu felnaa tungding nîng a tih.

⁶ Lal hmaihmaa chun nang le nang inhrilmawi naw la, Mi ropuihai hmuna khawm chun ngîr naw rawh.

⁷ I mithaiin a ihmu ta hlak Lalnau hmaihmaa sukhnuoia i um nêk chun, “Hi tieng hin hung kai rawh,” i kuoma tiha um chu a ṭha lem si a.

⁸ Inkhing dingin inhmawtakin suok naw rawh, A tâwpa thaw dân ding hre si lovin, I tuolbâwm chun sukzak hlau rawi a ti che.

⁹ I tuolbâwm le ngei chun i chungthu chu hriltlâng unla, Mi danghai thurûk chu phuong naw rawh.

¹⁰ Chu chu lo hretu chun sukzak rawi a ti che a, I hming sietna chu bo naw hlau rawi a tih.

¹¹ A huntaka thu hril chu Tangkaraw leikhawrhaia rângkachak apple theirahai ang chu a nih.

¹² Rângkachak inthieng ṭhi le, rângkachak nabê ang el hi, Na thuawi chunga hriltu var chu a nih.

¹³ Ama tirtu ta dinga thangko ringum chu Busîk huna vûr deitak ang el hi a nih; A hotuhai lungril chu a sukhar hlak si a.

¹⁴ Thilpêk a ipêk naw pea inhrila uongpuitu chu, Ruo sûr lova thli le sûmhai ang chu a nih.

¹⁵ Tuor sâwt peina chun rorêltu chu thlêmthlûk a na, Chun, lei innêm chun ru chu a sukthliek.

¹⁶ Khuoizu i hmu am? I ta dinga huntâwk chu fa el rawh, Chuong naw chun, khawp taluong i ta, inluok rawi i tih.

¹⁷ I tuolbâwm ina chun i ke chu lût inkhât vieu raw se, Chuong naw chun, nghawk a ti che a, theida rawi a ti che.

¹⁸ Mi a tuolbâwm chunga hrietpuina indiklo phurtu chu, Hembâwk le kâwlhnâm le thal ngei a nih.

¹⁹ Buoina hun laia mi ringum naw chunga ringna innghat hi, Ha tlam le, ke ru suktuona inpel ang a nih.

²⁰ Khaw dei laia silfên hlîptu ang le, soda chunga zuthûr buok ang el hi a nih, Lungril rimsi kuoma hla saktu chu.

²¹ I hmêlma a phîng a ṭâm chun bei fâk ding pe la, Chun, a dang a châr chun, tui dâwn ding pe rawh;

²² A lu chunga chun meiling siekhâwl i ni ding a ni si a, Chun, Lalpa chun lâwmman pêng a ti che.

²³ Hmâr thli chun ruo a hung ṭhuoi a, Chuong ang bawk chun mi demzuitu lei chun hmêl lunginsen a hung ṭhuoi.

²⁴ Nuhmei hrângsie le in liena um nêk chun, Inchung sîp kilkhâwra chêng chu a ṭha lem.

²⁵ Ram hlataka chanchin ṭha chu, Mi dangchâr kuoma tui deitak ang hi a nih.

²⁶ Mi fel mi khawhlo hmaa intuklût chu, Tuikhur tui suksiet le, tuihnâr suksiet ang hi a nih.

²⁷ Khuoizu hi fâk ṭeu el chu a ṭha naw a; Miin mâni ropuina ding ngawt a zawng hi ropuina a ni nawh.

²⁸ Mi a lungril vêng ṭhatna neilo chu, Khawpui chim tahnung, kul bang khawm nei lo ang chu a nih.