THUVARHAI 20 - Pathien Lekhabu Inthieng (BSI)

¹ Uoin hi nuisantu a na, zu hi mi risie a nih, Tukhawm chutaka suksuoltu chu a var naw a nih.

² Lal ṭiumna chu sakeibaknei inrûm ri ang a na, Ama suklungsentu chun ama hringna chunga ngei chun thil a suksuol a nih.

³ Insuolnaa inthawka insietum hi mihriem ta dingin inzâkaina a na, Amiruokchu, invêt taphawthai chu insêl an tih.

⁴ Mi thabo chun thlasik leiin hnuoi inlet naw ni a, Chuleiin, busîk pha chun kut dâwng a ta, iengkhawm nei naw nih.

⁵ Mihriem lungrila thurâwn hi tui inthûk ang a na, Amiruokchu, hrietthiemna nei mi chun chawi suok a tih.

⁶ Mi tamtak chun mâni ṭhatna hril seng an ta, Mi ringum ruok chu tuin am hmu suok thei a ta?

⁷ Mi indik a lungril ṭhaa fe mi chu, Ama hnunga a thlahai chu an hamṭha.

⁸ Rorêlna lalṭhungphaa lal ṭhung chun, A mithaiin thil ṭha naw po po a hnawt dar.

⁹ Tuin am, “Ka lungril chu ka sukthieng a, Ka suolnaa inthawkin kân thieng tah” ti thei a ta?

¹⁰ Bûkna danglamhai, inkhîna danglamhai, Chuhai ve ve chu angkhata Lalpa ta dinga tirdakum a nih.

¹¹ Naupang hmanin a thilthawhaiin ama le ama ân suklang hlak, A sinthaw chu ân thieng amanih, ân dik amani khawm ni sien.

¹² Hrietna na le, hmuna mit chu, Chuhai ve ve chu Lalpa siem an nih.

¹³ Zâl hmakhuo ngai naw ta, tlâksamnaah lût rawi i tih, I mithai chu meng la, chuongchun, beia suktlai nîng i tih.

¹⁴ “A ni nawh, a ni nawh” inchawtu chun a ti a, A fe hmang pha ruok chun a uong hlak.

¹⁵ Rângkachak le lung mantam tamtak a um a, Amiruokchu, hrietna hmûrhai chu lunghlu hlutak an nih.

¹⁶ Hmêlmak mi ta dingin a aiaw dingin a silfên la la, Chun, nuhmei hmêlmak mi ta ding chun ama chu aiawah hrên rawh.

¹⁷ Indik nawna bei hi mihriem ta dingin a thlum a, A hnunga ruok chun a bau chu phaiphinin sip a tih.

¹⁸ Thiltum tinrêng chu thurâwna tungding a na, Ṭhuoina var leh indona chu siem rawh.

¹⁹ Mi bautam invâk vêltu chun thurûkhai a puong a, Chuleiin, a bau ka lientu chu va pâwl naw rawh.

²⁰ Tukhawm a nu amanih, a pa amanih ṭawngse inphurtu chu, A khâwnvar chu inthim sâmupna laia chun her hlum nîng a tih.

²¹ A tira chun rochan chu inhmâwtaka chang thei nîng a ta, Amiruokchu, chu tâwpna chu malsâwmpêk ni naw nih.

²² “Thil ṭha naw chu thung ka tih,” nangin ti naw la, Lalpa chu nghâk la, ama chun sandam a ti che.

²³ Bûkna danglamhai chu Lalpa ta dingin tirdakum a na, Bûkkhaina indik naw khawm chu a ṭha nawh.

²⁴ Mihriem fenahai chu Lalpa ta a na, Chuong a ni chun, miin iengtin am mâni lampui chu hre thei a ta?

²⁵ “ân thieng a nih,” hang ti thlâk rawk el hi mihriem ta dingin châng a na, Inkhâmnahai hnunga hrietchiengna siem le hin.

²⁶ Lal var chun mi khawhlohai chu a hnawt dar a, Bu chîlna tawlailîr kekuol chu an chungah a hung lâk.

²⁷ Mihriem lungril chu Pathien khâwnvar a na, Phîngsûng hmun inthûktakhai po po chu a zawng suok hlak.

²⁸ Lunginsietna le thutak hin lal chu a vawngṭha a, A lalṭhungpha khawm chu zângainaa tungding a nih.

²⁹ Tlangvâlhai ropuina chu an hrâtna hi a na, Mi upahai mawina chu an lu inṭuok hi a nih.

³⁰ Hliem khawpa vuokna chun thil ṭha naw a sukfai a, Vuoknahai chun phing sûng sûngril hmunhai chu a sukfai.