THUHRILTU 11 - Pathien Lekhabu Inthieng (BSI)

Mi var umdân

¹ Tuihai chunga chun i bei chu pei la, Ni tamtak hnunga chun i hmu nâwk ding a ni si a.

² Chan chu hmun sariah sem lem la, anih, hmun rieta khawm; Hnuoi chunga hin thil ṭha naw ieng am a hung ding ti i hriet si naw a.

³ Sûmhai chu ruoa an sip hle chun hnuoi chungah an insukruok hlak a, Thing hi chu hmârtienga manih, simtienga manih a tlu chun, A tlûkna hmuna chun thing chu um a tih.

⁴ Thli nghâktu chun thlaichi thlâk naw ni a, Sûmhai pawisatu chun sîk ngai bawk naw nih.

⁵ Thli lampui chu khâwtieng am ti i hriet naw angin le, nau vawntu phîng sûnga chun iengtin am ruhai chu an inṭhanga ti i hriet naw angin, thil po po thawtu Pathien sinthaw chu i hriet nawh.

⁶ Zingkâr chun i thlaichi chu thlâk la, zântienga khawm i kut chu la kîr naw rawh; a ieng lem am a hung hlawtling ding, a hi am a nih a kha am a nih, an pahni ve vein angkhat an ni ding am khawm i hriet si naw a.

⁷ Var chu ân hawi a, mithai ta dinga thil inhawi chu nisa hmu hi a nih.

⁸ Anih, mi chu kum tamtak a dam chun, chuonga po po chun ama chu hlim raw se; amiruokchu, inthim lai nihai chu hre zing raw se, tamtak an ni ding a ni si a. Chuong a hung tlunghai po po chu teplo el a nih.

Naupanghai infuina

⁹ Aw tlangvâl, i tlangvâlnaa chun hlim rawh; i vânglai nihaia chun i lungril chu hlim sienla, i lungril lampui chu hraw la, i mithmu ngeia chun; amiruokchu, hieng thil po poa ding hin Pathien chun rorêlnaah a ṭhuoilût ding che a nih ti hre rawh.

¹⁰ Chuleiin, i lungrila inthawkin lungngaina chu sie hmang la,i taksaa inthawkin natna chu sie hmang bawk la, tlangvâl lai le vânglai nihai hi teplo el a ni si a.