THUVARHAI 18 - Pathien Lekhabu Inthieng (BSI)

¹ Mi mâni insuktum chun, mâni nuom zâwng ngei chu a zawng a, Varna indik po po a sêlkal hlak.

² Invêt chun hrietthiemnaa chun lâwmna a nei naw a, A lungrila ama le ama ân hmu suok theina chaua naw khan chu.

³ Mi khawhlo chu a hung pha chun hmusitna khawm a hung ve a, Tlâng ihrilsiet nina le chun kâwkna a hung bawk.

⁴ Mihriem baua thuhai chu tui inthûkhai ang a na, Varna tuihnâr chu vadungtê luonglai ang a nih.

⁵ Mi khawhlo ditsak chu thil ṭha a ni naw a, Rorêlnaa mi fel hnâwlhmang chu a ṭha chuong bawk nawh.

⁶ Mi invêt hmûrhai chun inhalna ân tlun a, A bau chun vuoknahai a ko bawk.

⁷ Mi invêt bau chu ama sietna a na, A hmûrhai chu a lungril ta dinga châng a nih.

⁸ Mi lâwtthiem thuhai chu bubâr tuihnâitak ang an na, Phîng sûng hmun inthûktakhaiah an fe thla hlak.

⁹ Ama sinthawa inthlada mi chu Suksetu unaupa chu a nih.

¹⁰ Lalpa hming chu kulbîng dettak a na, Mi fel chu chutaka chun a tlân lût a, a him hlak.

¹¹ Mi hausa hausakna chu a khawpui dettak a na, Ama ngairuotnahaia ngei chun bang insâng ang a nih.

¹² Sietna hmaah mihriem lungril chu a uong hlak a, Inzâkaina hmaa chun inngaitlâwmna a fe zie.

¹³ A hriet hmaa dawnna petu chu, A ta dingin inzakum le invêtna a nih.

¹⁴ Mihriem lungril chun a hrât nawna chu chelngîr a ta, Lungril kawise ruok chu tuin am tuor thei a ta?

¹⁵ Mi var lungril chun hrietna a nei a, Mi var na chun thiemna a zawng bawk.

¹⁶ Mihriem thilthlâwnpêk chun ama ta dingin hmun a siempêk a, Ama chu mi ropuihai hmaah a hung ṭhuoi hlak.

¹⁷ Ama chungthu hril hmasatu chu indik âwmin ân lang a, Nisienlakhawm, a tuolbâwm chu a hung a, a hung phawr lang hlak.

¹⁸ Aisânna chun insêlnahai a sukbo a, Mi hrâthai chu a sukṭhe bawk.

¹⁹ Unaupa suklungawilova um chu khawpui dettak nêkin hne ân tak lem, Chuong inhalnahai chu kula thîrtluonhai ang a nih.

²⁰ Mihriem phîng chu a baua rasuok chun suksip nîng a ta, A hmûrhaia hlawkna chun ama chu suklungawi ning a tih.

²¹ Thina le hringna hi lei thilthawtheinaa um an na, Achu hmangaitu chun chutaka inthawka ra chu fâng a tih.

²² Tukhawm nuhmei hmutu chun thil ṭha a hmu a nih, Lalpa ditsakna khawm a chang a nih.

²³ Mi pasie chun ngênna thuhai a hmang hlak a, Mi hausa ruok chun tlahawltakin a dawn hlak.

²⁴ Ruolhai tamtak siemtu chun ama sietna ding el a thaw a nih, Amiruokchu, ruol unau nêka hnai lema kawp tlat chu a um a nih.