ṬAP HLA 5 - Pathien Lekhabu Inthieng (BSI)

Zângaina ngênna

¹ Aw Lalpa, kan chunga thil hung tlung hi hre zing rawh; Ngai la, kan muolphona hi en ta.

² Kan rochan chu hnam danghai taah ân chang a, Kan inhai chu ram dang mihai kuomah.

³ Fahrahai le pa nei lohai kan na, Kan nuhai chu hmeithai ang an nih.

⁴ Kan tui chu tangka manah kan dâwn a, Kan thinghai khawm chu kan kuoma zawrin a um a.

⁵ A mi hnawttuhai chun kan rîngah an mi man a; Kan sâwl hle a, châwl kan hmu nawh.

⁶ Kut chu Aigupta mihai kuomah kan daw a, Assuria mihai kuoma leh, beia suktlai dingin.

⁷ Kan thlatuhai chu an lo suol ta a, an um ta naw a, Keiniin an khawhlona chu kan phur a nih.

⁸ Siehlawhai chun kan chungah ro an rêl a, An kuta inthawka mi sansuok ding tukhawm an um nawh.

⁹ Kan bei chu kan hringna lungngaithlâk leh kan hlaw a; Thlalêra kâwlhnâm lei chun.

¹⁰ Kan vun chu ṭâmna kâng lumna lei chun, Meithuk ang elin a lum a.

¹¹ Nuhmeihai chu Zionah suollui an ni a, Nunghâkhai chu Juda khawpuihaiah an suollui a.

¹² Lal nauhai chu an kut ngeiin an khâi hlum a; Upahai hmâi inzâna hrim a um nawh.

¹³ Tlangvâlhai chu bu râwt dingin an lâk a, Naupanghai chu thing puta pêm ṭâng ṭângin an tlu a.

¹⁴ Upahai chun dai kawtkhâr an rielsan a, Tlangvâlhai chun an rimawihai chu an tâwpsan a.

¹⁵ Kan lungril hlimna a bo a, Kan lâmna chu lusûnaah ân chang a.

¹⁶ Kan lua inthawk lallukhum chu a tla a, Kan chung a va rik de! kan lo suol ta si a.

¹⁷ Hi lei hin kan lungril chu a chau a; Hieng thilhai lei hin kan mithai chu ân thim a.

¹⁸ Zion tlâng chu râusana umin, Sihalhai chu a chungah an inlawn a.

¹⁹ Aw Lalpa, nang chu kumkhuoin i um zing a; I lalṭhungpha khawm chu suon khata inthawka suon dang chenin a nih.

²⁰ Iengdinga keini mi theinghil kumkhuoin, Chuong chen lâwm lâwm iengdinga mi nghatsan el am i na?

²¹ Aw Lalpa, i kuom tieng mîn nghat kîrtir nâwk la, hung ngha kîr el kan tih, Tienlai hun ang khan kan nihai hung sukthar rawh!

²² Annawleh, nangin i mi hnâwl let dêr el am a nih? Kan chungah i lung a sen êm êm el am a nih?