THUVARHAI 11 - Pathien Lekhabu Inthieng (BSI)

¹ Bûkna indik naw chu Lalpa ta dingin tirdakum a nih; Inkhîna indik ruok chu a lâwm zâwng a nih.

² Chapona chu a hung pha chun, inzaknain a hung zui; Varna ruok chu inngaitlâwmhai kuomah a um.

³ Mi tluong chu a lungril indiktak chun ṭhuoi a ta, Bawsetuhai ruok chu an khêlinhlipnain anni suksieng a tih.

⁴ Lungsen nia chun hausakna chu a ṭhahnem chuong naw a, Felna ruok chun thinaa inthawkin a sansuok.

⁵ Mi fel famkim chu a felna chun a lampui kâwkhmûng a ta, Mi khawhlo ruok chu a khawhlonaa ngei chun tlu lem a tih.

⁶ Mi tluong chu an felna chun anni sansuok a ta, Ringmawumtaka thawtuhai ruok chu an thil sukpawi ngei chun anni lâng a tih.

⁷ Mi khawhlo chu a thi chun, a beiseina chu bohmang a tih, Mi fel naw beiseina chu bohmang bawk a tih.

⁸ Mi fel chu buoinaa inthawk san suokin a um a, A hmuna chun mi khawhlo chu a lût hlak.

⁹ Pathien ngaisak naw mi chun a bauin a tuolbâwm chu a suksiet a, Mi fel ruok chu hrietna leia sanhim a nih.

¹⁰ Mi fel le ṭhataka a khawsak sûng po, khawpui chu a hlim hlak, Chun, mi khawhlo chu a bohmang pha chun khêkri a um hlak.

¹¹ Mi tluong malsâwmna leiin khawpui chu chawimawiin a um a, Nisienlakhawm, mi khawhlo baua pei thlâkin a um hlak.

¹² A tuolbâwm ngainêptu chu varna bo a nih, Mi hrietthiemna nei mi ruok chu a to ṭawk ṭawk.

¹³ Mi lâwt vêltu anga invâk vêl chun thurûk a phawr hlak a, Mi lungril ringumtak ruok chun thu chu a ip hlak.

¹⁴ Inṭhuoina var um nawnaa chun mi an tlu hlak a, Thurâwntu tamtakhai lai ruok chun himna a um.

¹⁵ Hmêlmak mi ta dinga aiawtu ni chu kawisieng a ta, Aiawtu nina theidatu ruok chu nghet lem a tih.

¹⁶ Nuhmei zângaithei chun inzâumna a kawl zing a, Pasal kâwlhrâwng chun hausaknahai a kawl hlak.

¹⁷ Mi zainêmtak chun a lungril ta ding ngeiin thil ṭha a thaw a, Mi rilo ruok chun ama tisa ngei a sukbuoi.

¹⁸ Mi khawhlo chun hlaw hmusitumtakhai chu a hlaw a, Felna tutu ruok chun lâwmman indiktak chu a hmu.

¹⁹ Felnaa ngîr det tlattu chun hringna chu hmûng a ta, Suolna hnawttu chun a thina ding ngeiin a thaw a nih.

²⁰ Lungrila khêlinhliphai chu Lalpa ta dingin tirdakum an na, An lampuia fel famkimhai ruok chu a lâwm zâwng an nih.

²¹ Mi rilo chu hrem naw ni naw ni, Mi fel thla ruok chu sanhim nîng a tih.

²² Nuhmei hmêlṭha ngairuotthiemna neilo chu, Vawkpui hnâra rângkachak kutsebi ang a nih.

²³ Mi fel dit zâwng chu thil ṭha chau a nih, Mi rilo beiseina chu lungsenna chau a nih.

²⁴ Semdar raka pung deu deu si a um a, Mamaw tâwk bâk inro tlata tlasam si a um bawk a.

²⁵ Mi tiktlai chu sukthâu nîng a ta, Tui buoktu chu, ama ngei khawm tui buokkhum nîng a tih.

²⁶ Bu inrotu chu miin ṭawngsie inphur an tih, A zawrtu lu chunga ruok chun malsâwmna um lem a tih.

²⁷ Thil ṭha nguntaka zawngtu chun ditsakna a zawng a nih, Pawitâwkna zawngtu chunga ruok chun pawitâwkna chu tlung a tih.

²⁸ A hausaknahai ring mi chu tlûng a ta, Mi fel ruok chu hna hring angin inno a tih.

²⁹ Mi ama in ngei sukbuoitu chun takbo ro hluong a ta, Mi invêt chu lungril var kuoma siehlaw nîng a tih.

³⁰ Mi fel ra chu hringna thingkûng a na, Lungrilhai latu chu mi var a nih.

³¹ Ngai ta, mi fel chu hnuoia hin thung nîng a ta, Mi suol le mi khawhlohai khawm chu thung an va ni nasa awm de!