RORELTUHAI 7 - Pathien Lekhabu Inthieng (BSI)

Gideon rawiin Midianhai an tukdei

¹ Chuongchun, Jerubbaal (chu chu Gideon chu a nih) le a kuoma mipui um po po chu inhmatakin an tho a, Harod vadung bula chun an inkul a; chun, Midianhai kul chu an umna hmartieng pang More tlâng bul ruoma chun a nih.

² Chun, Lalpain Gideon kuomah, “I kuoma mipui umhai kha Midianhai an kuta ka pêkna ding chun an tam taluo a nih; chuong naw chun chu Israelhaiin, ‘Keini kut ngeia insansuok kan nih annâwm’ tiin mi uongkhum rawi an tih.

³ Chuleiin, ngai ta, mipui na hrietah, ‘Tukhawm a ṭi le inthin taphawt chu kîr nâwk sienla, Gilead tlânga inthawk hin fe nâwk el raw hai se,’ tiin hril rawh,” a ti a. Chuongchun, mipui chu sîng hni le sâng hni an kîr a, sîng khat an la um a.

⁴ Chun, Lalpain Gideon kuomah, “Mihai kha an la tam taluo rawp el, vadungah ṭhuoi thla la, chutaka chun keiin ṭhepêk ka ti che; hieng ang hin nîng a tih: ‘Hi hi chu i kuomah fe ve raw se,’ ka iti taphawt chu i kuomah fe vêng a ta; chun, ‘Hi hi chu i kuomah fe ve naw raw se,’ ka ti taphawt chu i kuomah fe ve naw raw se,” a ti a.

⁵ Chuongchun, mipui chu vadunga chun a ṭhuoi thlâk a; chun, Lalpa chun Gideon kuomah, “Ui anga tui a leia lieka liek taphawt chu a tumin sie pei la, chuong ang bawkin kûna dingṭhaṭhuona tui dît taphawthai khawm,” a ti a.

⁶ Chun, an kutphaa mi a lieka liekhai chu mi za thum an ni a, mi danghai po chu kûna dingṭhaṭhuona tui a dîta dît vawng an nih.

⁷ Chuongchun, Lalpa chun Gideon kuomah, “Mi za thum, a lieka liekhai kha hmangin ka sansuok ding cheu a nih, Midianhai hi i kutah ka pêk ding a nih; a dang po po chu mâni hmun sengah fe kîr vawng raw hai se,” a ti a.

⁸ Chuongchun, mipui chun fâk ding le an tawtawrâwthai chu an chawi a, chun, Israel mi a danghai po chu an puon in tieng ân fetir ta vawng a, mi za thumhai ruok chu ân umtir a; chun, Midianhai kul chu an hnuoi ruoma chun a nih.

⁹ Chu zâna chun Lalpain a kuomah, “Tho la, kula chun zu fe raw khai, i kutah ka pêk ding che a nih:

¹⁰ Amiruokchu, zu fe chu i ṭi chun chu, i siehlaw Pura le hin kula chun zu fe phawt unla:

¹¹ chuongchun, an thuhril chu hrieng i ta; chu hnunga chun chu i kut chu sukhrâtin um a ta, kula chun fe ngam tâng i tih,” a ti a. Chuongchun, a siehlaw Pura le chun kula râl vênghai umna tawntir taka chun an zu fe ta a.

¹² Chun, Midianhai le Amalekhai le khawsak nauhai po po ruoma chun khâu ang elin tamtak an lo um hmur el a; an sanghâwngseihai chu tiem sêng ruollo, an tam tieng chu tuipui kama phaiphin zât zet an nih.

¹³ Chun, Gideon a zu tlung chun mi pakhat hin a ruolpa kuomah a mang a lo hril a, “Ngai ta, mang ka lo nei a, buṭei bei tlang hi Midianhai kula hin a hung inhlum a, puon ina hin a lo inhlum lût a, a hung sukchim a, a suklet tawp a, puon in chu ân hmât vawng el ta a,” a ti a.

¹⁴ Chun, a ruolpa chun a dawn a, “Chu chu Israel mi Joas naupa Gideon kâwlhnâm a ni el chu; Pathienin Midianhai po po le sipaihai po po chu a kutah a pêk a ni el chu teh,” a ti a.

¹⁵ Chun, Gideon chun mang le a umzie an inhrilfie a hriet chun, Pathien a biek ta a; chuongchun, Israelhai kul tieng chun a kîr nâwk a, “Tho ta u khai, Lalpain Midian sipaihai chu in kutah a pêk tah a nih,” a ti a.

¹⁶ Chu mi za thum hai chu pâwl thumin a siem a, an rêng chun tawtawrâwt le pil bêl ruok, a sûnga meiser sie sa a pêk seng a.

¹⁷ Chun, ama chun an kuomah, “Mi en unla, ka thaw angin thaw ve pei ro aw; kul tawntir ka tlung phingleh ka thaw ang peiin thaw ve ro.

¹⁸ Kei le ka kuoma umhai po po hin tawtawrâwt kan hang mût phingleh kul vêla um po pohai khawmin tawtawrâwt chu mût seng bawk in ta, ‘Lalpa le Gideon ta dingin,’ ti seng ro,” a ti a.

¹⁹ Chuongchun, Gideon le a kuoma um mi za hai chu zân vêng lailung râlvêng an inthleng hlim lai takin kul tawntir chu an zu tlung a; chun, tawtawrâwt chu an hang mût a, an pil bêl chawihai chu an sukhâwp vawng a.

²⁰ Chun, a pâwl thum chun tawtawrâwt chu an mût a, bêlhai chu an sukhâwp a, an vawitieng chun meiser an chawi a, an changtiengin tawtawrâwt mût ding chu an chawi a; chun, “Lalpa le Gideon kâwl-hnâm,” tiin an khêk ta dur dur a.

²¹ Kul vêla chun mi tin mâni umhmun senga chun an ngîr a. Chuongchun, sipaihai po po chu an tlân ta a, chun, an khêk rak rak a, an intlânsiettir ta a.

²² Chun, tawtawrâwt za thum chu an mût a, chun, Lalpa chun sipaihai po po chu anni le anni kâwlhnâmin ân dotir tâwl ta a; chuongchun, sipaihai chu Zerera tieng panga Betshittah chen, Tabbath kâwla Abel-meholah ramri chen an tlânsie a.

²³ Chun, Israelhai chu Naphtali, Aser le Manasse hnam po poa inthawk an pung khâwm a, Midianhai chu an hnawt ta a.

²⁴ Chun, Gideon chun Ephraim tlâng ram po poa chun, “Midianhai hi hung thaw ro, Beth-bara chenin vadunghai chu lo lâk khal unla, Jordan vadung leh,” tiin mihai ân tlân vêltir a. Chuongchun, Ephraim mihai po po chu an pung khâwm a, Beth-bara chenin vadunghai chu Jordan vadung leh an lo lâk khal vawng a.

²⁵ Chun, Midian lal pahni Oreb le Zeeb an man a, Oreb chu Oreb lungpuiah an that a, chun Zeeb chu Zeeb grêp sâwrna khurah an that a, Midianhai chu an hnawt ta a, chuongchun, Oreb le Zeeb lu chu Jordan vadung râlah, Gideon kuomah an hung lâk a.