THUVARHAI 13 - Pathien Lekhabu Inthieng (BSI)

¹ Naupa var chun a pa inchûktirna chu a ngai a, Hmusittu ruok chun kâwkna chu a ngai nawh.

² Miin a bau rasuoka inthawkin thil ṭha chu fâng a ta, Mi ringum naw lungril ruok chun hrângsietna fâng a tih.

³ A bau vêng ṭhatu chun a hringna a kawl ṭha a, A hmûrhai ka lientu ruok chun suksietna tuok a tih.

⁴ Mi thabo lungril chun a châk hlaka chu, iengkhawm a nei nawh, Mi taima lungril ruok chu sukthâu nîng a tih.

⁵ Mi fel chun khêl hril a theida a, Mi khawhlo ruok chun inzakna a siemin kâwkna a lâk lût hlak.

⁶ Kawnglama mi tluong chu felnain ama a vêng a, Khawhlona ruok chun mi suol chu a buon thlûk.

⁷ Ama le ama insukhausa a, iengkhawm nei silo a um a, Ama le ama insukpase a, hausakna nasatak nei a um bawk.

⁸ Mihriem hringna intlanna chu a hausaknahai a nih, Mi pasie ruok chun inṭhina chu a ngai nawh.

⁹ Mi fel varna chu a hlim a, Mi khawhlo khâwnvar ruok chu herhlum nîng a tih.

¹⁰ Chaponaa chun inkhingna a suok a, Thurâwn ṭhataka ruok chun varna a um.

¹¹ Teplo mei meia hausakna hmu chu kiem a ta, Sininrima la khâwmtu chun a pung hmûng a tih.

¹² Beisei hlawsamna chun lungril a sukdam naw a, Châk zâwng hung tlung ruok chu hringna thing a nih.

¹³ Tukhawm thu hmusittu chun ama chungah sietna ân tlun hlak a, Thupêk ṭitu ruok chu lâwmman pêkin um a tih.

¹⁴ Mi var inchûktirna chu hringna tuikhur a na, Thina chânghaia inthawka fe kiengna leh.

¹⁵ Hrietthiemna ṭha chun ditsakna a chang a, Mi ringum naw lampui ruok chu a kherinkhâwng.

¹⁶ Mi var tinhai chun hrietna leh sin an thaw a, Mi invêt ruok chun invêtna chu a thedar.

¹⁷ Thangko khawhlo chu thil suolah a tlu hlak a, Aiawtu ringum ruok chu a hrisêl a nih.

¹⁸ Tlâksamna le inzakna chu inchûktirna sêlkaltu kuoma chun um an ta, Kâwkna pawisatu ruok chu chawimawi nîng a tih.

¹⁹ Nuom zâwng sukfamkim hi lungrila chun a thlum a, Amiruokchu, suolnaa inthawka fe kieng hi invêthai ta ding chun tirdakum a nih.

²⁰ Mi varhai intlawnpui la, nang khawm var i tih, Mi invêthai inruolpui ruok chu suksiet nîng a tih.

²¹ Thil ṭha naw chun mi suolhai chu a hnawt pei a, Mi fel ruok chu thil ṭhaa thung nîng a tih.

²² Mi ṭha chun a tuhai ta ding chenin rohluo ding a mâkpêk hlak a, Mi suol hausakna chu mi fel ta dinga siekhâwl chau a nih.

²³ Mi pasie hnuoi inletnaa chun bu tamtak a um a, Amiruokchu, remruot fel naw leia suksiet chutaka chun a um.

²⁴ A hmawl hlatu chun a naupa a theida a, Ama hmangaitu ruok chun taimatakin a thunun hlak.

²⁵ Mi fel chun a lungrila a dittâwkin a fâk hlak a, Mi khawhlo phîng ruok chu tlasam a tih.