THUVARHAI 15 - Pathien Lekhabu Inthieng (BSI)

¹ Dawnna innêm chun lunginsenna a hnawt hmang a, Ṭawng theidaum ruok chun lunginsenna a chawktho.

² Mi var lei chun hrietna indik a hril suok hlak a, Mi invêt bau ruok chun invêtna a bun suok hlak.

³ Lalpa mithai chu hmun tinah a um a, Thil ṭha le thil ṭha naw chu a hmu zing hlak.

⁴ Lei hrisêl chu hringna thing a na, Chutaka khêlthu ruok chu lungril kawidarna a nih.

⁵ Mi invêt chun a pa inchûktirna chu a hmusit a, Kâwkna ngaisaktu ruok chun varna a chang hlak.

⁶ Mi fel ina chun ro tamtak a um a, Mi khawhlo hlâwknaa ruok chun buoina a um.

⁷ Mi var hmûrhai chun hrietna a the dar a, Invêt lungril ruok chun chuong angin a thaw ve nawh.

⁸ Mi khawhlo inthawina chu Lalpa ta dingin tirdakum a na, Mi tluong ṭawngṭâina ruok chu a lâwm zâwng a nih.

⁹ Mi khawhlo lampui chu Lalpa ta dingin tirdakum a na, Felna hnawttu ruok chu a hmangai hlak.

¹⁰ Lampui mâksantu ta ding chun sukdikna lungngaiumtak a um hlak, Kâwkna theidatu chu thi ngei a tih.

¹¹ Seol le Abaddon hman Lalpa hmaa chun an um a, Mihriem nauhai lungrilhai chu a va um nasa âwm deh e!

¹² Hmusittu chun kâwka um chu a ngaina naw a, Mi var kuoma khawm fe ngai bawk naw nih.

¹³ Lungril hlim chun hmêl hlimtak a siem a, Lungril lungngai ruok chun lungvar a suksiet hlak.

¹⁴ Mi hrietthiemna neitu lungril chun hrietna a zawng hlak a, Invêthai bau ruok chu invêtnain ân châwm.

¹⁵ Sukrinuma umhai nihai po po chu ni rilo an na, Lungril lâwmtak mi ruok chun ruoiṭhe zing zingna a nei.

¹⁶ Hausakna nasatak, buoipuiumtak nêkin, Lalpa ṭina le tlâwmte nei a ṭha lem.

¹⁷ Bâwngchal châwm thau buthlêng chutaka intheidana umna nêkin. Thlaihna buthlêng chutaka hmangaina umna chu a ṭha lem.

¹⁸ Mi nunsie chun inhalna a chawktho a, Mi lunginsen intak ruok chun inhalna a sukre.

¹⁹ Mi thabo lampui chu hling daihai ang a na, Mi tluong lampui ruok chu lamtluongpui a nih.

²⁰ Naupa var chun pa lâwm a siem a, Mi invêt ruok chun a nu chu a hmusit.

²¹ Mi lungril bo ta ding chun invêtna hi hlimum a na, Mi hrietthiemna nei mi ruok chun a fena chu a suktlûn hlak.

²² Inrâwnna um nawnaa chu thiltumhai chu a hlawsam hlak a, Amiruokchu, thurâwntuhai inkhâwm laia chun tungding an nih.

²³ Dawnna indik chun mi a suklâwm a, A huntaka thu a ni tak hril chu a va ṭha de!

²⁴ Mi var lampui chu hringnaah a tungin a kai, Hnuoi tienga Seol chu a mâksan theina dingin.

²⁵ Mi chapo sûngkuo chu Lalpa chun kar thlûng a ta, Hmeithai ramri ruok chu tungdingpêk a tih.

²⁶ Remruotna rilohai hi Lalpa ta dingin tirdakum a na, Thu lâwmumhai ruok chu ân thieng.

²⁷ Hlêpnaa duâm mi chun a insûng a chawkbuoi a, Thamna theidatu ruok chu hring a tih.

²⁸ Mi fel lungril chun dawn dân ding ân chûk hlak a, Mi khawhlo bau ruok chun thil ṭhalohai a sâksuok hlak.

²⁹ Mi khawhlova inthawkin Lalpa chu a hla a, Mi fel ṭawngṭâina ruok chu a hriet hlak.

³⁰ Mithai varna chun lungril a suklâwm a, Chanchin ṭhahai chun ruhai a suktlawr.

³¹ Hringna sukdikna ngaithlâkna neitu chu, Mi var lai chun chêng a tih.

³² Inchûktirna sêlkaltu chun ama lungril ngei kha a hmusit a nih; Amiruokchu, kâwkna ngaitu chun hrietthiemna a nei hlak.

³³ Lalpa ṭîna chu varna inchûktirna a nih; Chun, inzakaina hmaa chun inngaitlâwmna a fezie.