THUHRILTU 8 - Pathien Lekhabu Inthieng (BSI)1 Mi var ang hi tu am a um a? Thil umze hrie tu am a um a? Mi a varna chun a hmêl chu a sukvar a. A hmêl inrumna khawm chu a danglam tah. Laltak thu zâwm ding a nih 2 Thurâwn ka pêk che; Lal thupêk chu pawisa rawh, Pathiena în khâmna lei chun. 3 A hmaihmaa inthawk fe suok inhmaw naw la, thil suol khawm thaw zing naw rawh; a nuom zâwng taphawthai chu a thaw si a. 4 Lal thu chun thilthawtheina a nei leiin, tuin am a kuomah, “Ieng am i thaw a” ti thei a ta? 5 Tukhawm thupêkhai pawmtu chun thil ṭha naw tuok naw nih; mi var lungril chun hun indik le a kawnglam a hriet. Pathien lampuihai chu mihriem hrietna bâka mi a nih 6 Thil tinrênghai chun hun le kawnglam an nei si a; mihriem buoina chu a chungah nasa hle sien khawm. 7 Thil la hung tlung ding chu a hriet si naw a, a la hung ni dân ding chu tuin am hril thei a ti leh? 8 Thlarau chu chel dingin, thlarau chunga thuneina nei mihriem an um nawh; thi ni chunga khawm chun thuneina an nei bawk nawh; chun, indonaa chun châwl a um bawk nawh; chu chu kuoma pêka um ta chu rîtlona chun ama rîtlona chu sansuok naw nih. 9 Hi po po hi ka hmu ta a; nisa hnuoia sin po pohaia chun ka lungril chu ka hmang ta a; mi pakhatin mi dang chungah ama le ama ân suknatna ding elin thuneina a nei hun chu a nei a nih. 10 Chun, mi rilo chu phûma a um ka hmu a, thlâna chun an hung a; chuong thil thaw diktuhai chu hmun inthienga inthawk chun an fê hmang a, khawpuia chun anni chu theinghil an ni ta a; hi khawm hi teplo bawk a nih. 11 Sin ṭha naw chunga thu rêl thlûk chu inrangtaka suksuok a ni ngai naw a, chuleichun, mihriemhai naupasalhai chun thil suol thaw dingin an lungril chun a tin rân hlak a nih. 12 Mi suol chun thil ṭha naw vawi za thawin a dam sûng nihai chu suksei tho sien khawm; matheilovin, Pathien ṭituhai ta ding chun, ama hmaa an ṭi leiin, a ṭha ding a nih ti ka hriet a; 13 amiruokchu, mi rilo ta ding chun ṭha naw ni a, a dam sûng nihai khawm chu suksei pha naw bawk a tih; chu chu hlim ang el hi a na; Pathien hmaa chun a ṭî naw leiin. 14 Hnuoi chunga hin thil teplo thaw tah a um a; mi fel chu an um a, an kuoma khawm chun mi rilohaiin an thaw ang angin a tlung a nih; chun, mi rilohai an um bawk a, an kuoma khawm chun mi felhai sinthaw ang ang chun a tlung ve bawk a nih. Hi khawm hi teplo bawk a nih ka tih. 15 Chun, miin hlima uma, fâka dâwn nêka nisa hnuoia hin thil ṭha lem a nei naw leiin, nuomsipna hi ṭha ka ti el a nih; nisa hnuoia Pathienin ama a lo pêk tah a dam sûng nihaia po po chun a sininrimna chu a kuoma chun a um ding a ni si a. 16 Hnuoi chunga sin thawa umhai chu hmu ding le, varna chu hre dinga ka lungril ka hmang lai chu: (sûna manih zâna mani khawma mithaiin îmu a hmu nawzie dâm chu); 17 nisa hnuoia sin thawa um, mihriemhaiin an hmu suok thei naw, Pathien sinthaw chu ka hmu a; ieng ang khawmin, miin zawngin nasatakin thaw inrim sien khawm, hmu suok chuong naw nih; mi var khawma hriet inring sien khawm hmu suok chuong bawk naw nih. |
Hmar OV (Re-edited) Bible (Millennium) - Pathien Lekhabu Inthieng
Copyright © Bible Society of India, 2016.
Used by permission. All rights reserved worldwide.
Bible Society of India