THUVARHAI 23 - Pathien Lekhabu Inthieng (BSI)

¹ Rorêltu le bu fa dinga i ṭhung lai chun, I hmaa mi chu nguntakin ngaituo rawh.

² Phîngṭâm hre mi tak i ni chun, I rîngah chemtê i sie ding a ni si a.

³ Inhlêmna bu an nih ti hmuin, A tuihnâinahai chu châk ve naw rawh.

⁴ Hung hausa dingin insuklungkham naw la, I varnaa inthawk ngei chun bân rawh.

⁵ A um naw chunga chun i mithai chu infûktir naw la, Hausaknahai chun thlahai an insiempêk ngei ngei hlak si a; Muvânlai vântienga vuong hlak ang el chun.

⁶ Mit rilo neitu bei chu fa naw la, A thiltuihnaihai khawm chu châk ve naw rawh.

⁷ Ama chu ân ngaituona ang peia um mi a ni si a, I kuoma chun, “Dâwn la, fa rawh,” a ti dea chu, A lungril ruok chu i kuomah a um nawh.

⁸ Bubâr i fâk ta chu, inluoksuok nâwk i ta, I thu thlumhai chu inhmang i tih.

⁹ Mi invêt hrieta chun thu hril naw la, I thu varnahai chu a hmusit ding a ni si a.

¹⁰ Inhmaa ramri chu sawn hmang naw la, Pa neilohai lohaia chun lût bawk naw rawh.

¹¹ Anni intlantu chu a hrât si a, An chungthu chu nanga chungah phût rawi a tih.

¹² Inchûktirna tienga chun i lungril chu hmang la, I nahai chu hrietna thuhai tienga chun.

¹³ Sukdikna chu naupanga inthawk chun lakîr naw la, Hmawla i vuok chun, ama chu a thi âwm si naw a.

¹⁴ Ama chu hmawl chun vuong i ta, Seola inthawkin a thlarau chu i sansuok ding annâwm.

¹⁵ Ka naupa, i lungril a var phawt chun, Ka lungril, keia ta ngei chu, lâwm a tih.

¹⁶ Anih, ka lungril chu hlim a ta, I hmûrhaiin thil indik a hril pha chun.

¹⁷ I lungril chun misuolhai inhnar naw raw se, Sûnnithlâkin Lalpa ṭînaa chun um zing lem rawh.

¹⁸ Matheilovin chutaka chun lâwmman a um a, I beiseina chu thlâwn dêr naw nih.

¹⁹ Ngai la, ka naupa, hung var rawh, I lungril chu lampuia chun ṭhuoi rawh.

²⁰ Hnukinrâwltaka sa fa mihai lai le Zu he mihai laia chun um naw rawh.

²¹ Zu inrui mi le hnukinrâwl chu hung pasieng an ta, Inruina chun mi chu puonṭiekin ân thuom ding a ni si a.

²² I pa nang a neitu che thu hi ngai la, Chun, i nu chu a tar hnung khawma hmusit bawk naw rawh.

²³ Thutak chu inchaw la, zawr ta naw rawh, Anih, varna dâm, inchûktirna dâm le hrietthiemna dâm khawm chu.

²⁴ Mi fel pa chu nasatakin hlim a ta, Chun, nau var neitu chu amaa chun hlim bawk a tih.

²⁵ I pa le i nu chu lâwmin inumtir la, Nang a neitunu che khawm chu inlâwmtir rawh.

²⁶ Ka naupa, i lungril mi pe ta, Chun, ka lampuihaia chun i mithai khawm chu fu bawk raw se.

²⁷ Nuhmei hur chu khurse inthûk a na, Hmêlmak nuhmei chu khur inchêp a nih.

²⁸ Anih, inru angin ân chân a, Mihai laia chun bawsietna chu a sukpung ta a.

²⁹ Tuin am chungrikna chu a nei a? Tuin am lungngaina chu a nei a? Tuin am inhalna chu a nei a? Sawisêlna chu tuin am a nei a? A thawtu boin tuin am pânnahai a nei a? Mithai senna chu tuin am a nei a?

³⁰ Uoin hmuna sâwttak um hlakhai chun, Uoin chawkpawl zawnga fe hlakhai chun.

³¹ Uoin chu a sen lai chun nang chun en ngai naw la, Noa chun a zie chu a hung insuo a, A hang insiemdik lai vêl chu en naw rawh.

³² A tâwpa chun rûl ang elin a chuk a, Rûlriel angin a chuk hlak.

³³ I mithai chun thilmakhai chu hmûng a ta, I lungril chun thil chapohai chu hril suok a tih.

³⁴ Anih, tuisuoriet laia zâltu ang chu nîng i ta, Annawleh, lawngngul lêra zâl ang nîng i tih.

³⁵ “Annin an mi vuok a, suknatin ka um naw a, Annin an mi zêp a, ka hriet naw a, Iengtik âm ka har ding a na? la zawng nâwk rawp ka tih,” i ti ding am a nih?