RORELTUHAI 9 - Pathien Lekhabu Inthieng (BSI)

Abimelek rorêl sûng

¹ Chun, Jerubbaal naupa Abimelek chu Sekema a nu ṭahai kuomah a fe a, anni le a nu pa pahnamhai po po chu a biek a,

² “Sekema mihai po po na hrietah thu hril unla, ‘Jerubbaal naupasal mi sâwmsarihaiin in chunga ro an rêl am ṭha lem in tih, mi pakhatin in chunga ro a rêl?’ ti ro khai; chun kei khawm in ru le in taksa ka nih ti hi hre zing bawk unla,” a ti a.

³ Chun, a nu ṭahai chun Sekema mihai po po na hrieta chun chuong thu po po chu an hril a; chuongchun, Abimelek zui nuomna lungril an lo put ta a, “Ama chu ei unaupa a nih annâwm,” an ti leiin.

⁴ Chun, Baal-berith ina inthawkin tangka sâwmsari an pêk a, chu chun Abimelek chun mi hotak tak le mi rura tak takhai a ruoi a, anni chun ama chu an zui ta a.

⁵ Chun, Ophra khuoa a pa ina chun a va fe a, Jerubbaal nauhai, a unauhai sâwmsari chu lung pakhat chungah a that tâwl a; Jerubbaal naupa a naupang tak Jotham ruok chu a lo inbi hlau leiin a that naw a.

⁶ Chun, Sekema mi po po le Bethmiloa mi po po chu an pung khâwm a, Sekema lungphun bul thingsaisuo kâwla chun, Abimelek chu lalah an siem ta a.

⁷ Chun, chu chu Jotham an hril chun Gerizim tlâng sîpah a hang ngîr a, râwl inringtakin a khêk a, an kuomah, “Nangni Sekema mihai, ka thuhril hi ngai ta u, chuongchun, Pathien khawma in thu a lo ngai ve ding a nih.

⁸ Vawikhat chu thinghai hi an lal ding hriek nâl dingin an va fe suok tâwl a, Oliv thing kuoma chun, ‘Nang kan lal dingin um ta la,’ an ti a.

⁹ Nisienlakhawm, oliv thing chun an kuomah, ‘Pathien le mihriem chawimawi phâna dinga an mi hmangna tak ka hriek hi suoksanin thinghai chungah khingtieng khingtieng ka kûr vêl el ding maw chu?’ a ti a.

¹⁰ Chun, thinghai chun theichang kûng kuomah, ‘La hung ta, nang kan lalah ṭhung rawh ie,’ an ti a.

¹¹ Nisienlakhawm, theichang kûng chun an kuomah, ‘Ka thlumna le ka ra ṭhatak hi suoksanin thinghai chungah khingtieng khingtieng ka kûr el ding maw chu?’ a ti a.

¹² Chun, thinghai chun grêphrui kuomah, ‘La hung ta, nang kan lalah ṭhung rawh ie,’ an ti a.

¹³ Grêphrui ruok chun an kuomah, ‘Pathien le mihriem suklâwm hlaktu ka uoin hi suoksanin thinghai chungah khingtieng khingtieng kan zâm el ding maw chu?’ a ti a.

¹⁴ A tâwpa chun thinghai po po chun hling kuomah, ‘La hung ta, nang kan lalah ṭhung rawh ie,’ an ti a.

¹⁵ Hling chun thinghai kuoma chun, ‘In lal dinga hriek mi nâl takzet in ni chun ka hlima hin hung inbi ta unla, in ni naw ruok chun hlinga inthawka mei hung suokin, Lebanon tlânga sidar thinghai chu kâng zo vawng raw se,’ a ti a.

¹⁶ Tuhin Abimelek in lal dinga in lo siem ta hi thaw takzet le feltaka thaw in ni a, Jerubbaal le a sûnghai chu ṭhataka in thaw a, a phu ang peia a chunga lo thaw in ni a,

¹⁷ (ka pa hin râl a lo dopêk cheu a, a lo thi pha hiel a. Midianhai kuta inthawk chun a lo sansuok ta cheu a;

¹⁸ vawisûn hin ka pa sûnghai chunga chun in lo hel a, a naupasalhai sâwmsari zet lung pakhat chungah in lo sukhlum a, in unaupa a ni leiin a suoknu naupa Abimelek hi Sekem khuo mihai lalah in hung siem ta si a;)

¹⁹ vawisûn hin Jerubbaal le a sûnghai chunga thaw takzet le feltaka thaw in ni chun chu, Abimelek chunga hin lâwm ro; chun, ama khawm in chungah lâwm raw se;

²⁰ chuong ang chu a ni naw ruok chun, Abimeleka inthawk hin mei hung chawk suok sienla, Sekema mihai le Beth-miloa mihai chu kâng zo vawng sienla, Sekem le Beth-milo mihaia inthawk mei hung chawk suok sienla, Abimelek chu kâng zo vawng bawk raw se,” a ti a.

²¹ Chun, Jotham chu a tlân hmang a, Beerah a tlân a, a unaupa Abimelek chu a ṭi leiin chutaka chun a um ta zing a.

²² Chun, Abimelek chu Israelhai chunga chun kum thum ân lal a.

²³ Chun, Pathienin Abimelek le Sekema mihai kâra chun lungril suol ân umtir a, Sekema mihai chun Abimelek chunga chun vervêktakin an thaw ta a.

²⁴ Chu chu Jerubbaal naupasalhai sâwmsari chunga nunsetaka an thaw leia an chunga phuba lâkna a hung tlung theina ding le, anni thattu an unaupa Abimelek chunga le a unauhai that dinga a kut lo sukhrâttu Sekem mihai chunga an thisen a um theina dingin a nih.

²⁵ Chun, Sekem mihai chun tlâng sîphaiah ama inchânrutuhai an sie a, chu lampuia fe taphawt chu an lo suom hlak a, chu thu chu Abimelek chu an hril a.

²⁶ Chun, Ebed naupa Gaal, a unauhai leh an hung inthawk a, Sekemah an lût a, Sekem mihai chun an lo ringzo hle a.

²⁷ Chuongchun, lo tieng an fe a, an grêphai chu an lo a, an chîl a, ruoi an ṭhe a, an pathien inah an lût a, an fâkin an dâwn a, Abimelek chu an deusaw a.

²⁸ Ebed naupa Gaal chun, “Abimelek chu tu am a na? Sekem khawm tu am a ni a, keinin a rawng kan hei bâwl el ding chu? Jerubbaal nau a ni naw am a nih? Zebul hi a khâwnbâwl a ni naw am a nih? Sekem pa Hamor mihai rawng chu bâwl el nâwm ei ni, iengdingin am ama rawng chu bâwl ei ti leh?

²⁹ Hienghai rawi hi ka thuin hang um hai sien chu aw; Abimelek hi ka hang suktlâwm dêr el ding bah,” a ti a. Chun, Abimelek kuoma chun, “Sipaihai sukpung la, hung inthawk raw khai,” a ti a.

³⁰ Chun, chu khuo rorêltu Zebul chun Ebed naupa Gaal thuhril a hriet chun a lo lunginsen ta thut a,

³¹ chuongchun, var vervêkin Aruma-a Abimelek kuoma chun, “Ngai ta, Ebed naupa Gaal le a unauhai Sekemah an hung a, i chunga helpui tumin khuoa mihai an infuipawr a.

³² Chuleiin, tuhin azân azânin i rawihai leh hung inthawk unla, phûlah lo inchân ro,

³³ chun, zingkâr nisa suok hlimin tho la, khuo chu hung thaw el rawh; chun, ngai ta, ama le a rawihai chun an hung thaw ding pha che, remchâng i ti ang peiin an chungah lo thaw el rawh,” tia hril dingin mihai ân tlântir a.

³⁴ Chuongchun, Abimelek le a rawihai po po chu azân azân chun an tho a, pâwl lia insiemin Sekem chu an inhuol ta a.

³⁵ Chun, Ebed naupa Gaal chu a va suok a, khawpui lûtna kawtkhâra chun a va ngîr a; chun, Abimelek le a rawihai chu an inchân rûknaa inthawk chun an hung suok a.

³⁶ Gaalin mipuihai a hang hmu chun Zebul kuomah, “En ta, tlâng sîpa inthawkin mipui an hung suok ie,” a ti a. Zebul chun, “Tlâng hlim saw mihriem angin i hmu ning a tie,” tiin a dawn a.

³⁷ Gaal chun, “En hrim ta lân am ie, ram lai taka saw mipui an hung suok ie, pâwl khat lem chu Meonenim thingsaisuo lampuiah an hung saw,” a ti nâwk a.

³⁸ Chu phingleh Zebul chun a kuomah, “Tu am ie, Abimelek a rawng ei ibâwl ding chu? tia i hrilna bau kha khaw lai am a um ta leh? Hienghai hi i mi hmusithai ngei kha ni lo am an nih? Va suok la, va thaw mawl raw khai,” a ti a.

³⁹ Chuongchun, Gaal chun Sekem mihai hma chu a va ṭhuoi a, Abimelek chu a va thaw ta a.

⁴⁰ Abimelek chun ama chu a lo hnawt a, a tlânse ta a; khawpui lûtna kawtkhâr chenin mi tamtak hliemin an tlu phung el a.

⁴¹ Chun, Abimelek chu Aruma khuoah a um ta a, chuongchun, Zebul chun Gaal le a unauhai chu Sekema um thei lo dingin a hnawt suok ta vawng a.

⁴² A zinga chun mipui chu phûla hin an va fe suok a, Abimelek chu an va hril a.

⁴³ Chun, a mihai a ṭhuoi a, pâwl thumah a siem a, phûla chun an inchân a; chun, a hei thlîr a, khawpuia inthawka mihai hung suok chu a hei hmu a, chun a tho a, anni chu a lo thaw a, a that tâwl a,

⁴⁴ Abimelek le a pâwlhai chun an lo baw a, hmatieng an nawr peia khawpui lûtna kawtkhârah an va ngîr a, chun, pâwl hnihai chun phûla umhai po po chu an baw a, an that tâwl ta a.

⁴⁵ Abimelek chun khawpui chu chu ni chun sûnnithlâkin a thaw a, khawpui chu a lâk a, a sûnga mihai chu a that a, khawpui chu a suksiet vawng a, machiin a the ta a.

⁴⁶ Sekem kula um po pohai chun chu thu chu an lo hrietin Elberith kulbînga chun an lût ta vawng a.

⁴⁷ Chun, Sekem kula chun mi po po an um khâwm vawng ti Abimelek chu an hril a.

⁴⁸ Abimelek le a kuoma umhai po po chu Zalmon tlângah an hang fe a, Abimelek chun hreipui a chawi a, thing kâu a sât thlâk a, a put ta a; a rawihai kuoma chun, “Ka thaw dân in hmu ang hin nangni khawma thaw ve zeu zuou ro,” a ti a.

⁴⁹ Chun, mi po po chun thing kâu an sât thlâk ve ta seng a, Abimelek chu an zui a, kulbîng vêla chun an sie pei a, chun kulbînga chun anni chu an raw khum ta a: chuongchun, Sekem kula mihai po po chu an thi a, pasal le nuhmei sâng khat lai an nih.

⁵⁰ Chun, Abimelek chu Thebez khuoah a fe a, Thebez chu ân huol a, a lâk a.

⁵¹ Amiruokchu, khawpui sûnga chun kulpui a um a, chutaka chun pasal le nuhmei po po le khawpui sûnga mi po po chu an tlân lût a, an inkhâr khum tlat a, kul chunga chun an um khâwm a.

⁵² Abimelek chu kul tieng chun a hang fe a, a hang thaw a, raw tumin kul kawtkhâr bula chun a fe a.

⁵³ Chun, nuhmei tuin amanih bu râwtnawina lung chungtieng hi Abimelek lua chun a zuk thlâk a, a luru chu a kawi ta a.

⁵⁴ Chuongchun, a râlthuom chawitu tlangvâl chu a ko vat a, a kuomah, “I kâwlhnâm kha phawi la, mi hang that ta khai, mihaiin nuhmei ithat a nih an mi ti nawna dingin,” a ti a. A tlangvâl chun ama chu a sunthleng a, chuongchun, a thi ta a.

⁵⁵ Chun, Israelhaiin Abimelek chu a thi ti an hriet phingleh, mi tin chu mâni in tieng an fe ta seng a.

⁵⁶ Abimelek chun a unauhai sâwmsari a that a, a pa chunga a thaw dân kawnga a rîtlona kha Pathienin hieng ang hin ama a hung thung ve ta a nih:

⁵⁷ chun, Sekema mihai rîtlona po po khawm kha Pathienin a hung thung ve ta thung a: chun, Jerubbaal naupa Jotham ṭawngsie kha an chungah a hung tla ta a nih.