RUTH 1 - Pathien Lekhabu Inthieng (BSI)

Ruth le Naomi Moaba inpêmna

¹ Rorêltuhaiin ro an rêl laiin chu rama chun ṭâm a hung tla a, chun, Juda ram Bethlehema mi pakhat Moab rama um dingin, ama le a nuhmei le a naupasalhai pahni chu an fe a.

² Chu mipa hming chu Elimelek a nih, a nuhmei hming chu Naomi, a naupasalhai pahni hming chu Mahlon le Kilion an nih; Juda ram, Bethlehema Ephrath mi an nih. Moab rama chun an fe a, chutaka chun an um ta zing a.

³ Nisienlakhawm, Elimelek, Naomi pasal chu, a thi a, amanu le a naupasalhai pahni chau chu an um ta a.

⁴ Chuhai chun Moab nuhmeihai nuhmeiah an nei a, pakhat hming chu Orpah a ni a, pakhat dang hming chu Ruth a nih. Chutaka chun kum sâwm lai an um a.

⁵ Chun, Mahlon le Kilion chu an thi ve ve a; chuongchun, Naomi chu a naupasalhai pahni le a pasal chun an thi san ta a.

In tienga kîr nâwk dinga insukthlûkna

⁶ Chun, Moab rama inthawkin, Lalpain a mihai chu kanin fâk ding a pêkzie thu a lo hriet leiin, Naomi chu a mohai pahni leh Moab rama inthawk kîr nâwk dingin ân thawk suok a.

⁷ Chuongchun, a umnaa inthawk chun a mohai pahni le chun a suok a, Juda rama kîr nâwk dingin an fe ta a.

⁸ Chun, Naomi chun a mohai pahni kuoma chun, “Fe unla, in nuhai in ve veah kîr nâwk el ta ro; mithihai chunga le ka chunga in thaw ang tak hin, Lalpain in chungah ngilneitakin thaw ve raw se.

⁹ Pasal dang ina khawsakna in tuok ve ve theina dingin Lalpain ngaituopêk raw se cheu,” a ti a. Chuongchun, a fâwp a, râwl insuo meuin an ṭap ta rak el a.

¹⁰ Anni chun, “Ni lo e, i chihai kuoma i kîrnaa chun hung zui kan ti che,” an ti a.

¹¹ Naomi chun, “Ka naunuhai, kîr nâwk lem ro, iengdingin am mi zui in ti a? In pasal ding naupasalhai ka la vawn zing am a nih?

¹² Kîr nâwk unla, ka naunuhai, fe el lem ro, pasal hang nei dingin ka upa taluo ta si a. Beiseina ka la nei tiin, vawizân hin pasal nei elin naupasalhai nei ding hrim lang khawm,

¹³ an puitling chenin in nghâk el ding am a nih? Chu chu lei chun pasal nei lovin in um el ding am a nih? Ni lo e, ka naunuhai, ka chunga Lalpa kut hieng anga a hung tla ta hi, nangni ta ding hin ka lung a na bêk bêk a nih,” a ti a.

¹⁴ Chuongchun, an râwlhai insuo meuin an ṭap rak rak nâwk a; chun, Orpah chun a tarpinu chu a fâwp a, Ruth ruok chun amanu chu a chel tlat a.

Ruth-in Naomi a mâksan nuom nawh

¹⁵ Chun, amanu chun, “En ta, i mo chanpuinu chu a chihai kuoma le a pathien kuoma chun a kîr nâwk ta a, nang khawm i mo chanpuinu zuiin kîr nâwk el raw aw,” a ti a.

¹⁶ Nisienlakhawm, Ruth chun, “Nang kîrsan ding che le zui lo ding chein mîn fui naw rawh; i fena phawtah fêng ka ta, i riekna phawtah riek ka ta, i chihai chu ka chihai nîng an ta, i Pathien chu ka Pathien nîng a ta;

¹⁷ i thinaa chun thîng ka ta, chutaka chun phûmin um ve el ka tih. Nang le kei hi thina chau naw thil dangin a mi ṭhe ding chun Lalpain a law law mi law el sienla, chu nêka nasa khawmin,” a ti a.

¹⁸ Naomi chun ama zui a tum tlat a nih ti a hrietin a tosan ta a.

¹⁹ Chuongchun, an pahni chun Bethlehem chenin an fe ta a. Bethlehem an tlung chun anni lei chun a khaw phêkin an inhnîng ta sup sup el a; chun, nuhmeihai chun, “Hi hi Naomi kha a ni maw?” an ti a.

²⁰ Ama chun an kuomah, “Naomi mi ti naw ro, Marah mi ti lem ro, Iengkimthawthei chun lungsietthlâktakin a mi thaw ta si a.

²¹ Buriptakin ka suok a, Lalpa chun kutbenthekin a mi ṭhuoi kîr nâwk a ni hi: Lalpa chun ka chungah a lungninawna a suklang a, Iengkimthawthei chun a mi sukrimsi ta hnungin, iengdinga Naomi in mi la ti rawp am a na?” a ti a.

²² Chuongchun, Naomi chu a hung kîr a, a monu Moab mi Ruth leh, Moab rama inthawk a hung kîr a nih. Bethlehem chu buṭei sîk hun ṭantirin an hung tlung a nih.