THUHRILTU 12 - Pathien Lekhabu Inthieng (BSI)

¹ I vânglai nihaia chun nangma Siemtu che chu hre zing la, kumhai a hung hnai a, ni ṭha nawhai a hung tlung hma le;

² chu huna chun, “Annia chun inhawitina ka nei nawh,” i tina hun a hung tlung hma hin; nisa amanih, var amanih, thla amanih, arasihai amanih an inthim hmain, sûmhai chu ruo hnunga an hung ki nâwk hma hin.

³ In vêngtuhai chu an inthin a, mi hrâthai chu an kûn a, bu râwttuhai chu an tlâwm leia an maa, tukvera dâkhai chu an inthim nia chun;

⁴ kawtthlêrahai chun kawtkhârhai khâr a na, thil râwt rihai chu a hung dei a, mi chu vate râwl ria chun a hung tho a, thil ri mawi naunuhmeihai po po chu sukhnuoi an hung na;

⁵ anni chun ân sâng chu an ṭi a, lampuia chun ṭitna a hung um a, almond thing chu a hung kumûm a, khâuṭhikṭhihai chu buoipuium an hung ni a, nuom zâwng dâm chun a hung hlawsam a, mi chu a chatuon ina chun a fe ta leiin le, lusûnhai chun kawtthlêrhai chu an fang leiin le;

⁶ tangkaraw hrui chu suktan a ni leiin le, rângkachak maihûn amanih, tuibêl kekuol chu a tliekin amanih; Pil bêl amani chu tuikhura chun sukkawi a ni leiin amanih,

⁷ pilvut chu a nina anga hnuoia a kîr nâwk hmain le thlarau chu ama petu Pathien kuoma a kîr nâwk hmain.

⁸ “Teplohai teplo,” Thuhriltu chun a tih, thil po po hi teplo a nih.

Mihriem thilthaw ding

⁹ Chu bâka chun, Thuhriltu hi a var leiin, mihai chu hrietthiemna ân chûktir hlak a, anih, a ngaituo a, a zawngsuok a, thuvar tamtakhai chu indawt peiin a sie a.

¹⁰ Thuhriltu chun thu pawmtlâkhai chu hmu suok dingin a zawng a, chuong zieka umhai chu thu ngîl, thudik thuhai chu an nih.

¹¹ Mi var thuhai chu hmawl a hmawra thilzum um ang a na, chun, Berâm vêngtu pakhata inthawka pêk thuvar lâk khâwmhai chu thîrkil vuok det tlat ang chu a nih.

¹² Chun, chu bâka chun, ka naupa, infuiin um la, lekhabu tamtak siem hin tâwp lêm a nei naw a; inchûk tam khawm hi taksa inrimna chau a nih.

¹³ Hi hi thil tâwp chu a nih; thil po po chu hriet a ni ta a; Pathien ṭî la, a thupêkhai chu zâwm rawh; hi hi mihriem thilthaw ding pumpui chu a nih.

¹⁴ Pathien chun sin tinrêng chu rorêlnaah a hung lâk lût ding a ni si a, thil inthuphai po po le, a ṭha khawm a ṭha naw khawm chu.