ṬAP HLA 2 - Pathien Lekhabu Inthieng (BSI)

Zion lung inrimnahai chu Lalpaa inthawk an nih

¹ Zion naunu chu Lalpa chun a lunginsena iengtiziea sûmpuia ân khum am a na! Israel mawina chu vâna inthawkin hnuoiah a hung pei thlâk a; A lunginsen nia chun a ke innghatna khawm chu a hriet zing ta nawh.

² Lalpa chun Jakob ram hluohai po po chu a lem zo vawng a, a lunginsiet nawh, Juda naunu kul dethai chu a lunginsen chun a keichim a; Hnuoiah a hung tethlûk a; Lalram le lalhai khawm chu a suktlâwm ta a.

³ Lunginsenna ṭiumtakin Israel ki po po chu a sât thlâk a; Hmêlma hmaa inthawkin a kut changtieng chu a keitîm a; Meichawk angin Jakob chu, arêng arama kâng hmangin a raw ta a.

⁴ Hmêlma angin a thalngul chu a kuoi a, hmêlma angin a kut changtiengin a ngîr a, Zion naunu puon ina mita hmu inhâwkumhai po po chu a that vawng a; A lunginsenna chu mei angin a bunthlâk a,

⁵ Lalpa chu hmêlma ang a hung ni ta a, Israel a lem zo a; A in ropuihai po po a lem zo a, a kul dethai a sukchim a, Juda naunua chun sûnna le lusûnna a sukpung bawk a.

⁶ A biekbûk chu huon ang elin, a lâk hmang luipêk a; Ân khâwmna hmun chu a suksiet bawk a; Lalpa chun Zionah, inkhâwmpui hunbi neihai le châwlnihai chu theinghila um dingin a siem a, A lunginsenna nasatna chun a thiempu le lal chu a hmusit ta a.

⁷ Lalpa chun a maichâm chu a peihâwnpêk a, a hmun inthieng khawm chu a sukthim a; A in ropui kulhai chu hmêlma kuta chun a pêkpêk bawk a. Inkhâwmpui hunbi nei nihai ang elin, Lalpa ina chun an khêkri chêl chûl a,

⁸ Lalpa chun Zion naunu kul chu suksiet a tum ta a; Rînin ân khi vawng ta a, suksietnaa inthawk chun a kut keitîm ta naw ni; Kul le a daihai chu ân sûntir a, an ngui hmunkhat ve ve a.

⁹ A dâi kawtkhârhai chu hnuoiah an tlumhmang a; a kalna thîrhai chu a suktliekin a suksiet ta a; A lal le hotuhai chu dân um nawnaa hnamhai laia chun an um a; Anih, a zâwlneihai khawma Lalpaa inthawka thilhmulâwk an hmu ta nawh.

¹⁰ Zion naunu upahai chu hnuoi chungah an ṭhung a, an to ṭawk ṭawk a; An luhai chunga chun pilvut an vânvawr a; saiip puonin an inthuom a; Jerusalem nunghâkhai khawm hnuoi tieng an luhai an kûn el a nih.

¹¹ Ka mithai chun mitthli a tlasam hiel a, ka sûng tieng a buoi zo a, Ka mîtkhâ chu hnuoi chungah bunthlâkin a um a, ka mihai naunuhai suksietna lei chun; Naupang dâwnghai le nêne ne laihai chu kawtthlêrhaia chun an inkawn el a.

¹² An nuhai kuoma chun, “Bu le uoin khâwlai am a um a?” an ti a, Khawpui kawtthlêrhaia hliem anga an inkawn el lai le, An thlahai chu an nuhai ângsûnga an hringna a ṭuoi ral lai chu.

¹³ Ieng am inhriettir ka che a, ieng lêm hrilkhîng ka ti che a, Aw Jerusalem naunu? Nang chu ka thlamuon theina ding chein, ieng tluk chau am ka ni ding a na, Aw Zion naunu nunghâk? I sietna chu tuisuoriet angin a lien a, tuin am sukdam thei a ti che a?

¹⁴ I zâwlneihai hlakin invêtna le teplo mei mei thilhmulâwkhai chu an hmupêk che a; I sal nina hung lakîr dingin, i suolna hlak an hmusuok thei si naw a. Nanga ta dingin hlêmna le, teplo thu mei mei chau chu an hmupêk che a.

¹⁵ Mi fe inlawnhai po po chun an kuthai an ben khum che a, Jerusalem naunu chunga hin an sisi a, an luhai an thin a, “Hi hi a ni maw mihaiin, Mawina famkimna, Leihnuoi po poa khawpui an ti chu?,” tiin.

¹⁶ I hmêlmahai po po hlaka an bauhai an kâk khum pêkpûk che a; An sisi a, an ha an rawt a, “Ama chu ei lem zo tah, Ah, hi ni hi annâwm ei thlîr zing kha, ei hmusuok ta a, ei hmu ta hi,” an ti a.

¹⁷ Lalpa chun thaw a itum chu a thaw ta a; Tienlai nihaia thu a pêk thuhai chu a hung sukpuitling ta a; A pei thlâk ta a, a lunginsiet naw a; Hmêlmahai chu lâwmin a siem ta a; I hmêlmahai ki chu a chawimawi ta a ni hi.

¹⁸ An lungril chu Lalpa kuomah a khêk a; Aw Zion naunu kul, sûn le zânin mitthli chu vadung angin inluongthlâktir rawh; Sâwldamna chu nang le nang inpe naw la; i mitthli luong chu ma naw raw se.

¹⁹ Tho la, vêng ṭantirna huna chun, zânah khêk rawh; Lalpa hmaihmaa chun i lungril chu tui angin bunthla la, I nau le têhai hringna dingin ama tienga chun i kuthai phar rawh, Chuong kawtthlêr tâwp tina phîngṭâma châuhai ta ding chun.

²⁰ En ta, Aw Lalpa, ngai ta, hienga an kuoma i thawnahai hi! Nuhmeihai chun an rîla ra, naupanghai, kuta tâwma umhai chu, an fâk el ding maw? Lalpa hmun inthienga chun zâwlnei le thiempu chu that an ni el ding maw?

²¹ Mi a naupang le upa khawm chu kawtthlêra chun hnuoiah an zâl a; Ka nunghâkhai le ka tlangvâlhai chu kâwlhnâmah an tlu a; I lunginsenna nia chun anni chu i sukhlum a, Anni chu i that a, i lunginsiet naw a,

²² Inkhâwmpui hunbi neihai nia angin, “Ka lunginsenna chu kil tinah,” tiin nang chu i khêk a, Lalpa lunginsenna nia chun a pumpel amanih, a um zing amanih tukhawm an um nawh: Ka tâwm a, ka dawn tleihai chu ka hmêlma chun a sukbohmang zo ta a.