ṬAP HLA 1 - Pathien Lekhabu Inthieng (BSI)

Sala um Zion lunginrimnahai

¹ Iengtiziea khawpui khânga mipuia sip kha khawsâwta ṭhung el am an ta a! Hnamhai laia khânga ropui kha, iem a tia hmeithai ang a hung ni ta el chu! Rambunghai laia a lalnu ni hlak kha, chîn lem a hung ni ta el chu!

² Zâna chun a ṭap ngâwi ngâwi a, a mitthli chu a bienga chun a luong a, A hmangaituhai po po lai tukhawm ama thlamuongtu ding a nei nawh; A ruolhai po po chun khawhlotakin ama an sawisak a; A hmêlmahai an hung ni vawng el ta ie.

³ Sukrinumna le sal nina nasatakah Juda chu salin a fe ta a, Awi naw mihai laia chun a khawsa a, châwl hrim a hmu nawh; Ama sukrimsituhai po po chun hmun inchêptakah an nangchîng a.

⁴ Inkhâwmpui hunbi neia chun tukhawm an hung naw leiin Zion lampui chun a sûn a, A dai kawtkhârhai po po chu râusanin a um a, a thiempuhai chu an inrûm a; A nunghâkhai chu sukrinumin an um a, ama khawm chu khâknaa chun a um a.

⁵ A khingtuhai chu lu an hung na, a hmêlmahai chu an hung hlawtling a; A bawsietna tamtak el lei chun Lalpain ama chu a sukrimsi si a, A nau le têhai chu a hmêlmahai hmaa chun salah an fe a.

⁶ Zion nâunua inthawk chun a lal nina po po a fe hmang a, A lalhai khawm sakhi hlo petna ding hmu lohai ang an ni zo a; Anni hnawttuhai hmaa chun hrâtna neilovin an tlân a.

⁷ Jerusalem chun sukrinuma a um nihaia le, a rimsik nihaia chun, a hriet zing, A tienlai inhawitirna po po kha; A mipuihai chu hmêlma kuta an tlûk lai chun an ṭhangpui naw a, Hmêlmahai chun an hmu a, râusana a umnaa chun an nuisan a.

⁸ Jerusalem chu lungngaithlâktak elin a lo suol ta a; chuleiin, thil thieng naw ang a hung ni ta a; A saruokna chu an hmu leiin, ama lo inza hlaktuhai po po khawm khan an hmusit ta a; Anih, ân rûm a, nawtieng a ngha a.

⁹ A tirdakumna chu a puonah a kai a, a tâwpna ding hrim a ngaituo nawh, Chuleiin, maktakelin a tlâwm a, thlamuongtu hrim a hmu nawh; En ta, aw Lalpa, ka rimsikzie hi, ka hmêlma chu ama le ama ân chawimawi si a!

¹⁰ Hmêlma chun a thil hluhai po po chungah a kut a phar a, Awinaw mi chu a hmun inthiengtaka chun a lût ti a hmu si a, I mipui inkhâwmnaa lût lo dinga i khaphai ngei kha.

¹¹ A mihai po po chu an thuok dawngin bei an zawng a, An thil hluhai chu an hringna sukhrâtna dingin bu manah an pêk a; Aw Lalpa, ngai la, en ta, hmusitum ka lo ni ta hi.

¹² Nangni a fe inlawn po pohai, in ta dingin iengkhawm a ni naw maw? Ngai unla, ka kuoma thaw anga, ka lungngaina ang hrim hi lungngaina a um am en ta u, Lalpain a lunginsenna ṭium nia a mi sukrinumna ang hi.

¹³ Chungtienga inthawkin ka ru sûngah mei a hung tir a, anni chu a hne ta a, Ka kehai ta dingin lên a pha a, a mi keikîr ta a; Râusanah a mi siem a, chauin ka um ni tin a.

¹⁴ Ka bawsietnahai chu rîngkawlah a khitde a, Ama kuthai ngeiin a khit têl a; Ka rîngah ân bâttir a, ka hrâtna a châu ta a, Ka ido zo lohai kutah Lalpa chun a mi pêk ta a.

¹⁵ Keimaa ka mi hrâthai po po chu Lalpa chun iengkhawm loah a siem a, Ka tlangvâlhai sukse dingin ka chungah pungkhâwmhai a ko a; Juda nau nunghâk inthieng chu Lalpa chun uoin sâwrnaa angin a chîl a.

¹⁶ Hieng thilhai lei hin ka ṭap a; ka mit chu tuiin a luongthla a, Thlamuongtu ka lungril sukhartu ding kha keimaa inthawka a hlat êm leiin. Hmêlmahai chun an hne ta leiin, ka nauhai chu râusanin an um ta a.

¹⁷ Zion chun a bânhai a phar vêl a, ama thlamuongtu ding tukhawm an um nawh, Lalpa chun Jakob chungthua chun, ama vêl hnaia umhai po chu a hmêlmahai nîng an tih tiin thu a lo pêk ta a; Jerusalem chu anni laia chun thil thiengnaw ang a lo ni tah.

¹⁸ Lalpa chu a fel a nih; a thupêk dodâlin ka hel si a; Ngai ta u, ka ngên cheu, nangni hnam po pohai, ka lungngaina hi en ta u, Ka nunghâkhai le ka tlangvâlhai chu salah an fe ta a.

¹⁹ Ka hmangaituhai chu ka hei ko a, nisienlakhawm, an mi hlêm a, Ka thiempuhai le ka upahai chu khawpuia chun an bohmang ta a, An hringnahai sukhrât dinga bu an zawng lai chun.

²⁰ Ngai ta, aw Lalpa, rimsiin ka um hi; ka phîng sûng a buoi zo tah; Ka lung chu ka sûnga chun ân her a, khawhlotakin ka lo hel ta si a; Kawtthlêra chun kâwlhnâm chun a sukfahra a, ina chun thina a um a.

²¹ Ka thuok dawngna chu an hriet a, a mi thlamuong ding tukhawm an um nawh; Ka hmêlmahai po po chun ka buoina chu an lo hriet a, nangin i thaw a ni leiin an lâwm a; Ni i puong ta chu la hung intlungtir i ta, anni khawm keia ang bawk nîng an tih.

²² An khawhlonahai po po chu i hmaa chun hung tlung sienla, Ka bawsietnahai po po leia ka chunga i thaw ang khan an chunga khawm thaw ve rawh. Ka thuokdawngnahai chu tamtak an na, ka lungril khawm a chau a nih.