THUHRILTU 1 - Pathien Lekhabu Inthieng (BSI)

Iengkim a thlâwn vawng a nih

¹ Jerusalema lal, David naupa Thuhriltu thuhai chu:

² “Teplohai teplo, Thuhriltu chun, teplohai teplo! Thil po po hi teplo a nih,” a ta.

³ Miin a sininrimna, nisa hnuoia a sininrimna po poa chun ieng am hlâwkna a hmu a?

⁴ Suon khat a fe liem a, suon dang a hung suok a; Leihnuoi ruok hi chu a um ngaiin a um zing a.

⁵ Nisa chu a hung suok a, nisa chu a tla nâwk a, A hung suokna hmun ma chu a tlung nâwk vak a.

⁶ Thli chu simtieng a hrâng a, hmartieng a kîr nâwk a. A vêl a vêlin thli chu a hrâng a, Chu thli chu a fe kuolnaa bawk chun a kîr nâwk a.

⁷ Vadunghai po po chu tuisuorietah an luong lût a, Anachu tuisuoriet chu a sip naw a: Vadunghai chu an hung suokna hmun tiengah, chutieng ma chun an kîr nâwk a.

⁸ Thil po po hi inrimna el a nih; miin a hril thei nawh; A hmua hmuin mit chu a tlai ngai naw a, A hrieta hrietin na khawm chu a sip ngai bawk nawh.

⁹ Thil ni tasa kha, thil la hung ni ding chu a na; Thaw tasa kha la thaw ding chu a nih: Nisa hnuoia hin thil tharlâm hrim a um nawh.

¹⁰ Miin, “En ta, hi hi a thar a nih” an ti ding thil hrim a um am a nih? Einihai hmaa lo um ta dai ruok an nih;

¹¹ Hi hma thilhai hriet zingna a um naw a, La hung um ding thilhai khawm chu Suon hung um dinghai laia tukhawmin hre zing chuong naw nih.

Thuhriltu thil hmusuokhai

¹² Kei Thuhriltu hi Jerusalema Israelhai chunga lal ka ni ta a.

¹³ Vânkhuphnuoia thil thawa um ta po po chungthu chu varnaa zawnga zawng suok dingin ka lungril ka lo hmang ta a; Pathienin mihriem nauhai buoipui dinga a pêk chu sin rinumtak a nih.

¹⁴ Nisa hnuoia sin thawa um tahai po po chu ka hmu ta a; chun, ngai ta, thil po po chu teplo el, lungril sâwlna el a nih.

¹⁵ A kâwi ta hlak chu siem tlûn thei a ni naw a, Chun, a um naw hlak tiem el thei a ni hliek naw a.

¹⁶ Ka lungrilin, “Ka hmaa Jerusalema umhai po po nêkin varna ka nei nasa lem a nih, ka lungril khawmin hrietthiemna le varna nasatak a nei a,” ka ti a.

¹⁷ Chun, intlâwkna le invêtna hre dingin le, varna chu hre dingin ka lungril ka sêng a; hi khawm hi nuomhmanglo el a niin ka hriet ta a.

¹⁸ Varna tamtak umnaa chun lungngaina tamtak a um ve a; Hrietna insukpungtu khawm chun lungngaina ân sukpung bawk a nih.