THILTHAWHAI 19 - Pathien Lekhabu Inthieng (BSI)

Ephesia Paula thuhril

¹ Chun, Paula chu khaw sak biel a fang suok zet a, Apollo Korintha a um kâr khan Ephesi chu a tlung a, inchûktir tuhai amanih a hmu a;

² chun, ama chun an kuomah, “In ring tîr lai khan Thlarau Inthieng in chang am?” a ta. Anni chun a kuomah, “Chang lo, Thlarau Inthieng a um ti khawm kan hriet nawh,” an ta.

³ Ama chun, “Ieng baptisma am in chang a?” a ta. Anni chun, “Johan baptisma,” an ta.

⁴ Chun, Paula chun, “Johan khan chu mi kuomah, ‘Ka hnunga hung ding, (Isu chu) in la ring ding a nih,’ tiin simna baptismain a baptis hlak a ni kha,” a ta.

⁵ Chu thu chu an hriet phingleh, Lalpa Isu hmingin baptisma an chang ta a.

⁶ Chun, Paulain an chungah a kut ân nghat a, Thlarau Inthieng chu an chungah a hung tlung ta a; chuongchun ṭawng hrietnaw haiin thu an hril a, Pathien thu khawm an hril ta a.

⁷ An rêng chun patling sâwm le pahni lai an nih.

⁸ Chun, Paula chu inkhâwmna inah a lût hlak a, thla thum lai huoitakin thu a hril a, Pathien ram kawng thua chun a sêl a, mi ân hmin hlak a.

⁹ Nisienlakhawm, a ṭhen chu an kawmaw a, an awi nuom naw a, mipui hmaah Lam thu chu an hrilsiet phingleh, ama chun anni a fe san a, inchûktirhai chu a kei hran a, ni tin Turanna inchûktirnaah a sêl hlak a.

¹⁰ Chuong ang ruok chun kum hni lai a thaw a; chuongchun, Asia rama um po po, Judahai le Grikhai khawmin, Lalpa thu chu an hriet ta a.

Skeva nauhai chanchin

¹¹ Chun, Pathienin Paula hmangin thilmak chungchuonghai a thaw hlak a.

¹² Chuongchun, rawmawlhai amanih, a pang tâwk fênthuohai chu damnawhai kuomah an hung chawi a, an natnahai a bo hlak a, an sûnga inthawkin khawhrihai khawm an suok hlak a.

¹³ Chun, Juda mi thieminzawr ṭhenkhat, ramtina invâk tuhaiin amanih, “Paulain a thu a ikhêkpui hlak Isu hmingin kan vau che,” tiin khawhri imanhai chungah Lalpa Isu hming an lam hlak a.

¹⁴ Chun, Juda mi, thiempu lal pakhat, Skeva chun chuong ang thaw ve hlak naupasal pasari a nei a.

¹⁵ Nisienlakhawm, khawhri chun an kuomah, “Isu ka awi, Paula khawm ka hriet, nangni ruok chu tuhai am in ni leh?” a ta, a dawn a.

¹⁶ Chun, khawhri iman chun anni a hung baw a, an rêngin a hne a, a ngam ta lem a; chuongchun, chu ina inthawk chun saruok le hliem hielin an tlân suok ta a.

¹⁷ Chuongchun, Ephesia um po po, Judahai le Grikhai kuoma chun, chu thu chu ân thang ta a. Chuongchun, an rêngin an ṭi a, Lalpa Isu hming a lien ta a.

¹⁸ Chunawa khawm, ringtu hung ni tah tamtak chu inpuongin an thil chînghai an hril suok a.

¹⁹ Dawihmang ṭhenkhat khawmin an lekhabuhai an hung chawi khâwm a, mi po po mithmuah an râw ta a; chun a man an sût a, tangka sîng nga man niin an hriet.

²⁰ Chuong ang lâwma nasa chun Lalpa thu chu ân dar a, a hne ta pei a.

Ephesi khuoa buoina

²¹ Chun, chuong zoa chun Paulain, Makedonia ram le Akaia ram chu fang suok phawt a, Jerusalema fe a lungril a, “Chutaka ka fe zo chun Rom ka sir bawk ding a nih,” a ta.

²² Chuongchun, a ṭhangpuitu pahni, Timothe le Erasta chu, Makedoniaah ân fetir zet a, ama ruok chu Asia ramah a um hri a.

²³ Chun, chuong lai vêl chun Lam thu lei chun buoina namên lo a hung suok ta a.

²⁴ Mi pakhat a hming Demetria, tangkaruo suttu, tangkaruoa Diana biekna in siemtu chun, a siemthiemhai kuomah inhlawna tamtak a pêk hlak a.

²⁵ Ama chun anni chu a ko khâwm a, an sinthaw ang thawtuhai leh; chun, an kuomah, “Puhai, hi sin hi ei hausakna a nih ti in hriet.

²⁶ Hitaka Ephesi chaua hin ni lovin Asia ram pumpui deu thawa khawm, hi Paula hin, ‘Kuta siem pathienhai hi Pathien an ni nawh,’ tiin mi tamtak thlêmthlûin a hîp hmang zo tah ti nangni ngeiin in hmuin in hriet bawk a.

²⁷ Chuongchun, ei sinthaw lân a tih ti chau khawm hi ni lovin, pathiennu ropuitak Diana biekin khawm hi hung ngaitlâwm an ta, Asia rama mi po po le khawvêla miin an biek hlak hi, a ropui vei leh, tlâwm a tih ti ṭi a um bawk a nih,” a ta.

²⁸ Chun, chuong thu chu an hriet phingleh an lunginsen ta bêk bêk a, “Ephesia mi Diana hi ropuitak a nih!” tiin an khêk a.

²⁹ Chuongchun, a khuoin an buoi ta a, Gaia le Aristarka, Makedonia rama mi, Paula hnungzuituhai chu an man a, inthuruolin ennuom siemna inah an tlânpui a.

³⁰ Chun, Paulain mipui lai lût a tum chun, inchûktirhai chun an phal naw a.

³¹ Chun, Asia rama hotutakhai laia ṭhenkhat tuhai amanih Paula ruolhai an na, a kuomah mi an tir a, ennuom siemna ina chun lût ṭâl lo dingin an ngên a.

³² Chun, umkhâwmhai chu an buoi a, mi tam lem chun an inkhâwmna san khawm an hriet naw a, chuleiin ṭhenkhat thu pakhatin an khêk a, ṭhenkhat thu dangin an khêk a.

³³ Chun, mipui laia mi ṭhenkhatin an thiemna thu hril dân ding chu Alexandra an hril a, Judahaiin ama chu mi hma tieng chun an nam lût a, Alexandra chun a kutin a zâp a, mi po po kuoma chun an thiemna thu hril a tum a.

³⁴ Nisienlakhawm, ama chu Juda mi a nih ti an hriet phingleh, dârkâr hni lai, rawl inruoltakin, “Ephesia mi Diana hi ropuitak a nih” ti ruokin an khêk a.

³⁵ Chun, khaw lekhaziektuin mipui chu a vaudei zo chun, “Ephesia mihai, Diana ropuitak biekin le vâna inthawka milim tla kha, Ephesia mihai hi a vêngtu in ni ti, tû am a hre naw an um a?

³⁶ Chuongchun, hieng thu hi sêl ruol a ni naw hnung chun in to zing ding a nih, thu dâwn lovin iengkhawm in thaw ding a ni nawh.

³⁷ Hieng mihai hitaka in hung ṭhuoihai hi, biekin suomhmanghai an ni naw a, ei pathiennu hrilsetu hlak an ni bawk nawh.

³⁸ Chuongchun, Demetria le a ruol themthiemhai khawmin tû chunga khawm thupawi an nei chun thupawi hrilna inhai chu hawng zing a nih annâwm, lal aiawtuhai khawm an um a; intlun raw hai se.

³⁹ Thil dang pawi hrim nei in ni chun inkhâwm pângngaiah rem an tih.

⁴⁰ Vawisûna nasêtum lei hin suosal ṭiumin ei um ta hi, a bul um si lovin; chuongchu a ni leiin, hi inkhâwmna san hi iengkhawm ei hril thei âwm naw hi,” a ta.

⁴¹ Chun, chuong ang thu a hril zo chun, umkhâwmhai chu ân ṭintir ta a.