THILTHAWHAI 18 - Pathien Lekhabu Inthieng (BSI)

Paula Korinth khuoah

¹ Chuong thil hnunga chun Paula chu Athenia inthawk chu a suok a, Korinthah a fe ta a.

² Chun, a hming Akuila, Juda pakhat a hmu a, ama chu Ponto rama pieng a nih; Klaudiin Juda po po Roma inthawka suok thu a pêk leiin a nuhmei Priskilla leh Itali rama inthawka hung hlim an nih.

³ Chun, Paula chu anni ina chun a tlung ta a; chun, an sinthaw ang thaw a ni leiin anni a hrawn a, an kuomah a thaw ve hlak a; an sinthaw chu puon in siem a nih.

⁴ Châwlni po leh inkhâwmna inah ṭhahnemngaitakin thu a hril hlak a, Judahai le Grikhai chu inhmin a tum hlak a.

⁵ Chun, Sila le Timothe chu Makedonia rama inthawka an hung thla chun, Paula chu thu hril chauin a um ta a, Isu kha Krista a nih ti Judahai chu a hrilfie a. Nisienlakhawm, an kalin an hrilpâwi a,

⁶ Paulân a puon a thin a, an kuomah, “In thina maw chu nangnîn phur ro, kei chu ka hul a nih, tuta chen chu Jentailhai lai fe tâng ka tih,” a ta.

⁷ Chun, chutaka inthawk chun a fe a, mi pakhat a hming Tita Justa inah a lût a, ama chun Pathien a biek hlak a; a in chu inkhâwmna in bula um nih.

⁸ Chun, Krispa, inkhâwmna hotu chun, a sûnghai po po leh Lalpa an ring a, Korinth khuoa mi tamtak khawmin an hriet a, an ring a, baptisma an chang ta a.

⁹ Chun, zânah Lalpain Paula kuoma chun mang angin, “Ṭi naw la, to lovin thu hril pei rawh,

¹⁰ kei i kuomah ka um annâwm, sukna ding chein tukhawmin i chungah kut thlâk naw ni hai; hi khuoa hin mi tamtak ka nei si a,” a ta.

¹¹ Chun, Paula chu chutaka chun, an kuomah Pathien thu inchûktirin kum khat le thla ruk a um a.

¹² Chun, Gallio, Akaia rama lal aiawa a um laiin Judahaiin inthuruolin Paula an thaw a, rorêlna ṭhungpha hmaah an ṭhuoi a,

¹³ “Hi mipa hrep hin Dân naw anga Pathien be dingin mi a thlêmthlûk hlak a nih,” an ta.

¹⁴ Chun, Paulain a dawn tâwmin, Gallio chun Judahai kuomah, “Judahai, hieng hi thil indiknaw thu amanih bêk ni sienla, matheilovin ngaisak ka ti cheu a;

¹⁵ nisienlakhawm, thuhai, hminghai, nangni dân chung thuhai mei mei a ni chun, nangnîn rêl lem ro; kei chu chuong ang thu chu ngaituo ka nuom naw ie,” a ta.

¹⁶ Chun, rorêlna ṭhungphaa inthawk chun anni chu a hnawt hmang ta a.

¹⁷ Chun, Grik mihai po poin inkhâwmna in hotu Sosthen an man a, rorêlna ṭhungpha hmaa chun an vuok a. Gallio chun chuong an thilthaw chu ienga khawm a ngai nawh.

Antiokeia Paula a kîr nâwk

¹⁸ Chun, chu hnunga chun, Paula chu ni sâwttak a la châm zing a; chu zoa chun, unauhai chu ṭawngbauṭhain a ṭhe a, chutaka inthawk chu Suria ram tieng lawngin a fe ta a, a kuomah Priskilla le Akuila chu an fe ve bawk a; Paulain thutiem a nei leiin Kenkrieiah a lu a vâw zet a.

¹⁹ Chun, Ephesi chu an tlung a, chutaka chun anni chu a mâksan a; ama ruok chu inkhâwmna inah a lût a, Judahai chu Pathien thu a suipui a.

²⁰ Chun, sâwt deu châm dingin an ngên a, nisienlakhawm, a remti naw a,

²¹ “Pathienin a phal chun, in kuomah la hung nâwk ka tih,” tiin ṭawngbauṭhain a ṭhe a; Ephesia inthawk chu lawngin a fe ta a.

²² Chun, lawnga inthawk chu Kaisariah a suok a, Jerusalemah a hang fe a, kohranhai chu chibai a bûk a; chun, chu zoa chun, Antiokeiah a zu fe ta a.

²³ Chun, chutaka chun sâwt rei a um hnungin, a fe nâwk a, inchûktirhai po po sukdetin Galati ram le Phrugia ram chu a fang suok vawng a.

Ephesia Appolo thuhril

²⁴ Chun, Juda pakhat a hming Apollo, Alexandria khuoa pieng, thuhril theitak, Ephesia chun a zu fe a; ama chun Pathien Lekha thuhai a hriet nasa bêk bêk a.

²⁵ Ama chu Lalpa Lam thu inchûktir tah a na, lungrila ṭhahnemngaitak a ni leiin Isu chanchin nguntakin a hril a, ân chuktir hlak a, Johan baptisma thu chau a hriet si a.

²⁶ Chun, inkhâwmna inah huoitakin thu a hril ṭan ta a. Chuongchun, Priskilla le Akuila chun a thu hril an hrietin; an inah an ṭhuoi a, a kuomah Pathien Lam thu fel nâwk zuolin an hrilfie ta a.

²⁷ Chun, ama chun Akaia rama fe kai a tum phingleh unauhaiin an infui a, ama an lo lâwmna dingin inchûktirhai kuomah lekha an ziekpêk a. Chun, a tlung chun, Pathien lunginsietna leia ringtuhai chu nasatakin a ṭhangpui a.

²⁸ Vantlâng hrietin Judahai chu nasatakin a sêldawng a, Pathien Lekha Thu hmangin Isu kha Krista chu a nih ti ân hriettir hlak a.