THUVARHAI 24 - Pathien Lekhabu Inthieng (BSI)

¹ Mi rilohai chu inhnar naw la, Anni le um khawm chu châk naw rawh.

² An lungril chun nêksâwr dân ân chûk a, An hmûrhai chun thilpawi hril ân chûk si a.

³ Varna hmanga in chu bâwl a na, Chun, hrietthiemna hmanga tungding a ni hlak.

⁴ Chun, hrietna hmangin a pindanhai chu, Hausakna ṭhahai le hlutakhai chun suksip an nih.

⁵ Mi var chu a hrât a nih; Anih, hrietna nei mi chun hrâtna a sukpung hlak.

⁶ Ṭhuoina var hmangin indona chu i siem ding a ni si a, Chun, thurâwn petuhai tamnaa chun himna a um a nih.

⁷ Invêt ta ding chun varna chu ân sâng taluo a, Dâikawtkhâra chun a bau chu a ka naw a nih.

⁸ Thil ṭha naw rawtdawktu chu Mihaiin mi pawitâwk hmangah inbûk an ta.

⁹ Invêt ngaituona chu suol a na, Hmusittu chu mihriemhai ta dingin tirdakum a nih.

¹⁰ Vângduoi nia i chau el chun, I hrâtna chu a tlâwm a nih.

¹¹ Thinaa ṭhuoi hmanga umhai chu san suok la, That dinga inzosa ṭêpa umhai chu chelkîr rawh.

¹² “Ngai ta u, hi mi hi kan hriet nawh,” in ti chun, Lungrilhai ngaituo bûktu chun a ngaituo naw ding am a nih? I lungril vawng ṭhatu chun a hriet naw ding am a nih? Mi tin kuomah a sinthaw ang peiin a pêk ding a ni naw am a nih?

¹³ Ka naupa, nang chun khuoizu fa rawh, a ṭha si a; Khuoithlâr fa rawh, chu chu i bauah a thlum a nih.

¹⁴ Chuongchun, i lungrila um ding varna chu hrieng i ta, I hmu suok chun, chu chun lâwmman chu um a ta, I beiseina chu sukbo ni naw nih.

¹⁵ Aw mi rilopa, mi fel chêngna chu inchân naw rawh, A châwlna hmun khawm chu sukse naw rawh.

¹⁶ Mi fel chu vawi sari tlu sien khawm a tho nâwk hlak si a, Mi khawhlohai ruok chu lungzîngnaa pei thlûkin an um.

¹⁷ I hmêlma a tlûk lai chun hlim naw la, Ama chu pei thlûk a ni laiin i lungril chu lâwm naw raw se.

¹⁸ Lalpa chun hung hmûng a ta, ama suklungawinaw rawi a ta, A lunginsenna chu amaa inthawk chun her hmang rawi a tih.

¹⁹ Thil suol thawtuhai leiin inlau naw la, Mi khawhlo khawm chu inhnar bawk naw rawh.

²⁰ Mi rilo kuoma chun lâwmman um naw ni a, Mi khawhlo khâwnvar chu her hlum a ni ding a ni si a.

²¹ Ka naupa, nang chun Lalpa le lal chu ṭi la, Insukdanglam hmanghai chu vân kawppui bawk naw rawh.

²² An lunginzîngna chu kârlovin a ṭuong ding a ni si a; Anni ve ve bohmangna chu tuin am hrieng a ta?

²³ Hienghai hi mi var thuhrilhai chu an nih, Rorêlnaa mihriemhai thlierbîkna nei hi a ṭha nawh.

²⁴ Mi khawhlo kuomah, “Nang chu mi fel i nih”, titu chu, Mipuihaiin ama chu ṭawngsie inphur an ta, hnamhai chun ama chu tirdak an tih.

²⁵ Ama kâwktuhai kuoma ruok chun lâwmna um a ta, Malsâwmna ṭhatak an chungah tlung a tih.

²⁶ Dawnna indik petu chu, A hmûrhaiin a fâwp a.

²⁷ I sin chu tuolah buotsai la, Chu chu i ta dingin loah siemrêl rawh; Chu hnunga chun i in chu bâwl rawh.

²⁸ A san boin i vênghai chungah thuhretu ni naw la, I hmûrhai chun hlêm bawk naw rawh.

²⁹ “Ka chunga a thaw angin a chunga khawm thaw vêng ka tih, Mi chu a sinthaw ang peiin ka pêk ding nih,” ti naw rawh.

³⁰ Mi thabo lo kâwla chun ka fe ta a, Mi hrietthiemna bo grêp huon kâwla leh.

³¹ Chun, ngai ta, hlinghaiin a lo ṭhangnel vawng a, A phêkin hling bukhaiin ân khum a, A lung banghai khawm chu a chim thla bawk a.

³² Chun, ka en a, ka ngaituo rak a, Inchûktirna ka hmuin ka hriet ta a.

³³ La zâl deu dep, la ininnghil deu dep, Zâl dinga kuthai la hang inthlep deu dep,

³⁴ Chuong ang chun, i pasietna chu inru angin hung a ta, I tlâksamna chu mi inrâlthuom angin hung a tih.