THUVARHAI 14 - Pathien Lekhabu Inthieng (BSI)

¹ Nuhmei var taphawt chun a in chu a bâwl a, Nuhmei invêt ruok chun a kuthaiin a ṭhiek hlak.

² Mi, felnaa fe chun Lalpa chu a ṭi a, A lampuihaia khêlinhlip ruok chun ama a hmusit hlak.

³ Mi invêt baua chun chapona hmawl a um a, Mi var hmûrhai ruok chun hla lem a tih.

⁴ Bâwngchalhai um nawnaa chun ran in chu a fai a, Amiruokchu, hlâwkna nasatak chu bâwngchal hrâtna lei a nih.

⁵ Thuhretu ringum chu inkhêl naw ni a, Thuhretu indik naw ruok chun khêl hril a tih.

⁶ Hmusittu chun varna a zawng hlak a, a hmu ngai nawh, Hrietthiemna neitu ta ding ruok chun thiemna chu a awlsam hlak.

⁷ Mi invêt hmaihmaa inthawk chun fe hmang rawh, Amaa inthawk chun thiemna hmûrhai hmu chuong naw ti nih.

⁸ Mi var varna chu a lampui hrietthiem chu a na, Mi invêt invêtna ruok chu khêlthu chu a nih.

⁹ Mi suol chun suolna chu an nuisan a, Mi tluonghai laia ruok chun Pathien ditsakna chu a um.

¹⁰ Lungril chun ama khâkna tak chu a hriet a, Hmêlmak mi chun an hlimna chu a sukbuoi ngai nawh.

¹¹ Mi khawhlo in chu nam thlûk nîng a ta, Mi tluong puon in ruok chu um rân a tih.

¹² Mihriem kuoma indik âwmtaka inlang lampui chu a um a, Chu tâwpna ruok chu thina lampuihai a nih.

¹³ Innuinaa ngei khawm lungril chu a lungngai a, Chu hlimna tâwpna chu chungrikna a nih.

¹⁴ Lungrila hnungtawltu chu ama lampuihai ngeia suksip nîng a ta, Chun, mi ṭha chu amaa inthawk ngei chun suktlai nîng a tih.

¹⁵ Mi mâwl chun thu tinrêng el hi a ring a, Mi var ruok chun a fena chu a en ngun hlak.

¹⁶ Mi var chun suol chu a ṭi a, a fe hmangsan hlak a, Mi invêt ruok chun chaponain a hmang a, ama ân ring tlat hlak.

¹⁷ Lunginsen awltak chun invêttakin thaw rawp a ta, Chun, mi remruotna khawhlo neitu chu theida ni bawk a tih.

¹⁸ Mi mâwl chun invêtna ro chu a hluo a, Mi varhai ruok chu thiemna inkhumtirin an um.

¹⁹ Mi suol chu mi ṭha hmaa chun a kûn a, Mi khawhlo chu mi fel daikawtkhârhaia chun a kûn bawk a.

²⁰ Mi pasie chu a tuolbâwmhai ngei khawma theida a ni hlak a, Mi hausa ruok chun ruolhai tamtak a nei.

²¹ A tuolbâwm hmusittu chun a suksuol a na, Mi pasie chunga lunginsietna nei ruok chu a hlim a nih.

²² Thil ṭha naw rawt suoktuhai chun an suksuol a ni naw am a nih? Thil ṭha rawt suoktuhai kuoma ruok chun thutak le lunginsietna um a tih.

²³ Sininrimna po poa hin hlâwkna a um a, Hmûrhaia a hrila hril ngawt el hi chu tlâksamnaah ân nghat.

²⁴ An hausaknahai chu mi var ta ding chun an lallukhum a na, Invêthai invêtna ruok chu invêtna ringawt el a nih.

²⁵ Thuhretu indik chun mihai a sansuok hlak a, Thukhêl sâksuoktu ruok chun inhlêmna ân umtir.

²⁶ Lalpa ṭinaa hin ringna nghettak a um a, A thlahai chun inhumhimna hmun nei an tih.

²⁷ Lalpa ṭina chu hringna tuikhur a na, Thina chânghaia inthawka pêt hmangna leh.

²⁸ Mipuihai pungkhâwmnaa chun lal ropuina chu a um a, Mipui tlâksamnaa ruok chun lal nau sietna chu a um thung.

²⁹ Mi lunginsen intaktak chu hrietthiemna nasatak nei a nih, Lungril ṭuonrang ruok chun invêtna chu a chawimawi a nih.

³⁰ Lungril hrisêl chu taksa hringna a na, Itthîkna ruok hi chu ruhai ta dinga hmawnna a nih.

³¹ Mi pasie nêksâwrtu chun ama Siemtu a hmusit a nih, Tlasam chunga lunginsietna nei ruok chun ama ân za a nih.

³² Mi khawhlo chu a thilthaw rilova chun sukthlûkin a um a, Mi fel ruok chun a thinaa chun beiseina a nei hlak.

³³ Varna chu mi hrietthiemna neitu lungrila chun a chêng a, Invêthai lungrila um ruok chu ân hrietsa zing a nih.

³⁴ Felna hin hnam a chawimawi a, Suolna ruok hi chu mi tukhawm ta dinga hmusitumna a nih.

³⁵ Siehlaw vartaka thawtu chunga chun lal ditsakna chu a um a, Ama sukzaktu chunga ruok chun a lunginsenna um a tih.