THILTHAWHAI 12 - Pathien Lekhabu Inthieng (BSI)

Jakob thata a um thu le Peter lungin intângna

¹ Chun, chuong lai vêl chun Lal Herod chun kohrana mi ṭhenkhat suknawmnat tumin a kut ân let ta a.

² Jakob, Johan unau chu, kâwlhnâmin a sâthlum a.

³ Chu chun Judahai chu a suklâwm ti a hrietin, Peter khawm chu man a tum nâwk pei a. (Chuong nihai chu Chawlṭhanglo Bei ruoiṭhe ni a nih).

⁴ chun, a man hnung chun intângna inah a khum a, sipai pâwl li, pali seng peiin, ân vêng sâwktir a; Fekân Ruoiṭhe zoa mi po po kuoma ṭhuoi suok a tum a na.

⁵ Chuleiin, Peter chu intângna inah ân umtir hri a; nisienlakhawm, kohranhaiin ama ta dingin ṭhahnemngaitakin Pathien kuomah an ṭawngṭaipêk hlak a.

Peter lungina inthawka a suok thu

⁶ Chun, Herod chun a ṭhuoi suok tâwmin, chu zân tak chun Peter chu sipai pahni inkârah khaidiet pahni bunin a in a, a vêngtuhai khawm kawtkhâr bulah an um a, intângna in chu an vêng a.

⁷ Chun, ngai ta, Lalpa vântirko pakhat a kâwlah a hung ngîr a, rip sûnga chun var ieng amanih a hung var a, Peter nâkah a khîk har a, “Tho vak rawh,” a ta. Chun, a kuta khaidiethai chu a tla ta a.

⁸ Vântirko chun a kuomah, “Dier kei la, i kekawk bun rawh,” a ta. Ama chun chuong ang chun a thaw a. Chun vântirko chun a kuomah, “I puon bât ṭha la, mi zui rawh,” a ta.

⁹ Peter chu a suok a, a zui ta a; vântirko chângzie chu a tak a ni ti a hriet naw a, manga a hmu amanih a sâwn lem a.

¹⁰ Chun, vêngtu hmasa le a dawttu chu an khêl hnung chun, tuol suokna ding thîr kawtkhâr chu an va tlung a, chu chu an ta dingin ân hawng fâwm ta a; an suok a, kawtthlêr pakhat an khêl a; chun, vântirko chun a fe san nghâl ta a.

¹¹ Chun, Peter chu a har phingleh, “Lalpain a vântirko a tir suok a, Herod kut le Juda mihai beiseina po poa inthawkin a mi sandam ti tuhin indiktakin ka hriet tah,” a ta.

¹² Chun, ân ngaituo zo chun, Johan, Marka an ti, chu mipa nu Mari ina chun a va fe a; chutaka chun ṭawngṭaiin mi tamtak an lo um khâwm a.

¹³ Chun, tuolpûk kawtkhâr a hei nawk phingleh, a hming Rodi, nunghâk pakhat, dawn dingin a va fe a.

¹⁴ Peter rawl a hriet phingleh, a lâwm leiin kawt chu hawng lovin a tlân lût nâwk ta lem a, “Peter chu kawtkhâr bulah a ngîr” tiin a va hril a.

¹⁵ Nisienlakhawm, anni chun a kuomah, “în vêt a ni ta hi,” an lo ti a. Ama ruok chu, “Titakzet a nih,” tiin a ṭhang ṭal a. Anni chun, “A vântirko a ni chu,” an ta.

¹⁶ Nisienlakhawm, Peter chun a nawk zing a; chun, an hei hawng chun, ama chu an hmu a, mak an ti hle a.

¹⁷ Chuongchun, ama chun an tona dingin kutin a zâp a, Pathienin intângna ina inthawka a ṭhuoi suokzie chu a hril ta a. Chun, “Hieng thu hi Jakob le unauhai kuomah va hril ro,” a ta. Chun, a suok a, ram dangah a fe ta a.

¹⁸ Chun, nisa a suok phingleh, sipaihai chu, “Peter khâwlai am a um ta a?” tiin buoi namênin an buoi naw a.

¹⁹ Herod chun a zawng a, a hmu si naw a, a vêngtuhai chu a suosal a, sukhlum dingin thu a pêk ta a. Chun, Herod chu Judai rama inthawkin Kaisari khuoah a zu fe a, chutaka chun a um zing a.

Herod thi thu

²⁰ Herod chu, Tura le Sidon khuoa mihai chunga chun a lungninaw bêk bêk a. Anni chun, Blasta, lal khum vêngtu chu, an ruolah an siem a, inthuruolin a kuomah an hung a, an khuo tiengin lal khuo tienga pûr inchaw hlak an ni leiin inrem an ngên a.

²¹ A ni tiem ni chun, Herod chun lal puon a sil a, lalṭhungphaah a ṭhung a, an kuomah thu a hril a.

²² Mi po po chun, “Pathien rawl a ni hi, mihriem rawl a ni naw hi,” an ta, an khêk a.

²³ Ama chun Pathien kuomah chawimawina chu a pêk naw leiin kârlovin Lalpa vântirkoin a man a, rulrukûtin a fâk a, a thi ta a.

Barnaba le Saula

²⁴ Pathien thu ruok chu, ân dâr a, a pung ta pei a.

²⁵ Chun, Barnaba le Saula chun, rawng chu an bâwl zo chun, Jerusalema inthawk chun an kîr nâwk ta a, Johan, Marka an ti chu an kuomah an ṭhuoi ve a.