THUHRILTU 7 - Pathien Lekhabu Inthieng (BSI)

Varna ṭhatna chu

¹ Hming ṭhat chu hriek hlutak nêkin a ṭha lem a; Mi a thi ni chu a pieng ni nêkin a ṭha lem bawk.

² Ruoiṭhena ina fe nêkin, lusûnna ina fe chu a ṭha lem; Chu chu mi po po tâwpna a ni si a: Mi dam chun a lungrilah sie tlat a tih.

³ Innuina nêk chun lungngaina a ṭha lem a, Hmêl lungngaina chun lungril a siemṭha si a.

⁴ Mi var lungril chu lusûn inah a um a; Mi invêt lungril ruok chu hlim hlapna inah a um.

⁵ Mi invêthai hlasak ngai nêk chun, Mi var kâwkna ngaithlâk a ṭha lem.

⁶ Bêl suong hnuoia hlinghai a kâng puok ṭak ṭak ang hi, Mi invêt innuina khawm chu a nih; Hi khawm hi teplo el a nih.

⁷ Matheilovin, nêksâwrna chun mi var chu a sukvêt a, Thamna chun lungril a suksiet.

⁸ Thil chu a ṭanna nêkin a tâwp chu a ṭha lem a; Lungrila zaidawthei mi chu lungrila chapo nêkin a ṭha lem.

⁹ Lunginsen dingin i lungrilah inhmaw naw rawh, Lunginsenna chu mi invêthai ângsûnga um a ni si a.

¹⁰ “Tulai hun nêk hin tienlai nihai kha ieng ieng leia ṭha lem am a ni a?” ti naw rawh, Chu thil în dawnna chu varnaa inthawk a ni si naw a.

¹¹ Varna hi rochan ang bawka ṭha a na, Anih, nisa hmutuhai ta ding lem chun a ṭha nasa zuol a nih.

¹² Tangka chu inhliekhuna a ni ang bawkin varna khawm chu inhliekhuna a na; Hrietna ṭhatna chu: varna neitu hringna chu a vawng himpêk a nih.

¹³ Pathien sinthaw chu ngaituo ta; A kâwia a siem ta chu tuin am suktlûn thei a ta?

¹⁴ Hlawtling nia chun hlim la, vângduoi nia chun ngaituo rawh; miin ama hnunga ding iengkhawm a hriet nawna dingin Pathien chun pakhat chu a dang ang bawkin a siem a nih.

¹⁵ Ka teplo nihaia chun hi po hi ka hmu ta a; mi fel ama felnaa thi bohmang chu a um a; mi rilo a thil suol thaw pum zinga dam sâwt hrep chu a um bawk a.

¹⁶ Intifel talaw naw la, insukvar talaw bawk naw rawh; iengdingin am nang le nang insukbohmang i ta?

¹⁷ Rilo talaw naw la, invêt talaw bawk naw rawh; i hun tlung hmain iengdingin am thîng i ta?

¹⁸ Hi hi i chel tlat hi a ṭha a nih, chutaka inthawk chun i kut khawm la kîr naw rawh; Pathien ṭîtuhai chun an la hung suoksan vawng ding a ni si a.

¹⁹ Varna chu mi var ta ding chun khawpuia rorêltu sâwm umhai nêk chun hrâtna a ni lem.

²⁰ Indiktakin, hnuoi chunga hin mi fel thil ṭha thaw a, thil suksuol ngailo an um nawh.

²¹ Chun, mi thuhril nazawng ngaisak naw rawh, chuong naw chun, i siehlawin ṭawngsie ân phur che hre rawi i tih;

²² nang ngei khawma chuong ang bawk chun mi danghai ṭawngsie în phur rawp hlak ti i lungrilin i hriet rawp si a.

Varna ṭhatna chu

²³ Hi po po hi varnaa chun ka lo fie ta a, “Var tâng ka tih,” ka ta; amiruokchu, keimaa inthawk chun hlatak a nih.

²⁴ Chuong a hlata hla le nasataka inthûk chu tuin am hmu suok thei a ta?

²⁵ Ka ngha kîr a, ka lungril chun, hre ding le, zawng ding le, varna zawng suok dingin le; rîtlona hi invêtna a nih ti hre ding le, invêtna chu intlâwkna a nih ti hre dingin ka thlîr vêl a.

²⁶ Chun, nuhmei a lungril chu chânghai le lênhai, a kuthai chu hnâng ang el neitu chu, thina nêka ṭha lem ka hmu suok a; tukhawm Pathien suklâwmtu chu amaa inthawk suok thleng an ta, amiruokchu, mi suol chu amanu chun man a tih.

²⁷ Thuhriltu chun, Ngai ta, hi hi ka hmu suok tah, a nizât hmu suok dinga thil pakhat zoa a dang la um pei hi;

²⁸ chu chu ka lungril hin a zawng zing a, nisienlakhawm, ka la hmu suok naw a; pasal pakhat sâng khat laia chu ka hmu suok a; amiruokchu, chuonghai lai po poa nuhmei pakhat chu ka hmu suok zo nawh.

²⁹ Ngai ta, hi chau hi ka hmu suok a, Pathien chun mi chu mi ngîl ni dingin a siem a, amiruokchu, anni chu mâni nuom dân dânin an khawsa ta lem a.