THUVARHAI 19 - Pathien Lekhabu Inthieng (BSI)

¹ Mi pasie lungril ṭhaa fetu chu, A hmûrhaia khêlinhlipa mi invêt nêk chun a ṭha lem.

² Lungril hrietthiemna bo khawm chu a ṭha chuong naw a, Chun, a kehai tir inhmâwtu chun a suksuol hlak.

³ Mihriem invêtna chun a lampui chu a sukkâwi a, A lungril chu Lalpa chungah a lungsen hlak.

⁴ Hausakna chun ruolhai tamtak a belsa a, Mi pasie ruok chu a ruola inthawka ṭhein a um.

⁵ Thuhretu indik naw chu hrem lo ni naw ni a, Thukhêl sâksuoktu chun pumpel bawk naw nih.

⁶ Mi tamtakin mi tiktlai ditsakna an ngên a, Mi tin chu thilthlâwnpêk petu ta dinga ruol a nih.

⁷ Mi pasie chu a unauhai po poin an theida a, A ruolhai lem chun ieng ang khieua hla am an fe san ding chu! Thuhaiin anni a hnawt pei a; nisienlakhawm, an fe hmang tah.

⁸ Varna hmutu chun ama lungril a hmangai a, Hrietthiemna vawngtu chun thil ṭha chu hmûng a tih.

⁹ Thuhretu indik naw chu hrem lo ni naw nih, Thukhêl sâksuoktu chu bohmang bawk a tih.

¹⁰ Inhawi chên hi invêt ta ding chun a âwm naw a, Siehlaw ta dingin lal nauhai chunga rorêl chu a âwm naw nâwk zuol a nih.

¹¹ Mihriem remruotthiemna hin ama chu lunginsen intak dingin a siem a, Bawsietna fe khêl chu ama ta dingin chawimawina a nih.

¹² Lal lunginsenna chu sakeibaknei inrûm ri ang a na, A ditsakna ruok chu hlohna chunga daidaw ang a nih.

¹³ Naupa invêt chu a pa lunginrimna a na, Nuhmei lungawinawna chu ruo sûr zing ang a nih.

¹⁴ In le hausaknahai hi thlatuhaia inthawka rochan an na, Nuhmei var ruok hi chu Lalpaa inthawk a nih.

¹⁵ Thabona chu imu inhniktakah ân peilût a, Mi thabo chun phîngṭâm tuor a tih.

¹⁶ Thupêk vawngtu chun a lungril chu a vawng ṭha a na, A lampuihaia fîmkhur lo chu thîng a tih.

¹⁷ Mi pasie lunginsiettu chun Lalpa ân pûktir a na, A thil thaw ṭha chu ama chun pe nâwk a tih.

¹⁸ Beiseina a la um laiin i naupa chu thunun la, A sietna ding êm chun lungril nei naw rawh.

¹⁹ Mi lunginsen êm êm mi chun hremna chu tuor a ta, Ama chu i sansuok chun, i sansuok nâwk pei a ṭûl ding a ni si a.

²⁰ Thurâwn chu ngai la, inchûktirna chu pawm rawh, I hihnung tâwp tienga i hung var theina dingin.

²¹ Mihriem lungrila chun remruotna tamtak a um a, Amiruokchu, Lalpa thurâwn chau chu ngîrsuok a tih.

²² Mihriem nuom zâwng chu a lunginsietna inkhina a na, Mi pasie chu mi khêlhlip nêkin a ṭha lem.

²³ Lalpa ṭîna chun hringna ân tlun a, Chu chu neitu chu tlaitakin um a ta, Thil ṭha naw hrimin ama chu sir ngai naw nih.

²⁴ Mi thabo chun thlênga chun a kut chu a phûm a, A baua hang thun takngiel khawm chu a pei nawh.

²⁵ Hmusittu chu vaw la, mi mâwl chun var inchûk a tih, Hrietthiemna nei mi chu kâwk la, hrethiem a tih.

²⁶ A pa suksetu chun a nu chu a hnawt hmang a na, Ama chu kâwkna le inzakna intlungtir hlaktu naupa chu a nih.

²⁷ Ka naupa, hrietthiemna thuhaia inthawka pêthmangna ding chau a, Inchûktirnahai ngaithlâk hi tâwp san rawh.

²⁸ Thuhretu hmangnabo chun rorêlna a nuisan a, Mi khawhlo bau chun suolna a lem.

²⁹ Rorêlnahai hi hmusittuhai ta dinga buotsai an na, Vuoknahai hi invêt ruongzâng ta dingin.