THILTHAWHAI 24 - Pathien Lekhabu Inthieng (BSI)

Paula an hêkna thu

¹ Chun, ni nga chenah Thiempu Laltak Anani a hung tlung thla a, upa tuhai amanih leh, a hming Tertulla thuhril thiem pakhat leh; chun, Paula chunga thupawi chu Bawrsâp kuomah an hril a.

² Chun, Paula chu an ko suok hnung chun, Tertulla chun ama a hêk ṭan a, “Felik ṭha tak, nangma zârin thlamuongtakin kan um lei le, i enkawl leia hi chihai ta dinga suolhai chu khap ṭhata a um hlak leiin,

³ kumkhuoin khâwlai khawm lungawitakin kan lâwm hlak.

⁴ Iengkhawm ni sienla, i ta dinga nghawkum taluo ni ka nuom naw a, I nunnêmnain thu baukhat ruok chu mi ngaipêk dingin ka hni che a nih.

⁵ Hi mipa hi mi theidaumtak, khawvêla Judahai po po chawkbuoitu le, Nazareth pâwla a ṭhuoitu pakhat a nih ti kan hriet a.

⁶ Pathien biekin sukthieng naw a tum bawk a, chuleiin, kan man a nih; [kan dân anga a chungthu rêl kan nuom a,

⁷ nisienlakhawm, sipai hotu tak Lusia a hung a, ka kuta mi chu a hung ṭhuoi lui ta a.

⁸ Ama hêktuhai chu i hmaa inlang ding thu a pêk bawk a.] Nang ngeiin suosal la, kan hêkna thil po po hi amaa inthawkin hre thei i tih,” a ta.

⁹ Judahai khawm chun, “Chuong thu chu chuong ang tak chu a nih,” tiin an lo ṭhangpui a.

Felik hmaa Paulain a thiemna thu a hril

¹⁰ Chun, Bawrsâp chun thu hril dinga Paula chu kuta a zâp phingleh, ama chun, “Nang kum tamtak hi chihai rorêl pêktu i nih ti ka hriet leiin lâwmtakin ka thiemna thu ka hril ding a ni hi.

¹¹ Jerusalema Pathien be dinga ka hang fe chen chu ni sâwm le pahni bâk la ni naw nih ti hre thei i tih.

¹² Pathien biekina khawm, inkhâwmna inahai khawm khuoa khawm tukhawm ka sêl le mipui kân fui annîn an mi hmu bawk nawh,

¹³ tu khawm hin an mi hêkna thu hi i hrietah a bula inthawkin sui suok thei bawk naw ni hai.

¹⁴ Nisienlakhawm, hi thu hi i kuomah inphuong ka tih, ‘Chi hran,’ an ti, Lam dân angin ei thlatuhai Pathien ka biek hlak, Dân le zâwlneihai lekhabua ziek po po ringin.

¹⁵ Chun, mi fel le felnaw thonâwkna um a tih ti Pathien tieng ka beisei a, hienghai khawm hin chu chu an awi ve bawk si.

¹⁶ Chuleichun, Pathien kuom tienga le mihriem tienga khawm lungril suol naw mawl hi vawn tlat ka tum hlak.

¹⁷ Chun, kum tamtak hnunga hin ka chipuihai lai thilpêk ding chawiin, inthâwina inhlân dingin ka hung a.

¹⁸ Chuong lai chun, mipui khawm, sukbuoitu khawm um lovin, Pathien biekinah insukthiengin an mi hmu a.

¹⁹ Nisienlakhawm, chutaka chun Asia rama mi Juda tuhai amanih an um kha, chuonghai chun ka chungah thu an nei chun, hitaka hin i hmaa umin an mi hêk ding a nih.

²⁰ Annawleh, hienghai ngei hin rorêltu hmaa ka ngîr lai khan, ka suksuol ieng am an hmu a, hril raw hai se,

²¹ anni laia ngîrin, hi thu baukhat, ‘Mithi thonâwkna thuah vawisûn hin in hmaah suosalin ka um a ni hi,’ ka ti lei kha a ni nghâl naw chun,” a ta, a dawn a.

²² Chun, Felik chun Lam thu chu a hriet fel ta leiin, “Sipai hotu laltak Lusia chu a hung tlung thla pha in thu la rem ka tih,” tiin a sie ta hri a.

Khumlâwknaah Paula an sie

²³ Chun, Paula chu duot deua, a ruolhai rawngbâwlpêk khap lova invêngtir dingin sipai za hotu chu thu a pêk a.

²⁴ Chun, ni iengzât chena manih Felik chu a hung nâwk a, a nuhmei Drusilla Juda nuhmei leh, Paula chu ân kotir a, Krista Isu ringna thu chu a ngai a.

²⁵ Paula chun, felna thu dâm, insûm thu dâm, ro a la rêl ding thu dâm ṭhahnemngaitaka a hril laiin Felik chun ṭium a ti bêk a, “Fe nâwk phawt ta rawh, hun remchâng ka nei pha ko ka ti che,” a ta.

²⁶ Paulain tangka a pêk a beisei bawk a, chuleiin, a ko inzing deu a, a biek hlak a nih.

²⁷ Chun, kum hni ân vawi hnungin Porkia Festain Felik chu a thleng ta a; Felik chun Judahai laia hmingṭhat a nuom a, Paula chu khuop sain a mâksan ta a.