THUHRILTU 6 - Pathien Lekhabu Inthieng (BSI)

¹ Nisa hnuoia hin thil suol ka hmu chu a um a, mihriemhai chunga chun a rik hle a;

² Pathienin mi neinungna le hausakna le inzâumna a pêk a, chuongchun, a lungrilin a dit zâwng taphawt chu tlâksam hrim a nei naw a; amiruokchu, Pathien chun chuonghai fâk theina a pêk tlat naw a, amiruokchu, mikhuol chun a fâk ta lem a; hi khawm hi teplo el a na, natna ṭha lo a nih.

³ Miin nau za nei sienla, kum tamtak dam sienla, a kum nihai chu tam hle sienla, amiruokchu, a lungril chu thil ṭhain a tlai naw a; chu nawa khawm phûmna a hlaw bawk si naw chun, ama nêk chun a hun naw a pieng khawm chu a ṭha lem a nih ka ti a nih;

⁴ teploah a hung a, inthima chun a fê hmang a, a hming chu inthimnain ân khum a:

⁵ chu nawa chun nisa chu a hmu ngai naw a, hriet khawm a hriet naw a; hi hin mi dang nêk hmanin châwlna a nei lem a nih.

⁶ Anih, kum sâng vawi hni dam sienla, thil ṭha a chang chuong naw chun, mi po po thuhmun vawng an ni naw am a nih?

⁷ Mihriem sininrimna po po chu a bau ta ding a na, amiruokchu, phîngṭâmna chu suksip a ni chuong nawh.

⁸ Mi var chun mi invêt nêkin ieng am hlâwkna a hmu chuong leh? Annawleh, mi hringhai hmaa fê dân hrie mi rimsi chun ieng am a nei a?

⁹ Nuom zâwng ram tin nei nêk chun mithaia hmu chu a ṭha lem a; hi khawm hi teplo el, lungril rimsikna el a nih.

¹⁰ Ieng po khawm lo um ta kha a hming sâwttaka sak tah a ni a; chun, mihriem chu ieng am a na ti khawm hriet a ni sa ta a, ama nêka thilthawthei lem chu a khing zo nawh;

¹¹ Thu a tam po leh teplo a tam pei a, mihriem ta dingin iem a ṭhat lemna?

¹² A dam sûnga dingin tuin am mihriem ta dinga thil ṭha chu a hriet a, a dam sûng teplo nihai po po chu hlim angin a hmangral el a ni naw maw? Nisa hnuoia hin ama hnungah ieng am a hung um ding tuin am mi a hril thei a?