THUVARHAI 12 - Pathien Lekhabu Inthieng (BSI)

¹ Inchûktirna ngainatu chun hrietna a ngaina a, Kâwkna theidatu ruok chu intlaw a nih.

² Mi ṭha chun Lalpa ditsakna hmûng a ta, Thiltum khawhlo nei mi ruok chu thiemnaw inchangtir a tih.

³ Mihriem chu khawhlonain indinsuok an ni ngai naw a, Mi fel zung ruok chu sawnhmang a ni ngai nawh.

⁴ Nuhmei ringum chu a pasal ta dingin lallukhum a na, Thil inzapuium thawtu ruok chu a ruhai ta dingin inngêna ang a nih.

⁵ Mi fel ngaituohai chu thil indik a na, Mi khawhlo thurâwn ruok chu inhlêmna a nih.

⁶ Mi khawhlo thuhai chu thisen insuo dinga inchântu a na, Nisienlakhawm, mi fel bau chun anni a san suok hlak.

⁷ Mi khawhlohai chu pei thlâkin an um a, an um ta naw a, Nisienlakhawm, mi fel insûng ruok chu a ngîr zing hlak.

⁸ Mi chu a varna anghu peiin hrilmawi nîng a ta, Lungril khêlinhlip nei mi ruok chu ngainêp nîng a tih.

⁹ Mi mâni le mâni insiechunga, fâk ding nei lo nêkin, Mi ngainatum raklo, siehlaw nei si kha a ṭha lem.

¹⁰ Mi fel chun a ran hai hringna chu a ngaisak a, Mi suol zângaina innêm ruok chu a rilo.

¹¹ A hnuoi inlettu chun bei nei ṭeu a ta, Mi teplohai zuitu ruok chu hrietthiemna bo a nih.

¹² Misuol chun mi rilohai lên chu a ditpui a, Mi fel zung ruok chun ra ân suo.

¹³ Hmûrhai bawsietnaa chun mi rilo châng chu a um a, Mi fel ruok chu buoinaa inthawk chun hung suok a tih.

¹⁴ A baua ra thil ṭha chun mi chu suktlai nîng a ta, Ama kut thilthawhai ngei chu a kuomah pêk nîng a tih.

¹⁵ Ama mithaia chun mi invêt lampui chu ân dik a, Mi var ruok chun thurâwn chu a ngai hlak.

¹⁶ Invêt lungsenna chu hriet uor a ni hlak a, Mi var ruok chun inzakna chu a thuphmang hlak.

¹⁷ Thutak sâksuok hlaktu chun felna chu ân entir a, Hrepuitu inkhêl ruok chun hlêmna ân entir hlak.

¹⁸ Kâwlhnâm isun anga tlahawltaka thuhril a um a, Mi var lei ruok chu a hrisêl a nih.

¹⁹ Thutak hmûr chu kumkhuoa tungding nîng a ta, Lei khêlinhlip ruok chu mitkhapkâr chaua ding a nih.

²⁰ Rîtlona rawt suoktuhai lungrila chun hlêmna a um a; Inremna rawt suoktuhai kuoma ruok chun hlimna a um.

²¹ Mi fel kuoma chun thil pawi hrim tlung naw ni a, Mi suol ruok chu rîtlonaa suksip nîng a tih.

²² Hmûr khêlinhliphai chu Lalpa ta dingin tirdakum an na, Indiktaka thawtuhai ruok chu a lâwmna an ni hlak.

²³ Mi var chun hrietna chu a thup a, Invêthai lungril ruok chun invêtna a tlânginsampui.

²⁴ Mi taima kut chun rorêlna chu kawl a ta, Mi thabo ruok chu sin inthawluitirna hnuoia sie nîng a tih.

²⁵ Mihriem lungrila inlungkhamna chun a sukkûn a, Thu ṭha ruok chun a suklâwm hlak.

²⁶ Mi fel chu a tuolbâwm ta dingin ṭhuoitu a na, Mi khawhlo lampui ruok chun ân suksuoltir hlak.

²⁷ Mi thabo chun a ramsuoknaa a lâk chu a raw naw a, Amiruokchu, mihriema thil hlutak. chu taima kuomah a um;

²⁸ Felna lampuia chun hringna a um a; Chu lampuia chun thina a um nawh.