THILTHAWHAI 14 - Pathien Lekhabu Inthieng (BSI)

Paula le Barnaba Ikoniomah

¹ Chun, Ikonioma chun Judahai inkhâwmna inah an lût rêl a, mi hne thei zâwng taka thu an hril leiin, Grik le Juda mi tamtak ringtu an hung ni ta a.

² Nisienlakhawm, ring nuom naw Judahaiin Jentailhai chu infuipawrin, unauhai chu an intheidatir a.

³ Chuleiin, Lalpa thu huoitaka hrilin chutaka chun sâwt rei an um a, ama chun, inchikna le thilmakhai an kuta inthawtirin, a lunginsiet thu ân hriettir hlak a.

⁴ Chun, khuoa mipuihai chu an inkhing ta a; aṭhenin Judahai chu an ṭan a; aṭhenin tirkohai chu.

⁵ Chun, Jentailhai, Judahai, an hotuhai le chun, tirkohai chu inzakumtaka siem le lunga dêng tuma an thaw ding laiin anni chun an lo hriet a,

⁶ Lukaoni ram bawka chun, Lustra le Derbe khuoa le a vêl ramhaia chun an tlân hmang a;

⁷ chuonga chun, Chanchin Ṭha an hril pei a.

Lustra khuoah Paula lungin an dêng

⁸ Chun, Lustraa chun ke zeng tû amanih a ṭhung hlak a, a pieng tîra inthawk ke inbai hrim a na, kein a lâwn ngai naw a.

⁹ Ama chun, Paula thu hril a ngai a, chun, Paula chun, ama chu a en zing a, damna dingin ringna a nei ti a hriet a,

¹⁰ rawl inringtakin, “I kein ngîr tlûn rawh,” a ta. Chun, ama chu ân châwm tho a, kein a lâwn ta a.

¹¹ Chun, mipuihaiin Paula thilthaw chu an hmu phingleh, Lukaoni ṭawngin inringtakin, “Pathienhai chu mihriem angin ei kuomah an hung ṭum tah a ni hi!” an ta.

¹² Chun, Barnaba chu, “Jupitar” an ti a, Paula chu, thu hriltu lem a ni leiin, “Merkuri” an ti a.

¹³ Chun, Jupitar biekin khawhnâwma um chu, a thiempu chun sebâwng chalhai le, pâr ṭhihrui limhai, kawtkhâr kâwlah a hung lâk a, mipuihai le chun biekna dingin that an tum a.

¹⁴ Nisienlakhawm, tirko Barnaba le Paula chun, chu chu an hriet phingleh, an puon an keithlêr a, mipui lai chun an inchâwm lût a, an khêk a.

¹⁵ “Puhai, iengdinga hieng thilhai hi in thaw am a na? Keini khawm in nungchang ang put mihriem kan ni hi; hieng thil teplohai hi in nghatsan a, vân hai, hnuoi hai, tuipui hai, an sûnga um po pohai siemtu Pathien hring kuoma chun in hung kawpna dingin Chanchin Ṭha kan hung intlun cheu a ni hi.

¹⁶ Chu Pathien chun, tienlaiin hnam tin mâni lampui seng hraw a phal hlak a.

¹⁷ Nisienlakhawm, ama inhriettirna um lovin ân siem ngai nawh. Chuongchun, thil a thaw ṭha hlak a, vâna inthawka ruohai le kum ṭhat kumhai a pêk cheu a, in lungril fâk ding le lâwmnain a suktlaipêk hlak cheu kha,” an ta.

¹⁸ Chun, chuong thu chun, mipuihaiin anni biekna dinga ran an that ding chu an khap zo hrâm a.

¹⁹ Nisienlakhawm, Antiokei le Ikonioma mi Juda tuhai amanih chutaka chun an hung a, mipuihai chu an zâwr thlûk ta a; chuongchun, Paula chu lungin an dêng a, thia an ring leiin khuoa inthawk chu an hnûk dawk ta a.

²⁰ Nisienlakhawm, inchûktirhai chu a vêla an ngîr laiin, a hung tho a, khuoa chun a lût nâwk ta a. Chun, a zînga chun Barnaba leh Derbeah an fe ta a.

²¹ Chu khuohai kuoma chun, Chanchin Ṭha an hril a, inchûktir tamtak an siem hnungin Lustraa hai, Ikonioma hai, Antiokeia hai, an kîr nâwk a.

²² “Rinum tamtak tuorin Pathien ramah ei lût ding a ni hrim a nih,” tiin inchûktirhai lungril an sukdet a, ringnaa chun um zing dingin an infui a.

²³ Chun, kohran tinah upahai an ruot pêk pei a, bu nghei puma an ṭawngṭai zoin, an ring Lalpa kuoma chun an inkawltir pei a.

Suria rama Antiokeiah an kîr nâwk

²⁴ Chun, Pisidia ram chu an fang suok a, Pamphulia ram chu an tlung a.

²⁵ Chun, Pergaa thu an hril zoin Attaliaah an zu fe a;

²⁶ chutaka inthawk chun lawngin an suok a, Antiokei chu an hung tlung nâwk ta a, chu chu a thil thaw zo ta chu thaw dinga unauhaiin Pathien lunginsietna inkawltira an suokna kha a nih.

²⁷ Chun, an tlung hnungin kohranhai chu an ko khâwm a, Pathienin anni hmanga, thil a thawhai po po le, Jentailhai ta dinga ringna kawtkhâr a hawngpêkziehai chu an hril a.

²⁸ Inchûktirhai lai chun sâwt rei an um ta a.