THUVARHAI 22 - Pathien Lekhabu Inthieng (BSI)

Thuvar sâwmthum lâk khâwm

¹ Hausakna nasatakhai nêkin hming ṭha hi thlang lem ding a na, Ditsakna ngainatum chu tangka le rângkachak nêka thlang lem ding a nih.

² Mi hausa le mi pasie chu an intuok a, An rênga anni siemtu chu Lalpa a nih.

³ Mi var chun thil suol chu a hmu a, ân bi a, Mi mâwl ruok chu a fe pei a, a tuor pha hlak.

⁴ Inngaitlâwmna lâwmman le Lalpa ṭîna chu Hausaknahai le inzâkaina le hringna a nih.

⁵ Mi dukdaklo lampuia chun hlinghai le chânghai an um a, A lungril vêng ṭhatu chu chuonga inthawka hlataka chun um a tih.

⁶ Naupang chu a hraw ding lampuiah chun inchûktir la, A hung upat hnung khawma chutaka inthawk chu pêt ngai naw nih.

⁷ Mi hausa chun mi pase chunga chun ro a rêl a, Thil pûktu chu ân pûktirtu siehlaw a nih.

⁸ Khawhlona thetu chun lunginzîngna sîk a ta, A lunginsenna hmawl chu hlawsam bawk a tih.

⁹ Mi tiktlâi chu malsâwmin um a tih, Mi pase kuomah a bei chu a pêk si a.

¹⁰ Hmusittu chu hnawt suok la, inhalna khawm chu fe suok vêng a tih. Anih, insuolna le inhrilsietna khawm chu bo a tih.

¹¹ Lungril inthiengna ngainatu chu, A hmûrahai chun lunginsietna a nei a, lal chu ama ruolpa nîng a tih.

¹² Lalpa mithai chun mi hrietna nei mi chu a vawng ṭha a, Mi ringum naw thuhai ruok chu a peithlâk.

¹³ Mi thabo chun, “Tuola sawn sakeibaknei a um a, Kawtthlêrhaia sukhlum nîng ka tih,” a ta.

¹⁴ Hmêlmak nuhmei bau chu khur inthûktak a na, Lalpain a chunga lunginsenna a nei chu chutaka chun tlâng a tih.

¹⁵ Invêtna hi naupang lungrila chun khuopdein a um a, Amiruokchu, sukdikna hmawl chun amaa inthawka hlatakah hnawthmang a tih.

¹⁶ A hlâwkna dinga mi pasie nêksâwr a, Mi hausa kuoma pe hlaktu chu a hung hlawsam tei hlak.

Thuchahai le inchûktirnahai

¹⁷ I na sit la, mi var thuhai hi ngai rawh, Ka hrietnaa hin i lungril chu hmang bawk rawh.

¹⁸ Nangma sûnga i vawng ṭha chun thil inhawi a ni si a, I hmûrhaia chun tungding an ni ve bawk chun.

¹⁹ I ringna chu Lalpa a ni theina dingin, Hi ni hin i kuomah, i kuom ngeiah, kân hriettir che hi.

²⁰ I kuomah thil ṭhatakhai chu ka ziek a ni naw am a nih? Hrietna le thurâwnhai thua chun;

²¹ Thutak thuhai a ni chiezie chu inhriettir ding chein, Nangma tirtuhai che kuoma thutak thuhai chu i phurkîr nâwk theina dingin.

²² Pasie chu a pasiet leiin lâkpêk naw la, Dâikawtkhâra sawisaka umhai chu nêksâwr bawk naw rawh.

Thuvar nâwk zuolhai chu

²³ An chungthu chu Lalpa chun a ṭan ding a ni si a, Anni suksetuhai hringna chu sukse vêng a tih.

²⁴ Mi lunginsen hmang chu ruolah siem naw la, Mi nunsie le chun in inkawp ding a ni nawh.

²⁵ A lampuihai chu hung inchûk i ta, I lungril ta dingin châng hmu rawi i tih.

²⁶ Kut bentuhai laia mi pakhat ang khawm chu ni naw la, Batnahai dinga intiemkamtu pakhat khawm chu ni bawk naw rawh.

²⁷ Nangin pêk ding iengkhawm i nei si naw chun, Nanga hnuoia i khum chu ieng dingin am la hmang a ta?

²⁸ Inhmaa ramri chu sawn hmang naw la, I thlatuhaiin an lo khang ta chu.

²⁹ Mi a sinthawa taimatak i hmu am? ama chu lalhai hmaah ngîr a tih. Mi hmusitumhai hmaa chun ngîr naw nih.