THUHRILTU 10 - Pathien Lekhabu Inthieng (BSI)

Indiknawna hnungzuihai chu

¹ Tho thihai chun rim inhnik siemtu hriek chu rim thu an innamsuoktir a. Chuong ang bawk chun, invêtna chite chun varna le inzâkaina chu a suksietpêk.

² Mi var lung chu a changtieng pangah a ngha a, Mi invêt lung chu vawitieng a ngha.

³ Anih, mi invêt chu lampuia a fe laiin, A hrietthiemna chun ân hlawsamtir a; Mi tin kuoma chun invêt a ni chu a hril hlak.

⁴ Rorêltu lungril chu i chungah a tho chun, I umna hmun chu mâksan naw la; Intuklûtna hin lungninawna nasatak chu a sukrê si a.

⁵ Thil ṭha naw nisa hnuoia hin ka hmu chu a um a; Rorêltua inthawk thil indik lo suok ang tak chu;

⁶ Invêt chu insâng nasataka siein a um a, Hausa chu hmun inhnuoia a ṭhung si hai hi.

⁷ Siehlawhai chu sakawr chunga chuonga, Lal nauhai chu hnuoia kea lâwn ka hmu a.

⁸ Khur chotu chu chutaka chun tlâng a ta, Dâi nêrâwngtu chu rûlin chuk bawk a tih.

⁹ Lung keilûttu chu suknatin um a ta, Thing chêkpheltu chu chutaka chun sukṭitin um a tih.

¹⁰ Thîr chu a mâwla, miin a sîr chu a tâtngei naw chun, Hrâtna tam lem a hmang a ṭûl a; Nisienlakhawm, hlawtlingna ding chun varna a ṭhangkai.

¹¹ Dâwivêt a ni hmaa rûl chun a chuk si chun, Rûl dâwivêttu ta ding chun ṭhangkaina a um dêr nawh.

¹² Mi var baua thuhai chu a zainêm hlak a, Mi invêt hmûrhai ruok chun ama chu lem a tih.

¹³ A baua inthawka thu hung inṭanna khawm chu invêtna a na, A thuhril tâwpna khawm chu intlâwkna pawitâwk thei a nih.

¹⁴ Mi invêt khawma thuhai a sukpung a, Mihriem chun ieng am a um ding a hriet nawh, Ama hnunga chun ieng am a um ding ti tuin am ama chu hril thei a ta?

¹⁵ Invêt sininrimna chun ama chu a suklungzîng a, Khawpuia fe dân khawm a hriet si naw a.

¹⁶ Aw ram, i chung a rik! i lal chu naupang a na, I rorêltuhaiin zîngkâr ruoi an ṭhe hlak si a.

¹⁷ Aw ram, i lal chu mi ṭhahai naupa a na, I rorêltuhai chun inruina ding el ni lova, hrâtna dinga A hunbi taka an fâk lai chun i va hlim de!

¹⁸ Zawmthâwtnaa chun inchung chu a chim a, Thabona kuthaia chun in a far.

¹⁹ Ruoiṭhena chu innuina dinga siem a na, Uoin chun nun chu a suklâwm a; Tangka ruok chun iengkim a thaw thei.

²⁰ Lal chu ṭawngsie inphur naw rawh, ngaituona khawmin; I khum pindana chun mi hausa chu ṭawngsie inphur bawk naw rawh; Chunga vate chun râwl rî chu phur a ta, Chuong thla neihai chun thu chu hril rawi an tih.