THILTHAWHAI 21 - Pathien Lekhabu Inthieng (BSI)

Turaah Paula a fe

¹ Chun, anni le chun kan inṭhe a, lawngin kan suok a, chu hnunga chun tlûntakin Kos thlierkâr kan tlung a; chun, a zîngah Rodi thlierkâr kan tlung nâwk a, chutaka inthawkin kan fe pei a, Patara kan tlung a;

² chun, Phoiniki ram kai ding lawng pakhat kan hmu a, kan chuong a, kan fe pei ta a.

³ Chun, Kupra thlierkâr kan hmu a, vawitieng panin kan khêl a, Suria ram tieng kan fe pei a, Turaa chun khawmuolah kan suok phawt a; chutaka chun lawnga thuomhnaw thak suok ding a ni a.

⁴ Chun, inchûktirhai kan zawng suok a, chutaka chun ni sari kan châm a. Anni chun, Thlarau hrilin, Paula kuomah, Jerusalem sir lo ding an ta.

⁵ Nisienlakhawm, chuong ni zoa chun kan suok a, kan fe ta a, unauhai chun an rêngin, an nuhmei an nauhai leh khaw kâwl chenin an mi vân thla a; chun, tuipui panga chun kan dingṭhaṭhuon a, kan ṭawngṭai a.

⁶ Chun, “Damtakin”, kan in ti a, lawnga chun kan chuong a; anni ruok chu an inah an kîr nâwk ta a.

Kaisari ramah Paula a fe

⁷ Chun, Turaa inthawka lawnga kan fe zo chun Ptolemai kan tlung a, unauhai chibai kan bûk a, an kuomah ni khat kan châm a.

⁸ Chun, a zînga chun kan suok a, Kaisari kan tlung a, Chanchin Ṭha hriltu Philip inah kan lût a, ama chu pasari hai lai khan pakhat a na, a kuomah kan châm a.

⁹ Ama chun naunuhmei pali a nei a, nunghâk inthieng an nih, Pathien thu an hril hlak a.

¹⁰ Chun, chutaka chun ni tamtak kan châm a, chu lai chun Judai rama inthawkin a hming Agaba, Zâwlnei pakhat a hung thla a.

¹¹ Kan kuomah a hung a, Paula kâwnghrên a lâk a, a kehai, a kuthai ama le ama ân khuop a, chun, “Jerusalema Judahai chun hi kâwnghrên neitu hi hieng ang hin khuop an tih, Jentailhai kutah pe bawk an tih, Thlarau Inthiengin a tih,” a ta.

¹² Chuong thu chu kan hriet phingleh, keini le chu khuoa mihai chun Paula chu Jerusalema hang fe lo dingin kan ngên ta rak a.

¹³ Paula chun a dawn a, “Iem a ta, in ṭap in ṭap a, ka thla in suksie ie! Lalpa Isu hming lei chun Jerusalema khuop chau ni lovin, thi khawm ka huom in sawnnaw,” a ta.

¹⁴ Chun, thlêm ruol a ni naw hnung chun, “Lalpa thu thu ni raw se,” kan ta, kan ma ta a.

Paulan Jerusalema a fena

¹⁵ Chun, chu hnunga chun kan thuomhnaw kan siem a, Jerusalemah kan hang fe a.

¹⁶ Kaisaria mi inchûktir tuhai amanih kan kuomah an fe ve a, anni chun a hming Mnason, inchûktir hmasa pâwl, Kupra thlierkâra mi pakhat, kan tlung-in dingpa chu an ṭhuoi ve a.

Paulan Jakob a va sir

¹⁷ Chun, Jerusalem kan tlung chun unauhaiin hlimtakin an mi lo lâwm a.

¹⁸ A zînga chun Paula rawiin Jakob kuomah kan lût a; chutaka chun kohran upahai po po khawm an um a.

¹⁹ Chun, Paulain anni chibai a bûk zoin, a rawngbâwlna hmanga Pathienin Jentailhai laia thil ân thawtirhai chu a kip a kawiin a hril a.

²⁰ Chun, unauhai chun chuong thu chu an hrietin Pathien an chawimawi a; chun, Paula kuoma chun, “Unau, Judahai laia ringtu tamzie i hmu a; an rêngin Dân chungah ṭhahnem an ngai bawk a.

²¹ Chun, nangin Jentailhai laia Juda umhai po po kuoma chun an nauhai ser tan lo ding le, dân anga um naw ding tiin, Mosie peithlâkna thu în chûktir hlak ti mi bauah an hriet a.

²² Iengtin am ni tâng a ta? I hung tlung ti an hriet ngei âwm si a.

²³ Chuleiin, i kuoma kan hril ang hin thaw rawh: Thutiem nei pasal pali kan kuomah an um.

²⁴ Chuonghai chu ṭhuoi la, anni lai inthien fai ve la, an lu an vaw theina dingin an ta dingin sum sêng rawh: chuongchun, mi po poin mi baua i thu an hriethai kha, a tak a ni naw hrieng an ta, nang ngei Dân hrawin feltakin i um lem a nih hre el an tih.

²⁵ Jentailhai laia ringtuhai thu chu, milim biekna thil fâk kawnga dâm, sa thisen fâk kawnga dâm, sa râkhlum fâk kawnga dâm, indit kawnga dâm an insukthieng ding a nih, tiin ei rêl a, ei ziek ta kha,” an ta.

²⁶ Chun, a zînga chun Paulain pasalhai chu a ṭhuoi a, anni lai ân thienfai ve a, Pathien biekina chun a lût a, an ta dinga sa that seng ding a pêk pêk hmakhat chu inthienfainain an nei hri ding a nih ti, thiempu kuoma chun an hril lâwk a.

Biekina Paula mana a um thu

²⁷ Chun, ni sari chu a tling vângin Asia rama Judahai chun Paula chu Pathien biekinah an hmu a, mipui po po an infui a, ama chu an man a,

²⁸ an khêk a, “Israel mihai, mi ṭhangpui ro, hi mipa hi ram tinah mi po po kuomah, Juda mi dâm, Dân dâm, hi in dâm hi hrilsetu kha a nih; chu naw khawm chu Pathien biekina hin Grik mihai khawm a lûtpui a, hi in inthieng hi a suktirdakum tah a nih,” an ta.

²⁹ (Chu hma chun khuoa chun Ephesia mi Trophim chu a kuomah an hmu a, Paulain ama chu Pathien biekina a lûtpui an ring si a).

³⁰ A khuo chun an inlap ta mer mur a, mihai chu an tlân khâwm a. Paula an man a, Pathien biekina inthawk chun an kei dawk a, kawthai chu an khâr nghâl ta a.

³¹ Chun, ama chu sukhlum an tum lai chun Jerusalema mi po po an buoi ti thu chu sipai pâwl hotu laltak kuom a hang tlung a.

³² Ama chun sipaihai le sipai za hotuhai a ṭhuoi nghâl ta a, an kuomah a tlân thla a. Anni chun sipai hotu laltak le sipaihai an hmu chun Paula vuok chu an ma ta a.

³³ Chun, hotu laltak chun a hung hnai a, Paula a chel a, khaidiet pahni inbuntir ding thu a pêk a; tû am a ni, ieng am a thaw ân dawn a.

³⁴ Chun, mipui lai chun a ṭhen thu pakhatin an khêk a, a ṭhen thu dangin an khêk a. Chu, buoina sosang lei chun a chinchâng a hriet thei naw a, kulbîngah ṭhuoi lût ding thu a pêk a.

³⁵ Chun, Paula kailâwn a tlung laiin mipuiin an thaw nasat leiin sipaihaiin ama chu an dawm kâng pei a;

³⁶ mi po poin, “Sukbohmang ro” tia khêkin an zui hut hut si a.

Paulain a thiemna thu a hril

³⁷ Chun, Paula chu kulbînga chun an ṭhuoi lût ding laiin, ama chun sipai za hotu laltak kuoma chun, “I kuomah thu bau khat hril thei ka ti?” a ta. Ama chun, “Grik ṭawng i hriet maw?

³⁸ Inhmaa mihai infuia, mihriem philhmanghai sângli thlalêra ṭhuoi suoktu Aigupta rama mi kha i ni naw am a nih?” a ta.

³⁹ Paula chun, “Juda mi, Kiliki rama Tarsa khuoa mi ka nih, khaw narâna um ka ni nawh; mi lunginsiet la, mi po po kuomah thu mîn hriltir rawh,” a ta.

⁴⁰ Chun, a remti phingleh, Paula kailâwna chun a ngîr a, mi po po tona dingin kutin a zâp a; chun an to ṭhuop phingleh Hebrai ṭawngin an kuomah: