THILTHAWHAI 8 - Pathien Lekhabu Inthieng (BSI)

Kristienhai suknawmnatna le indarna

¹ Chu ni chun, kohran Jerusalema umhai chu mîn nasatakin an suknawmna ṭan ta a; chuongchun, tirkohai bak naw chu Judai le Samari ram khaw tinah an indar ta vawng a.

² Chun, Pathien ngaisak tuhaiin amanih Stephan chu an phûm a, nasatakin an ṭap a.

³ Saula ruok chun kohranhai chu a suknawmna bêk bêk a, in tinah a lût a, a nuhmei a pasalin a hnûk dawk a, intângna inah a khum hlak a.

Samari ramah Chanchin Ṭha hril a nih

⁴ Chun, ân darhai chu khaw tinah an fe a, thu chu an hril pei a.

⁵ Chun, Philip chu Samari khuoah a zu fe a, an kuomah Krista thu a khêk pui a.

⁶ Mipuihaiin a thu an hriet a, a thilmak thawhai an hmu chun Philip thu hril chu lungril hmunkhatin an ngaisak a,

⁷ khawhri inthiengnawhai chu mi tamtak an imanhai sûnga inthawkin rawl inringtaka khêka an suok leiin le, zeng le keinbai tamtak khawm an hung dam ta leiin.

⁸ Chun, chu khuoa chun nasatakin an lâwm ta a.

⁹ Chun, a hming Simon, mi pakhat a um a; ama chun, chu khuoa chun dawi hmangin Samari khuoa mihai maktitakin a lo siem ta hlak a.

¹⁰ Mi po po chun mi setaka inthawka ân laltak chenin, “Hi mipa hi Pathien thilthawtheina, ‘Ropui,’ an ti kha a ni hi,” tiin a thu an ngaisak tâwl hlak.

¹¹ A dâwi hmangin sâwttak mak titaka a siem hlak leiin a thu an ngaisak a nih.

¹² Nisienlakhawm, anni chun Pathien ram chanchin ṭha le Isu Krista hming Chanchin Ṭha Philip hril chu an âwi phingleh, a nuhmei a pasalin baptisma an chang ta a.

¹³ Chun, Simon rau khawmin a âwi ve ta a, chun baptisma a chang zo chun, Philip kuomah a um zing a. Inchikna le thilmak nasatak thawa umhai chu a hmu ve a, mak a ti hle hlak a.

¹⁴ Chun, tirko Jerusalema umhai khan Samari khuoa mihaiin Pathien thu an awi ti an hrietin, an kuomah Peter le Johan chu an tir a.

¹⁵ Anni chu an zuk tlung chun Thlarau Inthieng an hmu theina dingin an ṭawngṭaipêk a.

¹⁶ Chu hma chun anni laia tu chunga khawm a la tlung nawh; Lal Isu hmingin baptisma an chang chau a la nih.

¹⁷ Chun, an chungah an kut an innghat a, Thlarau Inthieng an hmu ta a.

¹⁸ Chun, tirkohai kut innghat leia Thlarau Inthieng pêk a nih ti Simonin a hmu a,

¹⁹ “Hi thuneina hi mi pe ve ro, tû chunga khawm kut kân nghatna taphawtin Thlarau Inthieng an hmu vena dingin,” tiin an kuomah tangka pêk a tum a.

²⁰ Nisienlakhawm, Peterin a kuomah, “I tangka hi nanga ruolin bohmang raw se, Pathien thilpêk tangka suma inchâwk i tum leiin.

²¹ Hieng thua hin i ṭhang ve nawh, chan khawm i nei bawk nawh; i lungril Pathien ngaiin a fel nawh.

²² Chuleiin, i suol hi sim la, Lalpa kuomah ṭawngṭai rawh, chuongchun, i lungrila i ngaituo hi a ngaidam thei khiet che rawi mawh.

²³ Thil khâkna mîta le, suol khuop thlûkna hmunah i um ti ka hriet a nih,” a ta.

²⁴ Chun, Simonin, “In thil hril hi ka chunga iengkhawm a tlung nawna dingin nangnîn Lalpa kuomah mi ṭawngṭaipêk ro,” a ta, a dawn a.

²⁵ Chuongchun, anni chun Lalpa thu chu an inhriettira an hril zoin, Jerusalemah an fe nâwk ta a; Samari rama mihai khaw tamtak kuomah Chanchin Ṭha chu an hril pei a.

Philip le Ethiopia mitillâk chu

²⁶ Chun, Lalpa vântirko pakhatin Philip chu a biek a, “Tho la, sim tienga Jerusalema inthawka Gaza zuk sun lampuia khan fe rawh, chu lampui chu thlalêra fe thleng a nih,” a ta.

²⁷ Chuongchun, a tho a, a fe ta a. Chun, ngai ta, Ethiopia rama mi pakhat, Ethiopia lalnu Kandaki hnuoia mitillâk inlaltak, a ro po po enkawltu, Jerusalemah Pathien be dingin a hang fe a.

²⁸ A hung tieng chun a tawlailîra ṭhung pumin zâwlnei Isai lekhabu a tiem pei a.

²⁹ Chun, Thlarau chun Philip kuomah, “Saw tawlailîr saw va hnai la, va pâwl rawh,” a ta.

³⁰ Chun, Philip chu mitillâk kuoma chun a va tlân a, zâwlnei Isai lekhabu a tiem a hriet a, “I tiem kha a umzie i hriet am?” a ta.

³¹ Ama chun, “Tukhawmin an mi hrilfie naw chun, iengtin am hre thei ka ta?” a ta. Chun, a kuoma hung ṭhung dingin Philip chu a fiel ta a.

³² Pathien Lekha a tiem lai chu hi hi a nih:- “That dingin berâm angin ama chu an ṭhuoi a; Berâmtê a hmul vâwtu hmaa a to zing angin, Ama khawmin a bau a ka nawh;

³³ A tlâwm laiin a rorêlna chu lâkpêkin a um a; A thlahai chanchin tuin am hril tâng an ta? Khawvêla inthawkin a hringna an lâkpêk ta si a,” ti hi.

³⁴ Chun, mitillâk chun Philip a biek a, a kuomah, “Zâwlneiin hieng thu hi tû thu am a na a hril, ama thu am a ni, mi dang thu? kân dawn che,” a ta.

³⁵ Philip chun a hril a, chu Pathien Lekha Thu chu a bulah a ṭan a, a kuomah Isu thu a hril a.

³⁶ Chun, lampuia an fe malamin tui umna an tlung a; chun, mitillâk chun, “En ta, hitaka hi tui a um, baptisma chang dingin iengin am a mi hluo a?” a ta.

³⁷ [Chun, Philip chun, “I lungril po poa i ring chun, i chang thei,” a ta. Ama chun, “Isu Krista chu Pathien Naupa a ni ka ring,” a ta, a dawn a].

³⁸ Chun, tawlailîr chu ân ngîrtir a, an pahni chun, Philip le mitillâk chu tuia chun an zu fe a; chun, Philip chun ama chu a baptis ta a.

³⁹ Tuia inthawk chu an hang suok phingleh, Lalpa Thlarau chun Philip chu a lâk hmang ta a; mitillâk chun ama chu a hmu nâwk ta naw a, nisienlakhawm, hlimtakin a fe ta pei a.

⁴⁰ Philip chu miin Azota khuoah an hmu nâwk ta a; chun, a fe thleng a, Kaisari khuo a tlung hmakhat chun, khaw tinah Chanchin Ṭha chu a hril pei a.